ماندووبوون لە هونەردا نییە

ژوان باقی


سروشت وا خوڵقاوە مرۆڤ پەیوەستی بێت، لەكاتێكدا مرۆڤ خودی خۆی بەشێكە لە شاكارەكانی سروشت، بوونەوەرێكی دەسەڵاتدارە بەسەر هەموو بوونەوەرەكانی تردا، كاتێك مرۆڤ ئاوێتەی سروشت دەبێت بە دەنگە جیاوازەكان و بە سەرجەم رەنگە جیاوازەكان، كە بەرگێكی ناوازەی بە بەری گەردوون داكردووە دەچێتە دۆخێكی فەنای، روانینی بۆ ژیان و بۆ هەستەكانی خودی خۆشی دەگۆڕێ، هەر ئەمەش وای لێدەكات، زۆر جیاوازتر رەنگەكان ببینێ وەك ئەوەی رەنگەكان لەگەڵی بدوێت و ئەمیش بە هێمنی گوێیان بۆ بگرێت.
دەكرێ رەنگەكانیش قسە بكەن، لەگەڵمان بدوێن، ئێمەی شێوەكاران گفتووگۆكانمان و دەربڕینی ناخمان، زیاتر لەگەڵ رەنگە لەڕێگەی ئەوانیشەوە تەواوی خۆشی و ناخۆشی و ئاستەنگییەكانی ژیانمان دەردەبڕین، ئاسوودەی خۆمان لە تابلۆگەكەمان، یاخود پێشانگایەك یا بینینی سروشتێكی پڕ لە رەنگ هەست پێدەكەین. دەكرێكت دەنگەكانیش جیاوازتر ببیستێ وەك ئەوەی گیانێك بە مردویەك ببەخشێت جەستە سارد بووەكەی دووبارە گەرم ببێتەوە پڕ بێت لە وزە و چالاكانە دەست بە ژیان بكاتەوە، دەنگی سروشت میوزیكێكی ئارام بەخشە كە شەكەتی مێشك و رۆح ناهێڵێ. ماندووبوون لە هونەردا نییە چونكە دەرونمان تینوی ئەو چێژەیە كە هونەر پێمان دەبەخشێت، دەكرێ بێزاری بەرامبەر هەرشتێك دەرببڕین، بەڵام نەشازە لە تێڕامانی تابلۆیەكی رەنگاوڕەنگ بێزار ببین، لە میوزیكێكی ئارام هەراسان بین. ژیان گەمەیەكە لە نێوان مرۆڤەكاندا، كاتێكیش لەم گەمەیەدا مرۆڤەكان ململانێكی سەخت لەگەڵ یەكتر دەكەن لە پێناو بەردەوامی و مانەوەیان و گەشتنیان بە خەونەكانیان كەسانێك هەن هەر بەو هەست و گیانە پاكەوە ئاوێتەی سروشت و جوانییەكانی گەردونن، خۆ ئەگەر كایەكانی ژیان وابووایە بە یەكتر قبوڵكردن و ڕێزگرتن لە بۆچونە جیاوازەكانی یەكتر و ڕەچاوكردنی خەونەكانی یەكتر، كە گرنگە لە پێناو بەرژەوەندییە تایبەتیەكانی خۆماندا، خەونی كەسانی تر لەناونەبەین ،خۆ ئەگەر بە ڕەنگەكان و دەنگی مۆسیقاوە ژیانمان كردبا هەرگیز ژیان هێندەی ئێستا سەخت و دژوار نەدەبوو ... لێرەدا مەبەستمە بڵێم هیچ شتێك نییە كە نەتوانین بیخەینە ژێر دەستی خۆمان و سنووری بۆ دانەنێین، دەتوانین كردارەكانمان ئاوەژوبكەینەوە لە پێناو خۆشتركردنی ژیانی یەكتر، ڕق بكەینە خۆشویستن و دژایەتییەكانمان بگۆڕین بۆ لەیەك تێگەشتن و قبوڵكردنی یەكتر. ئێمە دەتوانین ئەو شاكارە بخولقێنین، بەو جۆرە بژین یەكتر قبوڵبكەین، گوێ رادێرین لە بۆچوونە جیاوازەكانی یەكتر و ڕێز لە بیر و بۆچوونەكانی یەكتر بگرین ژیان چێژێكی زۆر جیاوازتری دەبێت، بەجۆرێك تەمەنا دەكەین كات بگەڕێنینەوە دواوە بۆ دووبارە خۆشویستنی هەموو بوونەكان.

زۆرترین بینراو