نامەیەكی كراوە بۆ حامد زاملی عیسی

زیرەك كەمال

من كە ئەو نامەیەت بۆ دەنووسم نازانم لەكوێی، بەڵام لە هەر كوێیەك بی دڵنیام خەون بەوەوە دەبینی ببیتە ئەو مونەجیمەی كە هێزی لێدانی زەنگی ئاخیرەت و لەناوبردنی گەلی كوردت هەبێت، هەروەها دەشتەوێت بە ئیلهام وەرگرتن لە شیعرەكانی (عەبدولڕەزاق عەبدولواحید)ی شاعیری دەرباری (سەدام حوسین) و بە خەیاڵی وەشاندنی شمشێرە ژەنگاویەكەی زەڕقاوی، بیر لە لەناوبردنی كورد دەكەیەوە، یاخود لەگەڵ (عەبدولباری عەتوان) و (حنان فەتلاوی) دانیشتووی و گاڵتە بە كوردبوونی (سەڵاحەدینی ئەیوبی)ی دەكەیت، بەڵام من لە كوردستانم و دەشزانم خواردنەوەی پەرداخێك ژەهرت پێ خۆشترە لەوەی كە گوێبیستی ناوی كورد و كوردستان بیت. من لە وڵاتێكم كە گورگەبۆرەكان لە باكوور لموزیان لە جەستەی خوێناویم وەردەدەن و ئاگریان لەسەر پشتم كردووەتەوە، لە ڕۆژهەڵاتیش میراتگرانی سەفەوی، ڕۆژ نییە ملی ڕۆڵەیەكم بە پەتا نەكەن و لە باشوورەكەشی ئێوە دەتانەوێت بەسیاسەتی برسیكردن، چۆك بەئیرادەی دابدەن.
لە هەركوێیەك بیت دەمەوێت ئەگەر راگوزارانەش بێت، بەراوردێك لە نێوان خۆم وخۆت بكەم.
حامد زاملی:
تۆ نەوەی ئەو سیاسیانەی كە چوارسەد ساڵ حوكمی عوسمانیەكانیان لەسەر خاكی عێڕاق قبوڵكرد و بە شانازیشەوە بوونە بەشێك لە سوپای سوارە جلخوارەكانی حەمیدی. بەڵام من نەوەی باوك و باپیرانێكم كە لە پێناو ئێوەدا و لەسەر خاكی ئێوەدا (وەك خۆتان دەڵێن نەك من) لەشەڕی خاچپەرستان، سوپای نەسڕانیمان دەركرد.
تۆ نەوەی ئەو نوخبە سیاسیەی، كە سەد ساڵ پێش ئێستا قبوڵتان كرد بەریتانیای عوزما دەوڵەتێكتان بۆ دابتاشێت و ناوی (عێراق) لێ بنێت، دواتر ئێوەی كردە پاسەوانی پاراستنی بەرژەوەندیەكانی، بەڵام من نەوەی ئەو مەردانەم كە تا چاو هەتەر دەكات لە مێژوودا بەڕووی هەموو بێگانەیەكدا چراوگی خەباتیان لە گڕدابووە.
من خەباتگێڕی شۆڕشێكم، بەدرێژایی مێژوو دروشمەكەی دیموكراسی بۆ عێڕاق بووە، من گۆشكراوی شیعری (گۆران) شاعیری مەزنم كە دەیگوت:
برای عەرەبی چاوڕەشم
تاڵ بوو بەشت تاڵ بوو بەشم
بەڵام درووشمی ئێوە (امە عربیە واحدە) و (حوم اتبع لوجرینا) بوو.
پێم بڵێ (حامد زاملی) لاف و گەزافی چی بەسەر مندا لێدەدەی؟ كە تۆ زیاتر لە بیست دەوڵەتت هەبێت، بەڵام هەرێمێك بە من رەوا نەبینیت؟ دەزانم درەنگ تێدەگەی، بۆیە دیسان پێت دەڵێم دەزانی تۆكێی و من كێم؟
من بیست و نۆ ساڵ پێش ئێستا بە جەستەیەكی شەڵاڵ لە خوێن و بە دەم مارشی (ئەی رەقیب) لە چیاكانی خۆمانەوە بەرەو شارەكان دابەزین و دواتر جاڕی ڕاپەڕینماندا و بە سوود وەرگرتن لە بارودۆخی سیاسی نێودەوڵەتی ئەوسا، قەوارەیەكی سیاسی خۆماڵیمان دروست كرد، بەڵام تۆ و هاوشێوەكانت، كە لە هوتێلە پێنج ئەستێرەكانی ئەوروپا دانیشتبوون، لە ساڵی 2003 بەسەر پشتی تانك و فڕۆكەی ئەمریكا و بەریتانیا و فەڕەنسا هاتنەوە و هەر بە فەرمانی ئەوانیش بوونە پاشای بێ تاجی سەر عەڕشی كەلاوەی عێڕاق و بەبێ (پۆڵ بریمەر) نەتان دەتوانی پەنجە بە ئاودا بكەن! نازانم چیتر بڵێم؟ ئاخر ئێوە كەی لە زمانی قسە و گفتوگۆی هێمنانە تێگەیشتون تا ئێستا تێ بگەن؟
حامد زاملی، بەڵام بۆ مێژوو ئەوە دەڵێم، تۆ و هاوبیرەكانت ڕاستگۆن لە دوژمنایەتی كردنی گەلی كورد، چ لەژێر سایەی حوكمڕانی ڕەشی ئەو عێڕاقەی لە بیستەكانی سەدەی ڕابردوو بەریتانیا دروستی كرد، چ ئەو عێڕاقەی ئەمەریكا لە (2003) دروستی كرد، بەڵام ئەوە ئێمەی كوردین لە سەڵاحەدینی ئەیوبیەوە تاكو ئێستا بە دروشمی بێمانا و بێبەرهەمی دیموكراسی بۆ عێڕاق و درۆی سیاسییە درۆزنەكانتان بە ناوی برایەتی ئێوە هەڵخەڵەتاین.

اما البعد حامد زاملی:
دەزانم عەرەب وەكو هەر نەتەوەیەك، نەتەوەیەكی مەزنە، بەڵام كەم سیاسی عێڕاقی هەیە لە سەرەتای دروست بوونیەوە تاكوو ئێستا درۆزن و شۆڤێنی نەبوبێت.
تێبینی: حامد زاملی، چەند ڕۆژێك پێش ئێستا وتارێكی نووسبوو بە ناوی "الاكراد لملوم و لیس قوم".

زۆرترین بینراو