پێشمەرگایەتی بۆ من شەڕەفێكی مەزن بووە

پێشمەرگایەتی بۆ من شەڕەفێكی مەزن بووە

بەرەڤان شاكر سلێمان لاچ- پیرمام:
گەلی كورد یەك لەو نەتەوانەیە كەوا هەردەم شانازی بە خۆڕاگری و بەرخودانی خۆیەوە دەكات، كورد هەردەم شانازی بەو كەسانەوە دەكات كەوا رۆژانێك خۆیان تەرخانكربوو، بۆ بەرخودان و هەوڵدان بۆ بەدەستهێنانی ئازادی بۆ كوردستان.
لەم ژمارەی هەفتەنامەی زاری كرماجیدا مەبەسمانە باس لە چەند وێستگەیەكی ژیان و خەباتی ( نەجات شێخ لاچ ) بكەین.
نەجات شێخ لاچ، لە ساڵی 1958 لە دەڤەری مزوری باڵا لەدایك بووە، لە تەمەنی منداڵییەوە دەكەوێتە بەر خوێندن و تا پۆلی شەشی سەرەتایی دەخوێنێت، دواتر لەبەر بارودۆخی خۆی و خێزانەكەی ناچاردەبێت واز لە خوێندن بێنێت.
هەر لە تەمەنی منداڵییەوە دوو مامی نەجات شێخ شەهید دەبن، ئەمە جگە لەوەی لە بنەماڵەكەیدا چەندین شەهید و پێشمەرگەی تر هەبوون، بارودۆخی كۆمەڵایەتی وادەكات نەجات شێخ هەستی نەتەوەیی لای گەڵاڵە دەبێت.
لە ساڵی 1978 لەلایان حكومەتی عێراقەوە نەجات شێخ و تەواوی خەڵكی گوندەكەی دەگوازرێنەوە بۆ كۆمەڵگە زۆرەملیەكان.
لەم بارەیەوە نەجات شێخ دەڵێت: دوای ئەوەی ڕاگوێزراین بۆ كۆمەڵگەی زۆرەملی قۆشتەپە، هەر زوو زانیم من ناتوانم لە ژێردەستی بژیم، بۆیە پەیوەندیم بە رێزەكانی پارتی دیموكراتی كوردستانەوە كرد لەگەڵ رێكخراوی ئاراس. دوای دەسپێكردنی شەڕی عێراق و ئێران بڕیارمدا بچمە رۆژهەڵاتی كوردستان و لەوێ ببمە پێشمەرگە، چونكە ئەو كات سەركردایەتی شۆرش لە رۆژهەڵاتی كوردستان بوو،دوای بڕینی رێگایەكی درێژ گەیشتمە كەتینە، دواتر لە رێگای گەلیێ ڕەشە بە ناو خاكی توركیاوە تێپەریم و گەیشتمە ئۆردوگای زێوە. لەوێ لە هێزی عەلی خەلیل دەستم دایە پێشمەرگایەتی و بۆ رۆژێكیش لە پێشمەرگایەتی دانەبڕاوم.
سەبارەت بە ژیانی ئاوارەیی نەجات دەڵێت: دوای ئەوەی خۆم گەیاندە رۆژهەڵات منیان گواستەوە بۆ تەهران و مازندەران، دواتر گوازرامەوە بۆ ڕەزاییە و لەوێ نیشتەجێ بووم، ئەگەرچی رۆژانێكی سەخت و دژواربوون، چونكە ئێمە لە ژیانی ئۆردوگا و دوورە نیشتیمانی رانەهاتبووین، بۆیە گەلێك ماندوبووین.
سەرەڕای ئەوەی لەوێ كارم دەكرد، بەردەوامیش ئامادەبووم بۆ بەجێگەیاندنی ئەركی پێشمەرگایەتی، هەر كاتێك ڕایان سپاردبامایە بۆ كارێك ئەوا زۆر بە دڵخوشییەوە بۆی دەچووم، وەك لاوێكی خوێن گەرم زۆر جار دەهاتین بۆ باشووری كوردستان، هەڵبەت ئێمە لەلایان حكومەتی عێراقەوە داواكراوبووین، ئەگەر دەستگیركراباین ئەوا بێ دوو دڵی لە سێدارەیان دەداین.
جارێك لەگەڵ چەند پێشمەرگەیەك هاتین بۆ كۆمەڵگەی زۆرەملی گۆڕەتوو، لەوێ دەبوایە نزیكەی 10 خێزان بگوازینەوە بۆ رۆژهەڵات، لە ڕێگا حكومەتی عێراق بەڕومانەوە هات و شەڕ لە نێوان ئێمەدا دروست بوو، ئێمە دابەشبووین بۆ سەر دوو بەش، بەشێكمان دەبوایە ئەو خێزانانە بگوازنەوە، بەشێكی تریشیان دەبوایە بەرپەرچی سەربازە عێراقییەكان بدەنەوە و خافلیان بكەن، بۆ ئەوەی ئەو خێزانانە بە سەڵامەتی دەربازببن، ئێمە تەقەیەكی كەممان دەكرد و حكومەت بە هەموو جۆرە چەكێك وەڵامی دەداینەوە، بەڵام پێشمەرگە و ئەو خێزانانە بەسەڵامەتی دەربازبوون.
لە ساڵی 1986 بە فەرمانی سەركردایەتی چۆمە گەلیێ رەش و ماوەی ساڵێك لەوێ ماینەوە، لەوێ دەبوایە هەموو ئەو ئەركانە زۆر بە وریایەوە بەجێ بگەینین كە پێمان سپێرابوو، تەنانەت خۆمان لە خەڵكی ئاسایش بەدور دەگرت.
نەجات شێخ یەك لەو پێشمەرگانەیە كەوا هەمیشە ئامادەی
بەجێگەیاندنی ئەرك و فەرمانەكان بووە، هەر وەك خۆی باس لە بەشداریكردنی لە داستانی خواكوڕك دەكات و دەڵێت: لەگەڵ چەند پێشمەرگەیەك چووین بۆ قەسری شرین، 45 رۆژ لەوێ ماینەوە، دواتر لە ساڵی 1988 چووین بۆ ناوچەی نازدارا داخ، لەوێ شوێنی خۆمان گرت و چاوەڕێی هاتنی سەربازە عێراقییەكان بووین، ئێمە ژمارەمان كەم بوو و دابەشبووین بۆ سەر چەند شوێنێك و هەموو رێگا سەرەكیەكانمان گرت بوون، شەو ئێمەیان دابەشكردین، هەر چەند پێشمەرگەیەك پێكەوە لە شوێنێك دەبووین، زانیاری هەبوون لەوەی حكومەتی عێراق هێرش دێنێت، بۆیە چاوەرێی دەستپێكردنی شەڕبووین، هەمان شەو یەكەم هێرشی حكومەت بۆ سەر ئێمە دەستیپێكرد، زۆر بە توندی وەڵاممان دانەوە، حكومەت هەر زوو پاشەكشێی كرد و كشایەوە، لە هەمان شەو و تا بەیانی حكومەت سێ هێرشی بۆ سەر ئێمە هێنا، بەڵام بەجورێك وەڵاممان دانەوە كەوا ئەو شەڕە ناونرا بە داستانی خواكوڕك، ئەگەرچی چەكی ئێمە زۆر سادەبوو، بەڵام شەڕی مان و نەمانمان كرد و توانیمان تا بەیانی ژمارەیكی زۆری سەربازی عێراقی بكوژین، ئەمە جگەلەوەی چەند دیلێكمان دەستگیركرد و دەستمان بەسەر رێژەیەكی زۆری چەك و تەقەمەنیدا گرت، من لەو شەڕەدا بە سەختی برینداربووم، بۆ چارەسەری بەڕێكرام بۆ ئۆرمییە، دوای ماوەیەك لە مانەوە لە نەخۆشخانە هاتم بۆ بارەگای ئێزگەی دەنگی كوردستان و لەوێ ماینەوە تا ساڵی 1991.
لە رۆژی 8-8-1991 بەیاوەری نێچیرڤان بارزانی هاتین بۆ رێگای پێنجوین، رۆژی دواتر گەیشتینە سەرچنار و ماوەی 15 رۆژ لەوێ ماینەوە، دواتر چووین بۆ دەربەندی بازیان، لە دەربەندی بازیان حكومەت بە تۆپ و فرۆكە هێرشی بۆ سەر ئێمە هێنا، پێشمەرگە لێكدابڕا و ئێمە چووینە چیای پیرەمەگروون، دوای شەشە رۆژ گەیشتینە كارێزە و هەموو هێزەمانمان بەیەك گەیشتنەوە و دواتر هاتینەوە بۆ هەولێر.
لە پڕۆسەیە رزگاركردنی عێراقدا نەجات شێخ بەو پەڕی تواناووە بەشداری دەكات، بەهۆی زۆری رێژەی برینەكانی لە ساڵی 2004 و لەسەر فەرمانی سەرۆك بارزانی دەكرێتە پێشمەرگەی پەككەوتوو.
دوای هاتنی چەكدارانی داعش بۆ سەر كوردستان، نەجات شێخ خۆی دەگەینێتە سەنگەرەكانی بەرگری و بەشداری لە پاراستنی كوردستان دەكات.
لە كۆتای دیدارەكەماندا مام نەجات شێخ گووتی: بە راستی پێشمەرگایەتی بۆ من شەڕەفێكی مەزن بووە، هەردەم و لە هەر شوێنێك بۆبیت من ئامادەی بەرگریكردن بۆمە لە خاك و وڵاتی خۆم.
بۆمن جێی دڵخۆشییە كەوا دەبینم ئێستا كورد خاوەن هێزی نیشتیمانییەو زۆر بە ئازادی دەژیت، بۆیە دەبێت هەموو لایەك ئەم دەستكەوتە مێژووییە بپارێزین و هەوڵ بۆ دروستكردنی دەوڵەتی سەربەخۆی كوردستان بدەین. هیوام وایە هەموو لایەك بە پاراستنی كوردستان رێز لە خەبات و ماندوبوونی ئێمە بگرێت.

زۆرترین بینراو