لە هاتووچۆی سۆران سیستەمی نۆرە پەیڕەو ناكرێت

لە هاتووچۆی سۆران سیستەمی نۆرە پەیڕەو ناكرێت

محەممەد مەحموود- سۆران : دوای ئەوەی حكوومەتی هەرێمی كوردستان ١١ ی ئەم مانگەی دیاریكرد بۆ دەسپێكردنەوەی دەوامی دامودەزگاكان، زۆرترین قەرەباڵغی دەكەوێتە سەر بەرێوەبەرایەتییەكانی هاتووچۆ بەو پێیەی رۆژانە خەڵكێكی زۆر بۆ نوێكردنەوە و دەرهێنانی مۆڵەت سەردانیان دەكەن، بەڵام لە سۆران تا ئێستا لۆدێكی زۆر دروست نەبووە تا بەڕێوەبەرایەتی هاتووچۆ كار بەسیستەمی نۆرە بكات.
رائید دلاوەر لەتیف، بەرپرسی بەشی راگەیاندن و هونەری لەبەڕێوەبەرایەتی هاتووچۆی سۆران بەزاری كرمانجی راگەیاند:" بۆ نوێكردنەوەی مۆلەت، هەر كەسێك مۆلەتی بەسەر چوو بێت دەتوانیت سەردانی بەشی مۆلەت بكات و داوای نوێكردنەوە پێشكەش بكات و رەوانەی لیژنەی پشكنینی پزیشكی دەكرێت، ئەو كەسانەش پێویستە چەند بەڵگەنامەیان پێ بێت، وەك ناسنامە، ڕەگەزنامە، كارتی نشتیمانی، یان كارتی زانیاری.
رائید دلاوەر، ئەوەشی بۆ زاری كرمانجی روونكردەوە:" بە هۆی ئەم بارودۆخەی ئێستا كە بەهۆی پەتای كۆرۆنا هاتۆتە ئاراوە لە ماوەی پێشوو بۆ زیاتر لە دوو مانگ هیچ مامەڵەیەكی نوێكردنەوە و دەرهێنانی مۆڵەتی شۆفێری بۆ هاووڵاتییان راینەكراوە بە بڕیاری وەزارەتی ناوخۆ لە ڕێكەوتی ٦ــ ٣ ـ ٢٠٢٠ بۆ خۆپارێزی و ڕێگریكردن لە بڵاونەبوونەوە و تەشەنەكردنی ئەم پەتایە لە نێو كۆمەڵگەدا دواتریش پشووی فەرمی هەر بەم هۆیەوە لەسەرجەم دامودەزگاكان راگەیندرا".
بەرپرسی بەشی راگەیاند و هونەری لە بەڕێوەبەرایەتی هاتووچۆی سۆران گووتیشی:" تا ئێستا سیستەمی نۆرە پیادە نەكراوە، چونكە قەرەباڵغیەكی وامان لەسەر نییە، هەر كاتیك پێویستی كرد بەدڵنیاییەوە سیستەمی نۆرە پەیڕەو دەكەین".

زۆرترین بینراو