میراتی هامڵتۆن پێویستی بە خزمەت گوزارییە

میراتی هامڵتۆن پێویستی بە خزمەت گوزارییە

محەممەدباڵەك-سۆران: لەگەڵ هاتنی وەرزی گەرما، ناوچەگەشتیارییەكان جمەیان دێت لە گەشتیاران و گەشتیارێكی زۆر لە شارەكانی كوردستان‌و خوارووی عێراق ڕوو لەناوچەكانی گەشتیاری دەكەن، شاری سۆرانیش بەهۆی هەڵكەوتەی جوگرافی و بوونی چەندین ناوچەی گەشتیاری، گەشتیاران بۆ بەسەر بردنی كاتێكی خۆش ڕوو لەم ناوچانە دەكەن، بەڵام خراپی ڕێگای هامڵتۆن، گەشتیارانی ئەم ناوچانەی نیگەران كردووەو داواكارن ئاوڕ لەڕێگاوبانەكانی ئەو دەڤەرە بدرێتەوە.
سنووری دەڤەری سۆران و باڵەكایەتی و رواندز و مێرگەسۆر، رێژەیەكی زۆری ناوچەی گەشتیاری لە خۆ دەگرێت و دیارترینیان گەلی عەلی بەگ، بێخاڵ، شنگلبانە ، جوندیان، كۆڕەك تەلەفریك، سەكران، پڕژێ، زرارا ، دوورەمڵك، ئەمانە و دیان ناوچەی دیكەی گرنگی گەشتیاری هەیە و لەسەر ئاستی كوردستان و تەنانەت عێراقیش ناسراون . ساڵانە لە چوار وەرزی ساڵ، سەدان هەزار گەشتیاری نێو خۆی و بیانی روو لە ناوچە گەشتیاریەكانی دەڤەری سۆران دەكات، لە رێگەی گڕووپ و كۆمپانیا كانەوە گەشتیار دەهێندرێنە دەڤەرەكە .
هەندرێن رزگار، گەشتیارێكی خەڵكی شاری سلێمانیەو هاتۆتە سەیرانگەیەك لە وەرتێ‌ بەم شێویە بۆ زاری كرمانجی گووتی" ناوچە گەشتیارییەكانی ئێرە تابڵێی دڵگیرو خۆشن، بەڵام ڕێگاو بانەكانی وێرانەو بەكەڵكی بەكار هێنان نایەن، پێویستە ئەم ڕێگایە ئاوڕێكی جددی لێبدرێتەوە، چونكە لۆدێكی یەكجار زۆر لەسەر ئەم ڕێگایە هەیەو بەشێكی زۆری ئەم ڕێگایە كەندو چاڵی تێكەوتوە، كە سەردانی ئەم شارە ئەكەیت ئەبینی ئەم شارە چەندە فەرامۆشە لەڕووی خزمەتگوزاری، سیمای شار جوان و ڕێگاو بانەكانی وێرانن، ئێرە ناوچەیەكی گەشتیارییە، گوناهێكی گەوریە شەقامەكانی بەم شێوەیەبن ئومێدەوارین بەر پرسانی شاری سۆران ئەم ئاریشەیە چارەسەر بكەن‌و ڕێگاو بانەكان چاك بكەن".
بەختیار غالیب بەهەمان شێوە گەشتیارێكی ترەو لەگەڵ خانەوادەكەی هاتبونە هەوارگەی جوندیان ئەو بەم جۆرە بۆ زاری كرمانجی دەڵێت: "سۆران شارێكی دڵگیرو جوانەو خەڵكەكەشی بەرێزو میوان دۆستن، گەلێك هەوارگەو سەیرانگای خۆشی لێیەو لەڕووی پاك و خاوێنییەوە بێكێشەن، بەڵام خراپی بەشی زۆری ڕێگای هامڵتۆن، بەشێكی زۆری ئەم جوانیەی سۆرانی ون كردووە، شۆفێر ناتوانێ‌ بە ئارەزووی خۆی ئۆتۆمبێلەكەی لێبخوڕێت، چونكە بەشی زۆری شەقامەكان كەندو چاڵی تێدایە، بە تایبەت ڕێگای سۆران بۆ چۆمان و حاجی ئۆمەران تەواو وێرانە هیوادارن ئاوڕێك لەو شەقامە بدرێتەوەو نۆژەن بكرێتەوە".
موهیب ئەلشمری گەشتیارێكی خەڵكی خوارووی عێراقەو لەگەڵ چەند هاوڕێیەكی خۆی بۆ گەشت و سەیران هاتونەتە سۆران بەم شێوە بۆ زاری كرمانجی گووتی:"بەهۆی دڵگیری ئەم ناوچەیەو بوونی ئەمن و ئەمان لەم ناوچەیە، هەمیشە حەزدەكەم سەردانی ئێرە بكەم، بەڵام خراپی ڕێگاكان ترسی ئەوە دەخاتە دڵمەوە ئەترسم بە سەلامەت نەگێڕێمەوە شاری خۆم، داواكارم لە بەرپرسانی ئەم شارە، وێڕای دەستخۆشیم بۆیان بۆ ئەم هەموو رێزەو جوانیەی لەم شارەدا هەیە، بتوانن كێشەی خراپی ڕێگاو بانەكان چارەسەر بكەن".
ئەحلام، ئافرەتێكی دانیشتووی پاریزگای ئەنباڕە و لەگەڵ كۆمپانیایەكی گەشتیاری هاتوونە هەوارگەی بێخاڵی گەشتیاری و سەرقاڵی گرتنی وێنەی یادگاری بوو لە پاڵ شەپۆلەكانی ئاوی بێخاڵ و گرتنی وێنەكانم پێی راگرتوو لێم پرسی تاچەند دڵخۆشیت بەم ناوچە گەشتیاریانە لەوەڵامدا گووتی: " خەڵكی كوردستانی خۆشەویست هەقیانە هەرچی بڵێین سەبارەت بەجوانی‌وشیرینی خاكی خۆیان، هەموو ساڵێك لەوەرزی هاوین سێ‌ تا چوا جار سەردانی هەولێرو ناوچەگەشتیارییەكانی ئێرە دەكەم وەك بێخاڵ ‌و جوندیان و حاجی ئۆمەران و هتد....، بەراستی ئێرە دڵگیرە، لێرە زیاتر هەست بە ئارامی دەكەم لەوەی لە شاری خۆم بم، بەڵام بەداخەوە لەڕووی خزمەت گوزاری ڕێگاوبان بەشێكی زۆری پشتگوێ‌ خراوە هۆكارەكەشی نازانم بۆ، هیوادارین ئەم جوانیە هەربمێنێ‌، بەڵام بەداخەوە ڕێگاو بانەكان زۆر خراپن، بوونی ئەم هەموو سەیرانگایە لەم ناوچەیە‌و خراپە ئەم ڕیگایەش دوو ئاراستەی لەیەك دوورن پێویستە ڕێگاو بانەكان باش بن، وەك چۆن سەیرانگاكان باشترین خزمەتگوزاری ئەكەن ئاواش باشترین خزمەت گوزاری بكرێت بۆ ڕێگاو بانەكان".
ڕێباز عەلی، شۆفێركی بارهەڵگرەو رۆژانە لەڕێگای سۆران- چۆمان كار دەكات بەنیگەرانییەوە بۆزاری كرمانجی گووتی: "ڕۆژانە بەردەوام بەم ڕێگایە هاتووچۆ دەكەم، كاتێك لەماڵ دێمە دەرەوە بە تەمای گەرانەوەی خۆم نیم، چونكە بەشی زۆری ئەم ڕێگایە وێرانەو كەسیش خۆی بەخاوەنی نازانێت، ڕۆژانە بەردەوام لەم ڕێگایە ڕووداو ڕوو ئەدات و قوربانی و گیانی و زیانی ماددی بەر هاووڵاتییان ئەكەوێت، داواكارین لەحكومەتی هەرێمی كوردستان و قایمقامی چۆمان و سەرجەم بەرپرس و لایەنە پەیوەندیدارەكان ئاوڕێك لەم شەقامە بدرێتەوەو تا نەبۆتەوە بە وەرزی باران‌و سەرما نەبا چیتر خەڵكی ببێتە قوریانی".
بەختیار ئیبراهیم، شۆفێرێكی ترەو ئەو كە دووجار لە ڕێگای سەرەكی سۆران-حاجی ئۆمەران توشی ڕووداوی هاتووچۆ بووە بۆ زاری كرمانجی گووتی: " ئەم ڕێگایە بە ڕێگای مەرگ ناسراوە، چەندان قوربانی لێكەوتۆتەوە، دووجار لەم ڕێگایە بەهۆی خراپی و نۆژەن نەكردنەوەی تووشی ڕووداوی هاتووچۆ هاتووم و زیانی زۆرم بەركەوتووە، من ڕووی ئەم پرسیارەم لە لایەنی پەیوەندی دار دەكەم ئەم هەموو پارەی لە سزاو سەرپێچی و نوێكردنەوەی ساڵانەو دەرهێنانی مۆڵەتی شۆفێری وەر ئەگرن ئەچێت بۆ كوێ‌؟. كوا خزمەتگوزاری بۆ شەقامەكان، بۆچی دەبێ‌ هەر میللەت باجی ئەم كەم ‌و كوریانە بدات، هیوادارم لە سەرۆكی نوێی حكومەتی هەرێم ئاوڕێك لەم ناوچەیە بداتەوە و ئێمە لەم تەنگەژەیە دەرباز بكات".
بەپێی ئەو ئامارەی لە بەڕێوەبەرایەتی گەشت و گوزاری سۆران دەست زاری كرمانجی كەوتووە، تەنها لە ماوەی شەش مانگی رابردوودا، زیاتر 300 هەزار گەشتیاری نێوخۆی و شارەكانی عێراق و دەرەوەی كوردستان روویان لە ناوچە گەشتیاریەكانی دەڤەری سۆران كردووە .

 

زۆرترین بینراو