چەند بازگەیەك لەسەر رێگاكان دانراوە بۆ چاودێری كردنی پێویست

چەند بازگەیەك لەسەر رێگاكان دانراوە بۆ چاودێری كردنی پێویست

د. ئەحمەد حەسەن، بەڕێوەبەری تەندروستی چۆمان، لە دیمانەیەكی زاری كرمانجیدا باس لە دوایین ئاماری هاتنی گەشتیاران لە دەروازەی حاجی ئۆمەران و گرتنەبەری دوا پێشهات و رێوشوێنەكان بەرانبەر بە پێشگرتن لە بڵاوبوونەوەی ڤایرۆسی كۆرۆنا دەكات، راشی دەگەیەنێت " هیچ گەشتیارێك بە رێگای قاچاغ لەم سنوورە نەهاتۆتەوە سنووری هەرێم و رێكاری توندیشمان بۆ ئەو شۆفێرە ئێرانییانە گرتۆتەبەر كە بارەكانیان دەگەیەننە شارەكانی هەرێمی كوردستان".
دیمانە: زاری كرمانجی- چۆمان
د. ئەحمەد حەسەن بە زاری كرمانجی راگەیاند" ئێمە لە رێكەوتی 2-2-2020 تیمێكی تایبەتمان لە دەروازەی سنووری حاجی ئۆمەران داناوە بۆ پشكنینی تایبەتی ڤایرۆسی كۆرۆنا بۆ ئەو گەشتیارانەی لە وڵاتی ئێران دەگەڕێنەوە هەرێمی كوردستان، وە لە 21-2-2020 كە هاتووچۆی گەشتیاری لە سنوورەكان داخران، تیمەكەی ئێمە بە هاوكاری بەڕێوەبەرایەتی تەندروستی هەولێر بەهەموو پێداویستییەكی پزیشكی زۆر بە چڕی كارەكانیان ئەنجامدا و رێكارەكانمان لەم سنوورە توندوتۆڵتر كرد بۆ پشكنینی گەشتیاران، تا ئێستاش نزیك بە 850 گەشتیاری هەڵگری پاسپۆرتی عێراقی لەم سنوورە هاتوونەتەوە هەرێمی كوردستان و پشكنینی سەرەتاییان بۆ ئەنجامدراوە و رەوانەی شوێنی تایبەت كراون بۆ كەرەنتینە كردن و ئێستا لەژێر چاودێری پزیشكیدان".
گووتیشی" گەشتیارەكان بۆ سۆران و رواندز و شەقڵاوە و تەنانەت هەولێریش گواستراونەتەوە و ئەو گەشتیارانەی كە بۆ مەبەستی چارەسەری نەخۆشی سەردانی ئێرانیان كردبوو و نەشتەرگەریان بۆ ئەنجامدراوە بە ئۆتۆمبێلی ئەمبوڵانس گواستراوەتەوە و لە شوێنی چاودێریش پزیشكی تایبەت چاودێری دەكات، لە سنووری حاجی ئۆمەرانیش بەهەموو شێوەیەك هەموو پێداویستییەكیان بۆ دابینكراوە".
بەڕێوەبەری تەندروستی چۆمان، كە هاوكات سەرپەرشتی تیمی پشكنین لە سنووری حاجی ئۆمەران دەكات، سەبارەت بە دەستپێكردنەوەی بزاوتی بازرگانی و هاتووچۆی شۆفێرانی هەرێمی كوردستان بۆ نێوبازاڕی تەمەرچیان و گەڕانەوەیان، لەگەڵ هاتنی شۆفێری ئێرانی بە رێگای ترانزێت رایگەیاند" تیمەكەی ئێمە لە گەراجی لۆریە بارهەڵگرەكانیش كەلوپەلی پێویستی خۆپارێزی وەك دەمامك و دەستكێش بەسەر شۆفێرانی هەرێمی كوردستان دابەشكردووە، وە رێنماییان پێدوان كە نزیكی كەسانی ئێرانی نەكەون لە دیوی ئێران تا بارەكانیان دەگوازنەوە، چونكە ئەوانە بەركەوتنی زیاتریان لەگەڵ كەسانی ئێرانی هەیە و پێمان راگەیاندوون كە دەبێت زۆر بە باشی خۆیان بپارێزن و رێنماییەكان جێبەجێ بكەن بەوەی كە لێیان دوور بن و بەهیچ شێوەیەك بەركەوتنیان لەگەڵیاندا نەبێت، كە دەگەڕێنەوەش بەهەمان شێوە پشكنینیان بۆ ئەنجام دەدرێتەوە، سەبارەت بە شۆفێرانی ئێرانیش كە كاڵا و شتومەك بە رێگای ترانزێت دەگەیەننە شارەكانی هەرێمی كوردستان، بەراستی ئەوە كێشەیە، بەپێی رێنماییەكانی وەزارەتی ناوەخۆ و تەندروستی رێگایان پێدراوە، كە پشكنینیان بۆ بكرێت و وە رێنمایی لەلایەن تیمەكانی ئێمەوە وەردەگرن كە نابێت تێكەڵی خەڵك بن و بچنە نێو سەنتەری شارەكان، تەنها بارەكانیان دەگەیەننە شوێنی مەبەست لە دەرەوەی شارەكان و دەگەڕێنەوە ئێران".
سەبارەت بە دەنگۆی هاتنەوەی گەشتیاران بە رێگای قاچاغ، ناوبراو گووتی" لایەنە ئەمنی و ئیدارییەكانی سنوورەكە بە هاوكاری هێزی پاسەوانی سنوور و هێزی زێرەڤانی، چەند بازگەیەكیان لەو شوێنانە داناوە كە رێگای قاچاغیان پێدا رەتدەبێت، هەموو رێكارێكی توند گیراوەتەبەر و تا ئێستاش هیچ گەشتیارێك لەم رێگایانەوە رادەستی ئێمە نەكراوە كە پشكنینی بۆ بكەین، تەنها لە چوارشەممەی رابردوو كۆڵبەرێكی دانیشتووی رۆژهەڵاتی كوردستان بەهۆی هەڵدێرانی لە شاخ بریندار بوو، ئێمەش لە بنكەی تەندروستی حاجی ئۆمەران چارەسەری فریاگوزاریمان كرد و گەڕێندرایەوە وڵاتەكەی".
سەبارەت بە دوا وادەی كارەكانی تیمی تەندروستی لە دەروازەی نێودەوڵەتی حاجی ئۆمەران، بەڕێوەبەری تەندروستی چۆمان گووتی" هەتا گەشتیار لە دیوی ئێران مابن، ئێمە پشكنین بۆ گەشتیاران دەكەین، كاتێكیش رێژەی گەشتیاری عێراقی لە ئێران تەواو بوو، ئێمە بۆ پشكنینی شۆفێری كامیۆنەكان لەم دەروازەیە كارەكانمان بەردەوام دەبێت بۆ پشكنین و پێدانی رێنمایی بۆ پێشگیری لە بڵاوبوونەوەی ڤایرۆسی كۆرۆنا، بەپێی رێنمایی رێكخراوی تەندروستی جیهانی تا ئەو پەتایە هەڕەشە بێت لەسەر وڵاتان و دانیشتووانی جیهان، ئێمە لەچوارچێوەی رێنماییەكانی ئەنجوومەنی وەزیران و وەزارەتی تەندروستی حكوومەتی هەرێمی كوردستان كارەكانمان بەردەوام دەكەین".

 

 

زۆرترین بینراو