چەند وێستگەیەكی ژیان و خەباتی  پێشمەرگەی شۆڕشی ئەیلول و گۆڵان خەسرو عەلی عەزیز

چەند وێستگەیەكی ژیان و خەباتی پێشمەرگەی شۆڕشی ئەیلول و گۆڵان خەسرو عەلی عەزیز

خەسرو عەلی لە 1-7-1957 لە گوندی مەمویدان لە دەڤەری مزوری باڵا لە دایكبووە، هەر لە تەمەنی منداڵی خۆی ئاشنای كاری شۆڕشگێری و بەرخودان دەبێت، ئەمەش لەبەر نزیكی لە مام و ئاموزایەكانی كەوا لە بنەماڵەدا بە قۆڵای چوبوونە ناو شۆڕشی كوردستاندا، هەر بوویەش هەر لە تەمەنی 15 ساڵیدا خەسرو عەلی چەكی شەڕەف لە شان دەكات و پەیوەندی بە رێزەكانی هێزی پێشمەگەی كوردستانەوە دەكات، لەبەر بچوكی تەمەنی رێگەی پێنەدراوە بەشداری لە هیچ شەر و داستانێك بكات، بەڵام هەردەم وەك پێشمەرگە ئارەزوی بەشداریكردنی لە شەڕ و داستانەكاندا كردووە.
دوای پەیوەندی كردنی بە رێزەكانی پێشمەرگە زۆری نەكێشا زۆربەی وڵاتانی رۆژهەڵاتی ناوەراست خیانەتیان لە شۆڕشی كوردستان كرد و رێككەوتننامەی جەزائیر ئەنجامدرا، هەڵبەت رێككەوتنی جەزائیر لە نێوان شای ئێران و حكومەتی عێراق كرا، لە پێناو لە ناوبردنی شۆڕشی كوردستان.
خەسرو عەلی یەكێك دەبێت لەو پێشمەرگانەی كەوا نەیویستووە چوك لە بەردەم حكومەتی عێراق دابدات، بوویە بڕیاری چوون بۆ رۆژهەڵاتی كوردستان دەدات بۆ ماوەیەكی زۆر ئاورە دەبێت، بەڵام خەسرو عەلی یەكێك دەبێت لەو پێشمەرگانەی كەوا ناو بەناو و بە ئامانجی ئەنجامدانی كار و چاڵاكیەكانی شۆڕش دەگەڕایەوە بۆ باشووری كوردستان.
نەجات شێخ هاورێ و هاوسەنگەری نزیكی خەسرو دەڵێت: خەسرو تەنزیم داخلی بوو و ئاشكرا بوون، دواتر لە ترسی كەوتنە ناو دەستی حكومەت رێگای رۆژهەڵاتی گرتە بر، بە پێ لە بەحركەوە هات بۆ ناوچەی زرارەتی و تا خۆی گەیاندە رۆژهەڵات، تەنانەت منداڵەكانی خۆشی نەهێنابوون، دواتر و دوای ماوەیەكی زۆر ئێمە چووین بۆ هێنانی منداڵەكانی.
من و خەسرو ساڵانێكی زۆر هاورێ و هاوسەنگەری یەكتر بووین، خەسرو كەسێكی گیانفیدا و قارەمان بوو، لە سەردەمی شەڕی خواكوڕك خەسرو دەورێكی باشی گێڕا. ئێمە لە ناوچەی نازدار داخ بووین, فەرمان هات كەوا دەبێت خۆمان بگەینینە ملەدێم، لەوێ ماینەوە سەربازە عێراقیەكان هێرشیان هێنا، ئێمەش دەستمان كرد بە شكاندنی هێرشەكە، دوای ماوەیەك هێزێكی تری سەرباز و جاش هاتن جارێكی تر هێرشیان هێن و لە رۆژێكدا دوو جار هێزە عێراقیەكانمان تێكشكان، دواتر بە پێی بڕیاری جەنابی سەرۆك دەبوایە بچینە ناوچەی قەبری زاهر، نزیكەی پێنج كاتژمێر بە پێ رێگامان بڕی، دوای گەیشتنمان بڕیاربوو لە هەر رێكخراوێك دە پێشمەرگە بچن بۆ هاوكاری قادر قادر لە خاڵی سەرەكی، دوای ماوەیەك خۆمان گەیاندە لای قادر قادر و هەڤاڵانی، من لەوێ برینداربووم، بەڵام خەسرو هەر مایەوە، بەڵام هەردەم لەوێ خەسرو لە چەپەری پێش پێشەوە بوو، راستی ئەو خالە خالێكی زۆر مەترسیدار بوو, چونكە یەكەمین خالی شەڕ بوو و بەردوام بە تۆپ و هاون ئەوێیان تۆپباران دەكرد، بەڵام خەسرو زۆر ئازایانە لەم سەنگەرەدا بوو تاكو هاتنی سەرما، دواتر بڕیاردرا بگەرێینەوە.
نەجات شێخ بەردەوام دەببَت و دەڵێت: لە داستانی خوا كوڕك خەسرو رۆلێكی زۆر گەورە و قارەمانانەی دەگێرا، ئەوەی خەسروی لە نزیكەوە نەناسیبێت, نازانێت گەورەی و قارەمانی ئەو پیاوە چەندە زۆر بووە.
نەجات شێخ بەردوام دەبێت و دەڵێت: دوای راپەڕین لەگەڵ جەنابی نێچیرڤان بارزانی چووین بۆ ناوچەی پشدەر و سلێمانی و ئەو دەڤەرە، جار جار تا لای قۆشتەپەش دەهاتین، بەڵام رۆژێك خەبەر هات, كەوا گوایە سەربازە عێراقیەكان هێرش دێنن، بوویە ئەو رێگایە لە مەترسی دایە، بوویە ئێمە پاشەكشمان كرد و هاتین بۆ دەربەندی بازیان ئێمەش پێشی هێرشەكەمان گرت، بەڵام رێگای سەرەكی كەوتە دەست سەربازەكاندا، بوویە هێزەكانی ئێمە بوون بە دوو بەش، بەشێكیان كەوتنە چیای پیرەمەگروم، بەشێكی تری كە ئێمە بووین, گەڕاینەوە بۆ پێنجوین و ئەو ناوچەیە.
دوای دابڕانمان یەك رۆژ هێلی پەیوەندی نێوانمان هەبوو، دواتر پەیوەندیمان پێكەوە نەما، ئێمە بێ هیوا بووین لەوانە و توانیا ئەوەمان نەبوو بە هانایان بچین. بوویە ئەوان نزیكەی 15 رۆژ لە چیای پیرەمەگرم مانەوە. سەرەڕای ترس و برسیەتی رێگایان لێ وون بوو و ناشارەزابوون.
خەسرو عەلی وەك پێشمەرگەیەك دوای راپەڕین بەشداریەكی كاری لە شەڕەكانی دوای راپەڕین هەبووە، كەسێكێ خۆشەویست و قسە خۆش بووە, هەردەم جێگای متمانەی سەرۆك بارزانی بووە. دواجار لەبەر لێهاتوویەكەی دەكرێتە فەرماندەی سریە لە فەرماندەی بارزان و دواجار دەكرێتە جێگری فەرماندەی بەتالیون، بەڵام لەبەر ماندوبوونی زۆر تۆشی نەخۆشی دەبێت و خانەنشین دەكرێت.
بنەماڵەی خەسرو عەلی دەڵێن: بۆ ئێمە جێگای شانازیە لەسەر دەست و لەژێر چاودێری ئەو پیاوە گەورەیە پێگەیشتووین، دوای وەفاتیشی هەردەم بۆ ئێمە جێگای شانازییە.
شایەنی باسە خەسرو عەلی خاوەنی 15 شەهیدی سەنگەرە، دواجار لەبەر نەخۆشی دڵ لە رۆژی9-2-2019 ماڵئاوای كرد.

بابەتى پەیوەندیدار جۆراوجۆر

زۆرترین بینراو