كیانی كوردستان هێڵی سوورە

كیانی كوردستان هێڵی سوورە

پشتیوان كەریم برادۆستی – سیدەكان :
ماوەیەكە لەلایەن هەندێ لە بەرپرسان و پەرلەمانتارانی ئۆپۆزیسیۆن، بانگەشەی هەڵوەشاندنەوەی حكومەتی كوردستان و نەمانی قەوارەی هەرێم دەكەن، كە ئەوەش ناڕەزایی زۆری گەنجانی ئەو نیشتمانەی لێكەوتەوەو داواكارن هەرچی زووە ئیجرائاتی توند لەگەڵ ئەو كەس و لایەنانە بكرێ كە خوازیاری كۆتاهاتنی قەوارەی هەرێمی كوردستانن.
سەركەوت جەمال، سەرۆكی سەنتەری رۆشنبیری سیدەكان لەم بارەیەوە بۆ زاری كرمانجی دەڵێت"هۆكاری وروژاندن و بانگەشەكردن بۆ لەناوبردنی قەوارەی حكومەتی هەرێمی كوردستان، شەڕی ئیرادە و گەورەی ئەم حكومەتەیە, نیوەی بەشدار و شەریكەكانی لە هەوڵی بنكۆڵكردن و رووخاندن و پلانگێری بەشێك لە حزب و سیاسی و پەرلەمانتارە خائین و خۆفڕۆش و جاش و بەكرێگیراوان شەو رۆژ بەهانە دەدەنە بەغداد بۆ ئەوەی دژی بیت و لاوازی بكات و فشاری بخاتە سەر بە برینی شایستە داراییەكان و پشكی هەرێم لەلایەك و خیانەتی ١٦ئۆكتۆبەر و داگیركردنی ناوچە كوردستانیەكان و بە عەرەب كردنیان و سوتاندنی بەرهەمی جوتیاران هەموویان دەچنەوە هەمان چوارچیوەی كاركردن بۆ لاوازكردنی دەسەڵاتەكانی حكومەتی هەرێم"،
سەركەوت بە هەموو شێوەیەك رەتی دەكاتەوە كە حكومەتی هەرێم فاشل و لاواز بێ، بۆیە دەڵێ‌"حكومەتی هەرێمی كوردستان نەفاشلە و نە لاوازە، بە پێچەوانەوە زۆیش بەهێزە، حكومەتی هەرێم مانگی ۷ چاكسازی دەكات و دەبێت عەدالەت لە مووچە و دەرماڵەو نەهیشتنی دزی و بەهەدەردان بهینێتە كایەوە، بۆ ئەوەی مانگانە مووچەی فەرمانبەرەكانی دابین بكات و دەمی جاشی ناوخۆی و دەستی دەرەكی ببڕێت، بۆیە ئەوە گەندەڵەكانن دژی ئەو چاكسازییە وەستاونەتەوەو بانگەشەی لاوازبوونی حكومەت و قەوارەی هەرێم دەكەن"،
سەركەوت هۆشداری دەدات لە ئەنجامی نەمانی ئەو قەوارەی هەرێم، كارەساتی گەورە روو لە كورد بكات و دەڵێ‌"ئەوەی بەغداد بە شۆڤێنیەتی خۆی و دەوڵەتانی دراوسێ و هەندێ جاش كوردی ناوخۆیی، بەرامبەر هەرێمی كوردستان دەیكات، شەڕی شكاندنی ئیرادەی كوردایەتی و نەهێشتنی ئەزموون و حكوومەتێكە بەناوی كورد و كوردستان، بۆیە لێرەوە دەڵێم ئەو ئیرادەییەی بە سوپاو هاوكاری سێ دەوڵەت نەشكا، بە قسەی جاش و فشاری مووچەبڕین ناشكیت و خاوەنی هەیە بۆیە هەوڵەكانیان شكەست خواردوو دەبن و حكوومەتی هەرێمیش بەردەوام ئەبێت لەهەماهەنگی و رێكەوتن لەگەڵ بەغداد" .
سەركەوت پێی وایە بە نەمانی ئەو قەوارەیە كێشەكان قۆڵتر دەكات و چارەسەر نابن"نەمانی قەوارەی هەرێمی كوردستان، شكست خواردنی دەستوری عێراق و بەغدادە كە هەموو كارەكانییان پێچەوانەی دەستوری عێراقن و نەیان توانیوە كار بەم دەستورە بكەن، كە مافی هەموو نەتەوەكانی عێراقی تێدا دیاریكراوە، كورد رۆڵێكی گرنگی هەبووەو شەریك بووە لە بونیادنانەوە و دورخستنەوەی مەترسییەكان لەسەر عێراق، وێڕای كیمیابارنكردن و زیندەبەچاڵكردن و بێسەروشوێنكردنی هەزاران رۆڵەی ئەم میلەتە، ئەوجاش بەو شێوەیە رەفتارمان لەگەڵ دەكەن و ئەوە پاداشتی چاكییەكانی ئەوان"،
‎سەركەوت ئەوەش دەڵێ‌"ئەوانەی هیوا بۆ گەڕانەوەی دەسەڵاتی عەرەب و بەغدا دەخوازن، دەبێ ئەوە باش بزانن كە ئێستا حكوومەت تەنها ناوەو دەسەڵات لەدەرەوەی حكوومەتەو لەدەست ملیشیایەكان و هۆزەكانەوەیە، دەسەڵاتدارن و دەستیان گرتووە بەسەر زۆربەی سەرچاوە داهاتەكانی عێراق و یەكێكە لەگەندەڵترین و وێرانترین دەوڵەتەكانی جیهان و ئەو هەموو سەروەتوو سامانەی هەیەتی بەهەدەر ئەدرێت میلیشیاكان بڕیار لە چارەنوسی ئەم میلەتە هەژار و ماندوەی شەڕی سیاسی و تایفی و دەركی عێراق دەدەن".
وشیار فەرحان ئەویش گەنجێكی تری دانیشتووی شارەدێی سیدەكانە و بەو شێوەیە قسە بۆ زاری كرمانجی دەكات و دەڵێ‌"شۆرشە یەك لەدوا یەكەكانی گەلی كورد، بۆ ئەوە بووە كە سەر بەخۆیانە بژین و خاوەن سەروەری و وڵاتی خۆمان بین، بۆ ئەوە خەباتمان نەكردووەو قوربانیمان نەداوە تاكو ژێر دەستە بین، بەهیچ شێوەیەك قبولی ناكەین و جارێكی تر گەڕانەوە بۆ ژێردەستەیی و دەسەڵاتی عەرەبی لە كوردستان هێلی سوورە"،
وشیار پێی وایە ئەوانەی بانگەشی نەمانی ئەو قەوارەیە دەكەن داشۆراوون لە كوردبوون، بۆیە دەڵێ‌"ئەوانەی تێنوی نەمانی قەوارەی هەرێمن، هەر ئەو عێراقچی و هەرزەكارانەن كە گەیشتونەتە ئەو هەقیقەتەی كە ئەوەی لەساڵانی رابردوو بۆیان چۆتە سەر، لەئێستادا بۆیان ناچێتە سەرو بگرە لێ پرسینەوەشییان لەگەڵ دەكرێ، بەرامبەر ئەو هەڵەو گەندەڵییانەی كە لەساڵانی رابردوو كردویانە، بۆیە دەهۆڵی نەمانی قەوارەی سیاسی هەرێم دەكوتن، بەڵام با دڵنیابن ئەم قەوارەیە نەك بەو هەرزەكارانە، بگرە بە هەموو عێراق و خۆفرشان و ناحەزانی گەلی كوردیش ئەم قەوارەیە لەناو ناچێت",
وشیار ئەوەش دەڵێ‌"نەمانی قەوارەی هەرێم دەمان باتەوە خاڵی سفر, ئەوەی هەشمانە لە دەستمان ئەچێت، مێژووە رەشەكەی گەلی كورد كە هەمیشە حكومەتە یەك لەدوایەكەكانی عێراق زوڵم و ستەمیان بەرامبەر گەلی كوردی ئازادیخواز كردوەو هەموو كات بەسەر كوتكردنی بزاڤی ئازادی خوازی گەلی كورد درێژەییان بە پیلانی لەنێو بردنی كورد داوە"،
وشیار ئەوەش دەڵێ‌"لەدوای ساڵی( 2003) و نەمانی رژێمی گۆڕ بەگۆڕی عێراق، ئەو كات بە سەرۆكایەتی ئەمریكا قەوارەی هەرێم دروست بووەو لەدەستووری عێراق دانی پێدانراوە، هەر لەوساوە گەلی كورد تۆزێك لە ئێش و نەهامەتیەكانی سارێژ بوون و حەسایەوە، بەڵام بە نەمانی قەوارەی هەرێم و گەڕانەوەمان بۆ ژێر دەستی حكومەتی ناوەند، ئەو كاتە لەوە تێدەگەن كە كیانی هەرێم چەندە گرنگ و بەهاداربووە" .
لە كۆتا قسەی خۆیدا وشیار گووتی"بە نەمانی حكومەت و قەوارەی هەرێم كێشەكان نەك چارەسەر نابن بگرە قوڵتریش ئەبنەوە، چونكە هەر لەدوای (2003) وە دروستكردنی قەوارەی هەرێمی كوردستان لەلایەن ئەمریكاوە، هەموو هێزە عێراقیەكان خەونیان بەوە دەبینی كە ئەم قەوارەیە هەڵ بوەشێننەوە، بۆ ئەوەی كورد بچەوسێننەوەو بیخەنەوە ژێر هەژموونی خۆیان، ئەوەی ئێستاش روو دەدات درێژەی ئەو پیلانەیە كە لە رابردوو كاری لەسەر كراوەو ئێستا بە شێوە و فۆرمی جیاواز كاری لەسەر دەكەنەوە، كە ئەو جارەییان لەلایەن هەندێ لە كوردە خۆ فڕۆشەكانەوەیە".

 

زۆرترین بینراو