لە سۆران هەزاران یەكەی نیشتەجێ بوون بۆ كرێچیەكان دروست دەكرێت

لە سۆران هەزاران یەكەی نیشتەجێ بوون بۆ كرێچیەكان دروست دەكرێت

موڕشید برادۆستی – سۆران: لە قەزای سۆران هەزاران یەكەی نیشتەجێ بوون بۆ كرێچییەكان درووست دەكرێت و بەمەش دەتوانرێ رێژەی كرێچی بەڕێژەیەكی بەرچاوو كەم بكرێتەوە .
بەپێی ئەو زانیاریانەی لە بەشی ئاماری سۆران دەست زاری كرمانجی كەوتووە، لە دەڤەری سۆران زیاتر لە 3 هەزار و چوار سەد كرێچی لە دەڤەرەكە بوونی هەیە و لایەنی پەیوەندی داری سۆران لەهەوڵی بەردەوامدان بۆ كەم كردنەوەی ئەو رێژەیە .
رەهند عەبدولوەهاب گەنجێكی دانیشتووی سۆرانە و پیشەی فەرمانبەری میرییە بە زاری كرمانجی گووت " ماوەی پێنج ساڵە ژیانی هاوسەرگیریم پێكهێناوە و لە خانووی كرێدا دەژیم، بەهۆی كەمی موچەكەم نەم توانیوە خانووێك درووست بكەم یا بیكڕم، چونكە داهاتی ئێمە تەنها موچەی فەرمانبەرییە .
زیاتر گووتی " ئەگەر بەهەر شێوەیەك لە شێوەكان بێت حكومەت یا كەرتی تایبەت یەكەی نیشتەجێ بوونمان بە قست پێ بدات ئەوا بێگومان وەری دەگرین و بە كارێكی گرنگیش دەزانین، لە جیاتی ئەو پارەی بە كرێی خانوو دەدەین بە قستی یەكەكە دەدەین و دەبین بە خاوەن خانووی خۆشمان و سەدان گەنجی وەك منیش بە دڵێكی خۆش لە خانووی خۆی دادەنیشێت و لە كرێچیاتی رزگاری دەبێت .
سومبل سەردار ئافرەتێكی خاوەن دوو مناڵە و دانیشتووی گەڕەكی ئازادی دیانایە بە زاری كرمانجی گووت " هەموو خەون و ئاواتم هەبوونی خانووی خۆمە، زۆربەی هاوڕێیەكانم دەبینم خانووی خۆیان هەیە و ئێمەش بەهۆی نەبوونی نەمان توانیووە خانوو بكڕین . یەكێك لە كارە سەرەكییەكانی هەموو وڵاتێك دابین كردنی شوێنی نیشتەجێ بوونە بۆ هاووڵاتییانی، جێخۆیەتی حكومەت هەوڵی جددی بدات تا ئەو پڕۆژەیەی دروست كردنی یەكەی نیشتەجێ بوون لە سۆران سەر بگرێت و هەزاران كەس لە كرێچی رزگاری دەبێت و ژیانێكی خۆش لە نێو خانووی و یەكەی خۆی لە گەڵ ماڵ و منداڵی دەگوزەرێنێت، داواكارین لە قائیمقام و لایەنە پەیوەندی دارەكان بە گرنگیەوە كار لەسەر ئەو بابەتە بكەن .
لەلای خۆشیەوە، كرمانج عزەت قایمقامی سۆران لە لێدوانێكیدا بە زاری كرمانجی راگەیاند " لەگەڵ كۆمپانیایەكی ئیتاڵی لە گفتۆگۆداین بۆ دروست كردنی دوو هەزار یەكەی نیشتەجێ بوون لە سۆران، بە قستی 10 ساڵ بە هاووڵاتییان بۆ فەرمانبەر و مامۆستاییانە دەدرێت كە كرێچیین و بە تەواو كردنی ئەو پڕۆژەیە رێژەیەكی زۆری خەڵكی دەڤەرەكەمان دەتوانن لە كرێچیەتی رزگاریان بێت و ببن بە خاوەن خانووی خۆیان .
یەكەمینجارە كۆمپانیایەك یا كەرتی تایبەت پڕۆژەیەكی وا لە سۆران پێشكەش دەكەن، كە جیا لە هەزاران یەكە لە هەمان كات قوتابخانە و نەخۆشخانە و پاڕك و بازاڕ و هەموو خزمەت گوزاری و سەرەكی و تایبەت مەندیەكانی تێدایە، وەك قائیمقامیەتی قەزای سۆران هەموو هاوكاریەكییان دەكەین بۆ دەست بەكار بوون و تەواو كردنی پڕۆژەكە، كرمانج عزەت ووای گووت ".
گووتیشی " پڕۆژەكە بە ستاندارێكی زۆر پێشكەوتوو دەچێتە واری جێبەجێ كردن لە تەواوی كوردستان كەم پڕۆژەی وەها هەن، بۆیە لە ماوەی داهاتوو كاركردن و چۆنیەتی دابەش كردن بۆ خەڵكی دەڤەرەكەمان ئاشكرا دەكەین .
ئەمە لە كاتێكدایە، ماوەی شەش ساڵە، وەزارەتی ئاوەدان كردنەوەی حكومەتی هەرێم، 140 یەكەی نیشتەجێ بوونی بۆ كرێچیەكانی سۆران لە گوندی بادلیانی سەر بە شارەدێی دیانا دروست كردوە و تا ئێستا دابەش نەكراون و كەسیش نازانێ بە كێ دەدرێن .
قەزای سۆران لە رووی كارگێڕیەوە سەر بە پارێزگەی هەولێرە و بە دووری 110 كم لە باكووری رۆژهەڵاتی شاری هەولێر هەڵكەوتووە، زیاتر لە 200 هەزار كەس رێژەی دانیشتووانی سۆران پێكدەهێنن .

 

زۆرترین بینراو