كێشەی كەمی بینامان هەیە

كێشەی كەمی بینامان هەیە

ئەمساڵ بۆدەساڵ دەچێت بەرێوەبەرایەتی پەروەردەی رواندز كراوەتەوە تاكو ئێستاش نەبوونەتە خاوەن باڵەخانەی تایبەت بەخۆیان و بەشێوەی میوان لە قوتابخانەیەك جێگەیان بۆكراوەتەوە ، لەگەڵ ئەوەشدا بەهۆی بوونی ئەوان لەو قوتابخانەیە نەتواندراوە وەك پێویست بۆخوێندن سوود لەم قوتابخانەیە وەربگیرێت،لە دیمانەێكی تایبەتی هەفتەنامەی زاری كرمانجیدا مامۆستا چنور مەزهەر محەممەد بەڕێوەبەری پەروەردەی رواندز مان رووبەرووی چەند پرسیارێك كردەوە.
دیمانە: ساڵح بێخاڵی - رواندز
لەسەرەتادا گووتی" بەرێوەبەرایەتی پەروەردەی رواندز لە 19-10 ساڵی 2009 وە بە فەرمی كراوەتەوەو تا ئێستا بە هاوبەشی لەگەڵ قوتابخانەیەك لەناو یەك بینایە كارەكانمان بەڕێوە دەبەین, پێشتر هەر لەناو ئەم بیانەیە دابووین و لەكاتی قەیرانی ئابووری نەتواندرا بیانەیەی بۆ درووست بكرێت, بەڵام لە وەزارەت لە هەوڵدام بۆ درووستی كردنی بیانەیەی تایبەت بە بەڕێوەبەرایەتیەكەمان, بە گشتی كێشەی كەمی بیانەیەمان هەیە بۆ قوتابخانەكان و پەیمانگەی هونەرە جوانەكان لەناو بیانەی قوتابخانەیەك دایە جیا لەوەش كۆمەڵێك كابینەمان بۆ تەرخان كردوون, هەر لەبەر ئەم هۆیە ئێمە زۆر پێویستمان بەم بینایە هەیە بۆ قوتابخانەو پێویستە بۆ ئەوان بینایەكی تایبەت درووست بكرێت.
بەرێوەبەری پەروەردەی رواندز گووتیشی" سیستەمی بەڕێوەبردنی پەروەردە گرنگی بە ئەنجوومەنی دایكان و باوكان دەدات ، هەوڵ ئەدات ئەنجوومەنەكە كارا بكات بۆ هاوكاریكردنی قوتابخانەكان و سەركەوتنیشی بەدەستهێناوە,بەڵام ناشكرێ پەروەردە هەر چاوی لە هاوكاری خەڵكی خێرخواز بێت, راستیەكەی ئێمە چاومان لە دەستی خەڵكەكەیەو ئێرەش ئاستی ژیانیان مام ناوەندەو توانای یارمەتیدانی پەروەردەیان نیە, پێویستی حكومەت پێداچوونەوەیەك بە وەزارەتی پەروەردە بكات.
لەبارەی میلاكات و گرێبەست و وانەبێژەكان بەڕێوەبەری پەروەردەی رواندز بەم جۆرە وەڵامی زاری كرمانجی دایەوە" لە گەڵ سەرپەرشتیارەكان هەماهەنگی باشمان هەیە و كاردەكەین بۆ زیاتر بەرز كردنەوەی ئاستی زانستی لە پەروەردەكەمان میلاكاتمان بە رێكو پێكی دابەشكردووە, لە قۆناغی بنەڕەتی زۆر باشە و زیاد لە پێویست مامۆستامان هەیە, بەڵام لە هەردوو قۆناغی تر پێویستیمان بە چەند مامۆستایەك هەیە بە تایبەتی لە وانە زانستیەكان و بیركاری, گرێبەستەكانیش پەیوەندیان بە ئیمەوە نییە, بەڵام هەر نووسراوێك پێویستی بە هەمیشەیی كردنی گرێبەستەكان بێت ئێمە بە زووترین كات وەڵاممان داوەتەوە, وانەبێژەكانیش بەپێی ڕێنمایی داوامان كردووەو بەهەمان ڕێنمایی دایان ئەنێینەوە.
بۆئەو پرسیارەی كەئاخۆ بۆچی بەم دووایە لە سنووری پەروەردەی رواندز لە قۆناغی بنەڕەتی كچان و كوڕان لێك جیاكراونەتەوە؟ چنور مەزهەر گووتی" جیاكردنەوەی قوتابیانی كوڕ لە كچ لە قۆناغی بنەڕەتی بەهۆی چەند كێشەیەك بوو كەلە وەرزی ڕابردوو رووبەروومان بوونەوە, پێشتر دوو دەوام لە لە قوتابخانەیەك دەكرا كە تێكەڵاو بوون و بەڕێوەبەریش وەك پێویست كارەكانی ئەنجام نەدەدا بۆیە پێمان باش بوو بیكەینە كوڕ بە جیا و كچ بەجیا,بۆ نموونە هەردوو قوتابخانەی موژدەو بێجان لەناو سەنتەری رواندز پلانێكی گونجاومان داڕشتن هەردوو قوتابخانانەمان كردن بە چوار قوتابخانەو میلاكاتمان بۆ دابین كردن, هەرچەندە گرفت بۆ چەند قوتابییەك لە قۆناغەكانی 7و 8و 9 درووست بوو بەڵام بەپێی توانا چارەسەرمان كردووە.
بەرێوەبەری پەروەردەی رواندز گووتیشی" كەمی میزانیەی پەروەردەی رواندز كێشەیەكی گەورەیە و جیا لە پەروەردەكانی تر كەمترین میزانیەمان هەیە ئەوە بێجگە لە كێشەی كارەبا چونكە لە شارەكەمان بەیانیان كارەبای نیشتیمانی نییەو پشت بە مۆلیدەی خۆمان دەبەستین كە خەرجیەكی زۆری پێویستە, ئەمەش بڕی یەك ملیۆن دیناری دەوێت بۆكاركردنی, نزیكەی دوو ملیۆنێك دیناریش بۆ ئیفادات و پێداویستیەكانی تری ناو دیوانی پەروەردەخەرجدەكرێت , بوونی 81 قوتابخانەو 8 باخچەی منداڵان بە بڕەپارەیەكی وەها كەم زۆر سەختە, زۆربەی قوتابخانەكانمان پێویستیان بە ئیزوگامكردنە بە تایبەتی لە گوندەكان و چەند قوتابخانەیەكی كۆنی ناو سەنتەری شار, جیا لەمانەش كێشەی كەمی ئاومان لە چەند قوتابخانەیەك هەبوو خۆشبەختانە هەموومان چارسەركرد, لە وەرزی رابردووش زیاد لە پێویست نەوتمان بەسەر قوتابخانەكان دابەشكردو ئێستا هەموویان نەوتیان هەیەو لای خۆشم بۆ ماوەی مانگێك نەوتم پاشەكەوت كردووە, جگە لەوەش بەڕێوەبەرایەتی پەروەردەی هەولێر داوای ئامارێكی درووستی كردووە بۆ دابەشكردنی نەوت, كۆمەڵێك پیداویستی قوتابخانەكان هەن دەبێ دابین بكرێن و چارەسەریش بكرێن وەك چاكردنی سەقف و ئاو و دابینكردنی سووتەمەنی و پێداویستی تری ئەو قوتابخانانەی كە تازە كراوەنەتەوە كە ئەگەر بە قەرزیش بێ دەبێ هەر بكرێن.
سەبارەت بە كێشەی باخچەی منداڵانی گەڵا لە گەڕەكی بانەزێوك مامۆستا چنوور گووتی" پارساڵ باخچەی منداڵانی گەڵا لە ناو بیناییەی قوتابخانەیەك بوو بەڵام بە هۆی دووری منداڵەكان كەمتر دەهاتن ئێمەش خانووێكمان بۆ بەكرێ گرتن و ئەوەبوو رێژەی منداڵەكان زۆر زیاتر بوون, بەڵام بەهۆی بوونی كێشەیەك كە بۆنێكی ناخۆش لە خانووەكە دەهات گەڕاندامەنەوە بۆ هەمان شوێنی كۆن, بە دایك و باوكانمان راگەیاند مانەوەیان لەم خانووە منداڵەكان تووشی نەخۆشی دەكات.
لە موژدەیەك بۆ قوتابییانی سنووری پەروەردەی رواندز ئەم بەرێوەبەرەگووتی" بەرای من هەردوو وانەكانی هونەرو وەرزش زۆر گرنگن بۆ قوتابی،چونكە بە بوونی ئەو دوو وانەیە قوتابی وانەكانی دیكەی لەلا خۆشەویستر ئەبن, پارساڵ گرنگی تەواومان بە هونەر دا ڤیستیڤاڵێكی گەورەمان ئەنجامدا كە جێی دەستخۆشی خەڵك و بەڕێوەبەرایەتی پەروەردەی هەولێر بوو, توانیمان هەموو قوتابخانەكان لەیەك شوێن كۆ بكەینەوەو بۆ قوتابی شتێكی باش بوو, بۆ وەرزشیش هەوڵماندا فیستیڤاڵی وەرزشی سازبكەین لەگەڵ قایمقام سەردانی یاریگەی بانەزێوكمان كرد بەڵام بەهۆی بەخێوكردنی مەڕو ماڵات لە ناو یاریگەكە بۆنێكی ناخۆشی هەبوو بۆیە داوامان كرد پاك بكرێتەوە كەچی نەكرا, ئەمساڵ لە پلانماندا هەیە ئەگەر زانیمان كەموكوڕییەكانی یاریگە چاك نەكرێن ئەوە خۆمان لە مانگی 12 تەواوی مامۆستاكانی سنوورەكە هەڵمەتێكی پاككردنەوە رادەگەیەنین و بەهەرەوەز هەڵدەستین بە پاككردنەوەو ئامادەكردنی یاریگەكە بۆ ئەنجامدانی ڤیستیڤاڵی وەرزشی, لێرەشەوە لەرێگای زاری كرمانجیەوە بەڵێن بە قوتابیە خۆشەویستەكان دەدەم ئەمساڵ لە سەرەتای وەرزی بەهار ڤیستیڤاڵی وەرزشی پەروەردەی رواندز بەڕێوە دەبەین, سەربارەت بە كەمی پێداویستیە وەرزشیەكان هەرچەندە میزانیەمان زۆر كەمە بەڵام درێغیمان نەكردووەو لە گیرفانی خۆم تۆپم كڕیوە.
هەر مامۆستایەكم كردۆتە بەڕێوەبەر لەسەر ئارەزووی خۆی بووەو نامەوێ هیچ بەڕێوەبەرێك لە ئەركەكەی كەمتەرخەم بێت لەبەر ئەوەی هەر بەڕێوەبەرێكی قوتابخانە كەمتەرخەم و وەك پێویست ئەركەكانی خۆی ئەنجام نەدات لەسەركار لای دەبەم و لە ساڵی پارەوە تا ئێستا 38 بەڕێوەبەرم لەسەركار لاداوە, بەڕێوەبەر سەركردەی قوتابخانەكەیەتی و هەر لەبەر ئەوەش پارساڵ ئاستی قوتابیەكان و رێژەی دەرچوون لە پەروەردەی رواندز دوو بەرابەر بەرز بووەوە و قوتابییەكانمان نمرەی باشیان بەدەستهێنا.
راستە قوتابخانەی شەمام وەك زیندانێكە لە رووی كۆنی بینایەكەو كەموكووڕی قوتابخانەكە بەڵام تەمەنا دەكەین لە كابینەی نوێ چاوێك بەمیزانیەی وەزارەتی پەروەردە دابخشێنەوەو رواندزیش پشكی شێری بە بەربكەوێت لە نۆژەنكردنەوەی قوتابخانەكان.
سەبارەت بەكاری فرۆشگای قوتابخانەكان، بەرێوەبەری پەروەردەی رواندز دەڵێت"ساڵانە پارەی فرۆشگای قوتابخانەكان دەچێتەوە هەولێر و بەشێكی كەم بۆ قوتابخانەكان دەگەڕێتەوە, ئێمەش لیژنەیەكمان پێكهێنا لە بەڕێوەبەرایەتی پەروەردەی رواندز زۆر بە جددی كاریان دەكرد و هەوڵی زۆرماندا لەو 28 ملیۆنەی لە قوتابخانەكانی سنووری پەروەردەی رواندز كۆكرایەوە پاریەكی باشمان بۆ بێتەوە،بەڵام بەداخەوە لەو بڕە پارە زۆرە تەنها 4 ملیۆنمان بۆ هاتەوە كە بەشی هیچی نەدەكرد, ئەوە رێنمایی وەزارەتەو دەسەڵاتی ئێمە نییە, خۆزگە لەو پارەیەی دەچێتە هەولێر نیوەی پارەكەمان بۆ بهاتایەتەوە بۆ چارەسەركردنی كێشەكان.
دەربارەی گۆڕانكارییەكانی ناو دیوانی پەروەردەی رواندزیش مامۆستا چنور گووتی "ئەم گۆرانكاریانە لەسەر بنەمای كاركردن و دڵسۆزی بووە، چەند جارێك چوومەتە ژوورەكان كارمەند یان مامۆستام دیوە گرنگی بە كارەكەی نەداوەو پشتگوێی خستووە, داوای كارێكم لێكردووە بە شێوەیەكی ناشرین وەڵامی داوەتەوەو یان قسەی نەشیاوی بە بەڕێوەبەرەكان وتووە, كارەكانیان بە سستی بەڕێوە دەبردو دەوروبەریان لێ ڕازی نەبوون, لەبەر ئەم هۆیە گۆڕانكاریم كردووە, ئەوانەی ئێستا لە دیوانی پەروەردە دەستبەكارن رێز لە خەڵكەكەو مامۆستاو داواكارییەكان ئەگرن, لەگەڵ دەوروپشتم تووند نیم وهەر لە سەرەتای مامۆستایەتیمە و لە كارەم زۆر جددیمە و دەمەوێ ئەوانەی كارم لەگەڵ دەكەن وەك خۆم دڵسۆز بن كە بوومەتە بەڕێوەبەری پەروەردەش كەسێكی عاتفیمە بەڵام ناكرێ هەست وسۆزم بەسەر عەقڵمدا زاڵ بێت .
لەكۆتایی دیمانەكەی زاری كرمانجی بەرێوەبەری پەروەردەی رواندز ئاماژە بۆ ئەوە دەكات" لە كاتی ئیشكردنم لە پەروەردە بە هیچ شێوەیەك جیاوازیم لە نێوان لایەنەكان نەكردووە, بەڵام لە دەرەوە وەك كادیرێكی پارتی كاری حزبی خۆم دەكەم و ئەگەر كارمەندێك لە لایەنێكی تریش لەناو پەروەردە بە دڵسۆزی كار بكات بۆمن سەربەرزیەو رێزی لێ دەگرم, بیرم لە چەند پڕۆژەیەك كردۆتەوە لە داهاتوو بكرێت بە داهات بۆ ژێرخانێك لە قازانجی پەروەردەی رواندز,ئەمساڵ بە كردنەوەی 3 باخچەی ساوان لە ناحیەی وەرتێ بەرزێوەو ئاكۆیان یەكێك بوو لە كارە پێویستەكان ئاواتەكەم هاتەدی, لەگوندی دەنگارە هەستاین بە كردنەوەی پۆلەكانی 7-8-9 هەروەها لە میراجیان چارەسەری هەردوو پۆلی 5-6 مان كرد بە دابینكردنی كابینە.پێویستیمان بە كڕینی 100 تەختە رەشی قوتابخانەكان هەیە بەڵام بەهۆی نەبوون و كەمی میزانیە نەمانتوانیوە بیان كڕین.
”جیا لە پەروەردەكانی تر ئێمە كەمترین میزانیەمان هەیە“

 

 

زۆرترین بینراو