كێشەی كورد بە ئاگر و ئاسن چارەسەر نابێت

كێشەی كورد بە ئاگر و ئاسن چارەسەر نابێت

دیدار- ڕائیب شێروانی : كاوە مەحموود، سكرتێری حیزبی شیوعی كوردستان لە دیدارێكی تایبەتدا لەگەڵ هەفتەنامەی زاری كرمانجی گوتی:" هەموو كاتێك رێگای گفتوگۆ و لێكتێگەیشتن رێگایەكی چاكە، بۆ ئەوەی كێشەكان چارەسەر بكرێن، رەوشی ناوچە كوردستانییەكان، بەتایبەتی كەركووك پێویستی بە هەڵوێستێكی كوردستانی یەكگرتوو هەیە، لەگەڵ ئەوەی ئێمە لەگەڵ ئەوەدا نین بەو هەلومەرجە و بەو شێوەیە هەڵبژاردن لە كەركووك بكرێت. دەشڵێ:" ناكرێت بە هیچ شێوازێك لایەنەكانی بەشەكانی دیكە دەستەوردان لە بەشێكی دیكەی كوردستان بكەن، بۆیە ناكرێت پەكەكە تەدەخولی باشوور و رۆژئاوا بكات و دەبێت معاناتی خەڵكی كوردستان لەبەر چاو بگرێت.
سكرتێری حیزبی شیوعی كوردستان دیاركرد:" باسكردنی دۆخی هەرێمی كوردستان بابەتێكی فراوانە، لە هەموو كۆمەڵگەیەكی دیاری كراودا، لە قۆناغێكی مێژووییدا، كۆمەڵێك ناكۆكی هەیە لەسەر ئەساسی ئەو ناكۆكیانە كۆمەڵێك ململانێ دروست دەبن، پێموایە كاتێك كە هەوڵدەدرێت ئەو ناكۆكیانە چارەسەر بكرێن، دەكرێت خوێندنەوەمان هەبێت بۆ واقعی ئەمڕۆی كوردستان، دەستنیشانی هەموو ئەو كێشە و كەموكورتیانە بكەین، بابەتەكە ئەوە نەبێت كە بەراوردی بكەین لەگەڵ دوێنێ و ئەمڕۆ، دەبێت بیر لەوە بكەینەوە كە ئێستا چ گرفتێك هەیە كە رووبەڕوومان دەبێتەوە، چۆن كاری لەسەر بكەین، وە چۆن كار بۆ ئایندە بكەین، ئەمە ئەساسی قەزیەكەیە، بۆیە پێموایە جگە لە حكوومەت هەموو لایەنە سیاسییەكان ئەگەر بە تاك، یان بە كۆ بێت پێویستیان بەوە هەیە كۆمەڵێك دانیشتن لەگەڵ یەكدی بكەن، ئالوگۆڕی بیروبۆچوون بكەن، ئەو بابەتانەی كە بە كێشە و گیروگرفت دەزانن باسی بكەن، پرۆژە پێشكەش بكەن، بۆ چارەسەركردنی كێشەكان، كە گەلی كورد چ ئاسۆ و ئایندەیەكی دەوێت كار بكرێت و زەمینە خۆش بكرێت بۆ ئایندەی گەلی كوردستان.
كاوە مەحموود، روونیشیكردەوە:" لە هەموو كاتێكدا رێگای گفتوگۆ و لێكتێگەیشتن رێگایەكی چاكە، بۆ ئەوەی كێشەكان چارەسەر بكرێن، لە هەمان كاتدا ئەو گفتوگۆ و لێك تێگەیشتنە پێویستی بە زەمینە خۆشكردن هەیە، پێویستی بەوە هەیە بنەمایەك هەبێت، ئەو گفتوگۆكردنەی ئێستا كە هەیە لە نێوان هەولێر و بەغدا هەر ئەوە نیە گفتوگۆیەكان لەچوارچێوەی مووچە و بودجە و نەوت بێت، یان گەڕانەوەی پێشمەرگە بێت بۆ ناوچە كوردستانییەكان، ئەوانە هەر هەموویان مافن بە نسبەت گەلی كوردستانەوە، بوونی پێشمەرگە لە كەركووك و ناوچە كوردستانییەكان پێویستە، پێموایە دەبێت گفتوگۆییەكان فراوانتر بكرێن، نابێت هیچ شتێك قەدەغەبێت لەناو گفتوگۆییەكان كە باسی بكرێت، بە بۆچوونی من ئاستەنگێكی زۆر هەیە لەبەردەم چارەسەركردنی فیدڕاڵی بۆ ئەو پەیوەندییە، دەبێت لایەنە كوردستانییەكان پێش گفتوگۆ لەگەڵ لایەنە عێراقییەكان خۆیان گفتوگۆی ئەوە بكەن، كە ئایا فیدڕاڵیەت ماوە، یان بە تۆنێڵێكی داخراودا رۆیشتووە، ئەم بابەتە گرنگە، ئەوەی كە ئێستا هەیە لە نێوان هەولێر و بەغدا كاتیە، چونكە لەوەتەی كە دەوڵەتی عێراق هەیە جاری وا هەبووە شەڕ هەبووە، جاری واش هەبووە گفتوگۆ هەبووە بۆ چارەكردنی كێشەكان، ئێستا دیسان دەچێتەوە ئەو خانەیە رەنگە بۆ ماوەیەك بارودۆخەكە هێور بكرێتەوە، بەڵام دەبێت دەست لەسەر برینە ڕاستییەكان دابنرێت، بۆ ئەوەی زەمینەیەك دروست بێت لە ئاشتی، پێكەوەژیان، لە گەشەپێدانەوە لەسەر ئەساسی رێزگرتن لە ئیرادەی گەلی كوردستان، ئەو پەیوەندییەی كە لە نێوان هەولێر و بەغدا هەیە بەشێكە لە پەیوەندیەك لە چوارچێوەی رەوشی نێودەوڵەتی.
سكرتێری حیزبی شیوعی كوردستان ئاماژەی بۆ ئەوەشكرد:" بابەتی داعش بابەتێكی ئەمنی و سەربازی نیە، بابەتێكی سیاسییە و پەیوەندی بە پێكهاتەی عێراقەوە هەیە، داعش و غەیری داعش و لەوانەیە داعشیش نەمێنێت، گروپێكی دیكە لە ناوچە سوننەكان سەر هەڵبدات، بە بەردەوامی عەقلیەتی سەربازی و ئەمنی بۆ چارەكردنی ئەم كێشەیە، عەقلیەتێك نیە بتوانێت بنبڕی بكات، ئەوەی بنبڕی ئەو كێشەیە دەكات، زەمینەیەك دروست بكرێت بگەڕێنەوە بۆ ئیرادی خەڵكی سوننە لەو ناوچانە، خەڵكی سوننە چی دەوێت و لەو چوارچێوەیەدا مامەڵەی لەگەڵدا بكرێت، نەك سوننە سەر بە لایەنێكی دیكە بێت، بەڵكو دەبێت سەربەخۆ بێت، تا ئێستا بارودۆخی ناوچە سوننە نشینەكان گۆڕانكاری بەسەردا نەهاتووە، داعشیش تەواو ببێت، شتێكی دیكە دروست دەبێت، ئەو كێشەیە بە سەربازی و ئەمنی تەنیا چارەسەر نابێت، بوونی پێشمەرگە لە كەركووك و ناوچە كوردستانییەكان پێویستە، بەڵام بنبڕكردنی كێشەكە بابەتێكی سیاسییە.
كاوە مەحموود، سكرتێری حیزبی شیوعی كوردستان ئاشكراشی كرد:" هەر لایەنێكی كوردستانی ئەگەر باكوور بێت، رۆژهەڵات بێت، یان رۆژئاوا، ئێمەش لە باشوورەوە دەبێت تایبەتمەندی هەر بەشێكی دیكەی كوردستان لەبەرچاو بگیرێت، هەروەها دەبێت بڕیارەكان بگەڕێنەوە بۆ بڕیاری لایەنە سیاسییەكانی ئەو بەشە، ناكرێت بە هیچ شێوازێك لایەنەكانی بەشەكانی دیكە دەستەوردان لە بەشێكی دیكە بكەن، ناكرێت پەكەكە تەدەخولی باشوور و رۆژئاوا بكات، هێزەكانی دیكەش هەر بە هەمان شێوە، دەبێت رێز لە ئیرادەی پارچەكانی دیكەی كوردستان بگیرێت، بە هەمان شێوە ئەو حاڵەتەی كە هەیە ناكرێت وا لە وڵاتانی دەوروبەر بكەن كە بە ئاگر و ئاسن بۆردومانی كوردستانی باشوور بكەن، بە هەموو شێوەیەك ئەو دەست درێژییە و تۆپبارانەی كە دەكرێت ئەوە پێشێڵكردنی سەروەری خاكی كوردستانە، ئەو حكوومەتانە مافی خۆیانە لەناو سنووری خۆیان چ دەكەن ئەوە پەیوەندی بە خۆیانەوە هەیە، لەگەڵ ئەوەش كێشەی كورد بە شەڕ چارەسەر نابێت، وەكو لە باشوور چارەسەر نەبوو، لە باشوور حەشدی شەعبی پەلەماری كوردستانی دا، بینیمان لە سحێلا و پردێ چۆن توشی شكەستێكی گەورە بوون، بۆیە باشترین چارەسەر، چارەسەری گفتوگۆی ئاشتیانەیە لەسەر ئەساسی رێزگرتن لە مافەكانی گەلی كوردستان، ئەوەی كە لە باشوور هەیە دەستكەوتێكە، ئەو دەستكەوتە بە خوێنی هەزاران شەهید هاتۆتە كایەوە، رەنگە وەكو حزبی شیوعی كۆمەڵێك تێبینیمان هەبێت، بەڵام دەبێت هەوڵ بدەین هەرێمی كوردستان زیاتر هەنگاو بنێت بۆ هێمای مافی چارەنوسی خۆی و گەیشتن بە دەوڵەتی سەربەخۆ، ئەمە مافی گەلی كوردستانە".

بیروڕا

زۆرترین بینراو