نرخی یەك مریشك زیاتر لە 100 دۆلاری ئەمریكییە

نرخی یەك مریشك زیاتر لە 100 دۆلاری ئەمریكییە

چەند هاووڵاتییەكی دەڤەری سۆران، رویان كردۆتە بەخێوكردنی جۆرە مریشكێكی ئەمریكی كە نرخەكەیان زیاتر دە بەرامبەر مریشكی خۆماڵییە.
سالار خالید، هاووڵاتییەكی دانیشتووی شاری سۆران، رایگەیاند " زۆر ئارەزووی بەخێوكردن و مامەڵە كردن بە پەلەوەی دەگمەنم هەیە كە زیاتر لە 6 ساڵە ئەم كارە دەكەم، لەئێستاشدا زیاتر لە (50) مریشك و كەلەشێری ئەمریكی دەگمەنم هەن، كە پێیان دەوترێت، (شامپۆن، لیمۆیی، شۆكی، كۆڵۆمبی، سەلەموون) كە نرخەكەشیان بەشێوەی سێتە واتە دوو مریشك و كەلەشێرێك لەبازاڕ نرخەكەیان نزیكەی 400 هەزار دینارە، هەروەها جووتی هێلكەی ئەم مریشكانەش زیاتر لە 15 هەزار دینارە".
ئەوەش ئاشكرا دەكات " كە ئەوانەی كاری بەخێوكردنی ئەم جۆرە مریشك و كەلەشێرانە دەكەن لەدەڤەرەكەدا ژمارەیان لە پەنجەكانی دەست تێپەڕناكات، چونكە بەدەستهێنانیان ئاستەمەو نرخەكەشیان بەرزە، بۆ نموونە من بۆ بەدەستهێنانی ئەم مریشكانە سەردانی چەندین شارو شارۆچكەم كردووە، بەتایبەتیش بۆ هێلكەكان بۆ ئەوەی دووبارە دای بنێنیەوە بۆ دەرهێنانی بێچووەكان، ئەم هێلكانەش بەشێوەی گرەنتی لە 15% دەفرۆشرێن بە موشتەرییەكان، ئەگەر كەمتر لەم رێژەیە بێچوەكان دەرهاتن پارەی موشتەرییەكە دەدرێتەوە، زیاتریش لە رێگەی ئامێری تایبەتەوە دەبێتەوە".
ئاماژەشی بەوەدا " خەڵكی زیاتر ئەم مریشك و كەلەشێرانە بۆ جوانی بەخێودەكەن و ئارەزوویانە نەك بۆ گۆشتەكەی، بۆنموونە زۆرجار وابووە مریشك یان كەلەشێرێكم لەسەر مردن بووە دڵم نەهێشتووە سەری ببڕم، كێشەی هەر مریشكێكیش لەوانە زیاتر لە 2 كیلۆ گرام دەبێت، هەروەها كێشی كەلەشێرەكانیش نزیكەی 4 كیلۆ گرام دەبێت، زیاتر خۆشمان چاودێریان دەكەین و لەكاتی هەستمان بەوەكرد مریشكە كانمان نەخۆشیان هەیە دەرمانی تایبەتیان بۆ دەهێنین و هەوڵی چارەسەریان دەكەین".
دەشڵێت " هاووڵاتی هەیە كاری بەخێوكردنی ئەم مریشكانە دەكات " بەهۆی بڵاوبونەوەی نەخۆشیەكی پەلەوەری و مردنی مریشكەكانی بەهۆی بەرزی نرخەكەیان بە ملیۆنان دینار زیانی بەركەوتووە، بەڵام سەرەڕای ئەمەش بەهۆی ئارەزووی خاوەنەكانیان لەسەر ئەم مریشكانە جارێكی دیكە پەیدای كردونەتەوەو لەسەر ئەم كارە بەردەوام بووە.

زۆرترین بینراو