هاووڵاتییان داوایی قەرەبووی‌ زیانەكانیان لە حكومەت دەكەن

هاووڵاتییان داوایی قەرەبووی‌ زیانەكانیان لە حكومەت دەكەن

یونس ئەمین-باڵەكایەتی: ساڵی ڕابردوو دوو لافاوی بەهێز سنووری باڵەكایەتی گرتەوەوە و زۆرترین زیانیش بەر شارەدێی سمیلان سەر بە قەزای چۆمان كەوتووە. لەو كارەساتە سرووشتیە كە یانێكی زۆری بە دوای خۆیدا هێنا، خەڵكێكی زۆر زەرەرمەند بوون و بەشێكی پڕۆژەكانی حكومەتیشی وێران كرد .
لافاوەكە بووە هۆی پەكخستنی رێگاو بانەكان و داڕمانی چەند پردێك و ژمارەیەك پڕۆژی ئاوی خواردنەوە وە پچڕانی تەزوی كارەبا لەم سنوورە، هەر لەم كارەساتە سروشتیە خەڵكی دەم ڕووبار و كەندەكان زیانێكی زۆریان پێكەوت و بووە هۆی خاپوربوونی ڕەز و باخەكان و كەرتی كشتوكاڵی لە ناوچەكە .هاووڵاتییانی باڵەكایەتی لە رێگەی زاری كرمانجی داوای قەرەبووی زەرەر و زیانەكانیان لە حكومەت دەكەن .
بەهرام بەكر یەكێكە لە هاووڵاتییە زەرەرمەندەكانی لافاوەكەی باڵەكایەتی بۆ زاری كرمانجی گووتی " لەگەڵ ئەم لافاوە گوندەكەمان زەرەرێكی زۆری پێكەوت هەر لە بناری چیای هەڵگورد تا دەگاتە گوندی جۆمبارۆك ئەوانەی لە دەم ڕووبار بوون هەموویان زیانیان پێكەوت، هەر لە گوندی ئاشیبێكۆر بەهۆیلا لافاو خاپوور بوون و پڕۆژەی ئاوی خواردنەوەمان تێكچوو، لە هەمان كات زیپانی زۆر بەر كەرتی كشتوكاڵی كەوتوە .
زیاتر گووتی " بەپێی خەملندنەكانی لایەنە پەیوەندی دارەكانی ناوچەكەمان، زەرەر و زیانەكانم بە (8) هەشت ملیۆن دینار خەملێندراوە و دووای تێپەر بوونی ماوەی ساڵێك كەسمان قەرەبوو نەكراینەوە، تەنها دوای لافاوەكە لێژنێك هاتوو ناو نووس كرانین و تاوەكو ئێستاش هیچ دیار نییە، هیوادارم حكومەت خێرا بكات لە بە جێگەیاندنی داوای هاووڵاتییان.
لە ئەنجامی لافاوەكەی باڵەكایەتی، سێ مزگەوت و ژمارەیەك دووكان ژێر ئاو كەوتن، هێشتا شوێنەواری ئاسەوارەكە لە ناوچەكە ماوە و حكومەت قەرەبووی هاووڵاتییانی نەكردۆتەوە .
نزار مەلا جەلال پیشەی پارێزەرە و دانیشتوی گوندی پیرئۆمەرە و یەكێكە لە زیانمەندەكانی لافاوەكە بە زاری كرمانجی گووت " بۆ سێیەم جارە كارەساتی سرووشتی لەم شێوەیە ئەم سنورە دەگرێتەوە و لە ساڵەكانی 2006 ، 2009 ، 2018 لافاوی گەورە لە ناوچەكەمان درووست بووە و هەموو لافاوەكانیش زەرەر و زیانی گیانی و مادی بە دوای خۆیدا دەهێنێت.
زیاتر گووتی " بەهۆی لافاوەكە زیانی زۆری ماددیمان پێكەوتووە و تا ئێستاش هیچ كەسێك قەرەبووی زیانەكانی ئەم لافاوەی نەكردووینەتەوە، زیانەكانی گشتی كە بەر ئەم سنورە كەووت بریتی بوو لە داڕمانی پرد و سەرچاوەكانی ئاو و مزگەوت و ڕێگاوبانەكان، بەڵام بەداخەوە تاوەكو ئێستا پردەكان چاكنەكراینەوە ئاسەواری لافاو هەر بەم سنورەوە دیارە ئەگەر بێت و ببێتە وەرزی باران بە دلنیایەوە زەرەری زیاتر بە دوای خۆیدا دەهێنێت .
هەرێم مەلا فەقێ هاووڵاتییەكی دانیشتووی ناحیەی سمیلانە و زۆرترین زیانی پێگەیشتووە بە زاری كرمانجی گووت " زۆرترین زیانمان بەهۆی لافاوی ساڵی 2018 پێكەوتوە و سۆپەر ماركێتێك كە پڕ بوو لە كەڵ و پەل و دەڕاب و كەل و پەلە كارەبایەكانی دوكانەكە و بینا و سەرچاوەی ئاو و رەز و باخێكی زۆر زیانی پێگەیشتووە و بە زیاتر لە 265 وەرەقە دۆلاری ئەمریكی دەخەملێندرێت .
ئەو هاووڵاتییە دەڵێت" ساڵی ڕابردوو دووجار دووكانەكەمان ژێر ئاو كەوت، زۆر زیانی ماددیمان پێكەوت و لێژنەی خەملاندنی زەرە و زیانەكان لە نزیكەوە ئێمەی بەسەر كردەوە، بەڵام بۆ قەرەبوو چارەنووسمان دیار نییە! و زۆریش مەغدوورین، ئەوەی زیانی زۆری بە ئێمە گەیاند ئەم پردەی پێش ماڵی ئێمە بوو، كە بۆ رووبارەكە زۆر بچووكە و بووە هۆی پنگانەوەی ئاوەكەو گڵدانەوەی پاشماوەی لافاو، بۆیە لە رێگەی زاری كرمانجی داوا لە حكومەت دەكەین چارەسەرێك بۆ ئەم پردانە بدۆزێتەوە و بكرێنە پردی ئاسن و هەوای بۆ ئەوەی بە ئاسانی لافاوەكەی پێدا تێپەر بێت. داواكاریشین قەرەبووی بەشێكی زیانەكانمان بكەنەوە .
لەلای خۆشیەوە، فەیسەل ئالانی بەرێوەبەری ناحیەی سمیلان بە زاری كرمانجی راگەیاند" ساڵی ڕابردوو بە هێزترین لافاو لە سنووری سمیلان درووست بوو و زەرەر و زیانی زۆری بە خەڵك و پڕۆژە و خزمەتگوزاریەكانی میری گەیاند، ساڵانە لافاو لەم سنوورە دروست دەبێت و لە ساڵانی ڕابردوو وە پار ساڵ دووجار لافاو هات، بۆ ئەم مەبەستەش ئێمە هەر زوو لێژنێكمان پێك هێنا بۆ ناونوسینی خەڵك و ئەم زەرەرەی بەر ئەم دڤەرە كەوتووە و سەرجەمی خەملێندراوە و هەرچی زەرەر و زیانە دەرخستەی بۆ كراوە و بەرزمان كردیتەوە بۆ سەروی خۆمان .
بەڕێوەبەری ناحیەی سمیلان گووتیشی " لە نزیكەوە پارێزگاری هەولێر ئاگادار بووە، جێگری پەرلەمانی بەغدا خۆی هات و ئەم زەرەر و زیانانای دڤەری باڵەكایەتی بینی و بەڵێنی دا كار لەسەر قەرەبوو كردنەوەی هاووڵاتییان بكات .
گووتیشی " لە كاتی هاتنی لافاوەكە تەنها لە سنووری ئێمە نزیكەی شەش پرد دارمان و وێران بوون، بەڵام هەر زوو پردەكان بە شێوێكی كاتی دروست كرانەوە، ئێمە داوامان كرد ئەم پردانە بگۆردرێن بۆ پردی ئاسن پردی هەوای، بۆ ئەوەی هەموو ساڵێك هەر لەگەڵ لافاوێك پردەكان دانەڕمێن و نەكیرێن، ئێمەش چاوەرێین كە بەزووترین كات پردی ئاسن دروست بكرێت و ئەو هاووڵاتییانیش قەرەبوو بكرێنەوە كە زەرەرمەند بوون .

زۆرترین بینراو