لە مێرگەسۆر زیاتر لە 45 شوێنی گەشتیاری هەن

لە مێرگەسۆر زیاتر لە 45 شوێنی گەشتیاری هەن

چەند پرۆژەیەكی گرنگی گەشتیاری لە ناوچەكە جێبەجێ دەكرێن

ڕائیب زراری- مێرگەسۆر:
سەفەر سوار، بەرپرسی بنكەی گەشتوگوزاری مێرگەسۆر، لە دیدارێكدا لەگەڵ هەفتەنامەی زاری كرمانجی، دەڵێ، كۆمەڵێك پرۆژەی گرنگی گەشتیاری لە سنووری مێرگەسۆر دروست دەكرێن، ئەوانەش كاریگەرییان لەسەر كەرتی گەشتیاری دەبێت و دەبێتە هۆكاری راكێشانی گەشتیاری زیاتر بۆ ناوچەكە كە ساڵانە زیاتر لە 100 هەزار گەشتیار روو لە دەڤەری بارزان دەكەن، رۆژبەرۆژیش ژمارەكە روو لە زیادبوونە. 
سەبارەت بە شوێنە گەشتیارییەكانی مێرگەسۆر، بەرپرسی بنكەی گەشتوگوزاری مێرگەسۆر، گوتی:" هەڵكەوتەی جوگرافیای مێرگەسۆر وا هەڵكەوتووە كە چەندین ناوچەی گرنگی گەشتیاری بكەونە ناوچەكە، چەندین جۆری گەشتوگوزار هەن، لەوانە گەشتوگوزاری ژینگەی، لە دەڤەری بارزان بەهۆی پاراستن و گرنگی دان بە ژینگە ناوچەیەكی گرنگ و لەبارە بۆ كەرتی گەشتیاری، لەگەڵ ئەوەی لە سنووری مێرگەسۆر كۆمەڵێك سەرچاوەی ئاوی بەهێز هەن، وەكو رووباری چامە، زرارا، رێزان، هەروەها شوێنی گرنگتر لەمانە ئەشكەوتی شانەدەر، جگە لەمانە مەزاری بارزانی نەمر و كاكە ئیدریسی هەمیشە زیندوو و مینۆمێنتی ئەنفالەكان، هەموو ئەمانە وای كردووە كە ساڵانە گەشتیارێكی زۆر روو لە دەڤەری مێرگەسۆر بكەن. 
سەفەر سوار، گوتیشی:" گەشتوگوزار چەند جۆرێكە لەوانە گەشتوگوزاری ئاینی، گەشتوگوزاری سەركێشی، گەشتوگوزاری ژینگەیی، كۆڕوكۆبوونەوە، ئەگەر بەراورد بكەین لەگەڵ شوێنەكانی دیكە بوونی مەزاری بارزانی نەمر لە ناوچەكە وای كردووە كە ساڵانە زیاتر لە 600 هەزار گەشتیار و سەردانیكەر سەردانی دەڤەری بارزان بكەن، هەروەها گەشتوگوزاری ژینگەیی، هەموو كۆتاییەكانی هەفتە، زیاتر لە 40 گروپی گەشتیاری، كە سەر بە فیدراسیۆنی شاخەوانی هەرێمی كوردستانن، كە ژمارەی هیچ لە گروپەكان لە 50 كەس كەمتر نییە، كۆتایی هەر هەفتەیەك زیاتر لە 2500 گەشتیار سەردانی دەڤەرەكە دەكەن، بێجگە لەوەی ئەشكەوتی شانەدەر، گەلی زۆرەگڤان و گەلی كۆلیتا، بوونەتە گرنگترین سەرچاوەی راكێشانی گەشتیار بۆ وێنەگرتن، زۆربەی فۆتۆگرافەكان بۆ وێنە گرتن بەتایبەتی لە وەرزی پایز رووی تێدەكەن، چونكە شوێنی زۆر سەرنج راكێشی هەیە و دیمەنێكی جوان دەبەخشێت، هەموو ئەمانە وای كردووە كە ژمارەی گەشتیاران بۆ ناوچەكە رۆژبەرۆژ زیاتر ببێت، بەراورد بە رابردوو، ئەو گەشتیارانەی كە ماونەتەوە لە دەڤەری بارزان، تەنیا لە هۆتێلی رووبار لە ماوەی نۆ مانگدا زیاتر لە 2 هەزار گەشتیار بوونە، كە ساڵانە زیاتر لە 100 هەزار گەشتیار سەردانی دەڤەری بارزان دەكەن.
بەرپرسی بنكەی گەشتوگوزاری مێرگەسۆر، ئاشكراشی كرد:" ئەگەر بگەڕێینەوە بۆ ئەو ماستەرپلانەی كە لە ساڵی 2012 كراوە، لەناو ماستەرپلانەكەدا هەموو شوێنە گرنگەكانی گەشتوگوزار لەم ناوچەیە دەست نیشان كراون، بۆ ئەوەی بكرێنە شوێنی گەشتیاری، كە زیاتر لە 45 شوێنی گەشتیاری هەن، ئەمانەش لوتكەی چیاكان، رووبارەكان، دۆڵەكان، ئەشكەوتی شانەدەر و بێستوون، بێجگە لە شوێنە گەشتیارییەكانی دیكە كە هەن.
سەبارەت بەوەی بۆچی وەكو پێویست گرنگی بە شوێنە گەشتیارییەكانی ناوچەكە نەدراوە؟ سەفەر سوار، رایگەیاند، زۆر شوێن هەن، بەڵام كەمتر گرنگییان پێدراوە، ئەوەش لەبەر ئەوەیە كەرتی تایبەت لەم ناوچەیە لاوازە، لە هیچ شوێنێك حكوومەت پرۆژەی گەشتیاری دروست ناكات، دەبێت كەرتی تایبەت پرۆژە گەشتیارییەكان دروست بكات، لە مێرگەسۆر چ لە رێگەی وەبەرهێنەر، چ لە رێگەی مساتحەوە بێت، تا ئێستا وەبەرهێنەرە ناوخۆیی و بیانییەكان كەمتر روویان تێ كردووە، هیوادارم لە داهاتوودا وەبەرهێنەرەكان ئاوڕێك لەو سێكتەرە بدەنەوە بۆ بووژانەوەی كەرتی گەشتوگوزار لە ناوچەكە، پێشتر هەندێك خزمەتگوزاری سەرەتایی بۆ شوێنە گەشتیارییەكان دابین كرا، وەكو كەپر و كورسی و یاری منداڵان، بەڵام بەداخەوە هەر لەگەڵ تەواوبوونیان هەموو تێكدران، بەداخەوە فەرهەنگی پاراستنی موڵكی گشتی لەلایەن هاووڵاتیانەوە زۆر خراپە و خەڵك كەمتر هەست بە بەرپرسیارەتی دەكات، دەبێت لەو جۆرە كلتوورە دەربچین، هەر چەندە دەستەوەستان نەوەستاوین بەردەوام كار دەكەین، بەڵام پێویستە ئەو كەرتە لە رێگەی كەرتی تایبەتەوە گرنگی پێ بدرێت، وەكو ئەوەی كە لە رێزان كراوە، ئێستا خەڵك پرۆژە پێشكەش دەكات، پرۆژەیەك پێشكەش كراوە لە بەردەری بۆ چامە، وەكو گەشتوگوزاری ناوچەكە رەزامەندیمان لەسەر داوە كە بەو میكانیزمە دروست بكرێت، كە رووبەری زیاتر لە 25 هەزار مەتر دووجا لە خۆ دەگرێت، بریتییە لە كەپر و مۆتێل و بە شێوازێكی زۆرجوان دیزاین كراوە و لایەنی ژینگەیی رەچاو كراوە، هیوادارم لە كاتی پێویست جێبەجێ بكرێت، هەروەها لە بەرنامەدایە ئەو كەپرانەی كە لە زرارا، چامە دروست كراون، بخەینە سەر بنەمایەكی زانستی، بەڵام بەو مەرجەی كە كۆمەڵێك پرۆژەی خزمەتگوزاری بۆ ئەوان دابین بكەین، ئەوانیش ناچار بكەین كە رێنماییەكان جێبەجێ بكەن، بۆیە ئێستا خەڵك گرنگی بە كەرتی گەشتیاری دەدات، هەروەها وەزارەتی شارەوانی رەزامەندی لەسەر كۆمەڵێك خزمەگوزاری سەرەتایی بۆ زرارا، چامە و هەموو ئەو شوێنانەی كە گەشتیاران رووی تێدەكەن داوە، بۆ ئەوەی خزمەتگوزاری سەرەتایی بۆ ئەو ناوچانە دابین بكەین.
سەفەر سوار، بەرپرسی بنكەی گەشتوگوزاری مێرگەسۆر، روونیشیكردەوە:" پلانی ستراتیژی ئێمە دیارە، گرنگی بە هەموو ئەو شوێنانە دەدەین كە گرنگن بۆ گەشتوگوزار، ئەمە رۆئیا و دیدگای ئێمەیە، رێگری لە هیچ پرۆژەیەكی گەشتیاری نەكراوە، تەنیا ئەو پرۆژانە نەبێت كە دەبنە هۆكاری تێكدانی ژینگە، هەر پرۆژەیەك دروست بكرێت، دەبێت لەگەڵ ژینگە بگونجێت، هەر لەبەر ئەوە پێویستە وەبەرهێنەرانی ئێمە زیاتر گرنگی بەو كەرتە بدەن، چونكە دەڤەری بارزان شوێنی زۆر جوانی هەیە".

 

زۆرترین بینراو