پێگەی كورد دوای گۆڕانكارییەكانی عێراق

فریاد ئێروانی

خۆپیشاندانەكانی عێراق ماوەی چەند ڕۆژە دەستی پێكردووە و لە كۆی 14 پارێزگای عێراق لە 9 پارێزگا خۆپیشاندەران هاتوونەتە سەر شەقام و توندوو تیژی زۆری لێكەوتووەتەوە، بە جۆرێك زیاتر 250 خۆپیشاندەر بە گوللەی هێزە چەك بەدەستەكانەوە كوژراون و زیاتر لە 12 هەزار كەسیش بریندارن.
ڕەنگە هۆكاری بەرچاو و دیاری خۆپیشاندانەكان گەندەڵی و دانەمەزراندن و بێكاری و خراپی دۆخی ئابووری و خزمەتگوزارییەكان بێت، بەڵام ئەم هۆكارانە تەنها ڕووكەشن و چەندین ساڵە بوونی هەیە و تازە نین، بۆیە هۆكاری ڕاستەقینەی خۆپیشاندانەكان پەیوەندی بە ململانێی ووڵاتانی زڵهێز و ناوچەكەوە هەیە.
ئەگەر رووداوێكی زۆر گەورە نەقەومێت، زۆرترین ئەگەری زنجیرەی هەنگاوە لەبەرچاوەكانی عێراق لەمڕۆ بە دواوە ئەمانەن " وازهێنان یان وەلانان و واز پێ هینانی پلە باڵاكان بە هەموویانەوە، هەڵوەشانەوە یا سڕكردنی پەرلەمان، دانانی حكوومەتێكی لەناكاو یا نائاسایی، هەموار كردنەوەی یاسای هەڵبژاردن، ئەنجامدانی هەڵبژاردنی پێشوەختە، هەمواركردنەوە یا دووبارە نووسینەوەی دەستور".
ئەگەر لە ڕوانگەی بەرژەوەندی كورد لەم قۆناغە و گۆڕانكارییە چاوەڕوانكراوەكان قسە بكەین ئەوە بە كورتی و پوختەكەی هیچ هەنگاوێك لە بەرژەوەندی كورددا نییە، واتە بەگشتی هەر گۆڕانكارییەكی چاوەڕوانكراو هەڵوێست و پێگەی كورد دەخاتە مەترسییەوە و لەسەرجەم بوارەكاندا دوارۆژێكی نادیار و سەختی لێدەبیندرێت و ئەگەری دووبارەی ناوەندێتی زۆر بەهێزە نەك بەم جموجوڵ و چالاكیانەی نێوخۆی عێراق بەتەنها بەڵكو بە بۆچون و كار و هەوڵی وڵاتانی دەوروبەریش.
جا ئەو بەشبەشێنەی كە كوردی تێدابوو، بە شێنەیی وەك پێشتری لێدەێتەوە و مەگەر كوردێكی پاشكۆی ناوەند ببینیت رۆڵی كاریگەری هەبێت لە بەغدا، ئەگینا لامەركەزیت لەچاڵ دەندرێت، لەبەر ئەوەی واز پێ هێنان و دەركردنی لەمەودوا سەرجەم پۆستەكانی كوردیش دەگرێتەوە و جگە لە شیعە سوونەش ئەمجارە بە پوختی بە پشتگیری وڵاتانی هاوپشتی دەورووبەری لە دوورەوە و بەجیا لەوكاتەی سەرەتای روخانی سەدام تا ئێستا خۆی مەلاسداوە و ئەگەری ناوەندێتی لە قازانجی پێكهاتەی عەرەب بەتەنها دەكەوێتەوە.
پاش دەركردنی ئەو بڕیارانەی پەیویستن بۆ ناوەندگەرێتی عێراق، پەرلەمان بەخۆی هەڵدەوشێتەوە یا سڕدەكرێت و ئەمەش حكومەتی لە ناكاوی كاتی خۆی دەسەپێنێت كە دەرئەنجامەكەی زاڵبوونی ناوەندە و تەنانەت هەمواركردنەوەی یاسای هەڵبژاردن بە شێوەیەك دەبێت كە كورد كەمینەیەكی بێ كاریگەر دەبێت لە پەرلەمان و رۆڵی لە یاسا گرنگە دواخراوەكان نامێنێت و مادەی 140 فت دەبێت و چارەنووسی ناوچە دابڕاوەكان دەكەو‌ێتە سەر شاخی حوكمی بەغداوە، كە هەڵبژاردن بكرێت زیاتر رێگە بۆ ئەوە دەچێت كە نەتەوەپەرستەكان زاڵبن و لە هەمواركردنەوە یا دووبارە نووسینەوەی دەستووری عێراق، یەكەم لایەن كورد زەرەر دەكات و تەنانەت فیدراڵێزمیش دەكەوێتە بەردەست قەدەری ناوەند گەراكانەوە.
بۆیە كورد لەم كاتەدا لە دووریانێكی مەترسیدار دایە و لەنێو خۆشیدا ئەم حاڵە بێفەڕەی هەیە، كە ئەگەر بارودۆخەكە هەستیار نەبێت، هێشتا بەردەوامن لە ململانێ پۆست و پاوانخوازی و زاڵ كردنی هەژموونی حزبی، بۆیە پێویستە لایەنەكان لە دۆخێكی وەك ئەمڕۆ پڕ لە مەترسی، كە دەشێ كیانی سیاسی هەرێم لەبەردەم هەژانێكی روخێنەردا بێت، بیر لە پتەوتر كردنی پەیوەندییەكانیان بكەنەوە، لە ئێستاوە هەنگاوی خۆدپارێزی بنێن، بەربەستی یاسایی لەبەردەم ئەگەرە نەخوازراوەكانی بەغدا دانێن، هەر وەها پاڵپشتی نێودەوڵەتی بەهێزتر بكەین. لە ئێستاوە هەنگاوە دیپلۆماسییەكان بە هێزەوە دەست پێبكەین و پێشبینی هەر ئەگەرێك بكرێت.

 

زۆرترین بینراو