مەترسی سنوورەكان، هیچ جۆرە كارێكی كۆڵبەری لە حاجی ئۆمەران نەهێشتووە

مەترسی سنوورەكان، هیچ جۆرە كارێكی كۆڵبەری لە حاجی ئۆمەران نەهێشتووە

زاری كرمانجی-حاجی ئۆمەران: بەهۆی مەترسی بۆردومانی توركیا و تۆپبارانكردنی سنوورەكان، لە سنووری شارەدێی حاجی ئۆمەران دیاردەی كۆڵبەری بەڕێژەیەكی بەرچاو رووی لە كەمی كردووە و لە وەرزی زستانیش هیچ كۆڵبەرێك ناتوانێت لەم سنوورانە كاسبی بكات.
عەبدولوەهاب مەحموود، بەڕێوەبەری شارەدێی حاجی ئۆمەران، بە زاری كرمانجی راگەیاند: ماوەی دوو ساڵە هیچ جموجۆڵێكی كاری كۆڵبەری لە سنوورەكانی نێوان هەرێمی كوردستان و كۆماری ئیسلامی ئێران لە سنووری حاجی ئۆمەراندا نەماوە، پێشتر لە نزیك سنووری نێودەوڵەتی حاجی ئۆمەران كاری كۆڵبەری بە نیمچە فەرمی هەبوو، بەڵام ئێستا بەهیچ شێوەیەك كاری كۆڵبەری لەم سنورانە ناكرێت.
گووتیشی: لە رێگە نایاساییەكانیشدا ئێستا بەهۆی مەترسییەكانی سنوور و بەتایبەتی بۆردومانی فڕۆكە جەنگییەكانی توركیا و تۆپبارانكردنی سنوورەكان لەلایەن ئێرانەوە هیچ جموجۆڵێكی كاری كۆڵبەری بەدی ناكرێت، ئەمە جگە لەوەی لە وەرزی زستانیشدا ئەم سنوورانە هەمووی لەلایەن هەردوو سنوور لە هەرێمی كوردستان و كۆماری ئیسلامی ئێران بە توندی كۆنتڕۆڵكراون و چاودێرییەكی وردیان لەسەرە.
پێشتر لەنێوان سنوورەكانی حاجی ئۆمەران و خانێ، لە شێوەی كۆڵبەری و بە گواستنەوەی كەلوپەل بە ئەسپ جۆرەها كەلوپەلی نایاسایی لە هەرێمی كوردستانەوە دەگەیشتنە سنوورەكانی ئێران و هەزاران كاسبكاری كوردی شارەكانی رۆژهەڵاتی كوردستان لەم سنوورانە بەمكارەوە بژێوی ژیانیان دابین دەكرد، بەڵام زۆرێكیشیان بەهۆی تەقەی راستەوخۆی پاسدارانی ئێرانەوە ژیانیان لێ سەندرایەوە و بەشێكیشیان كەمئەندام بوون.

زۆرترین بینراو