ژیاننامەی شەهید سەربەست ئەنور ماوانی

ژیاننامەی شەهید سەربەست ئەنور ماوانی

بەرەڤان شاكر سلێمان لاچ- سۆران: گەلی كوردستان گەلێكی خۆڕاگرە، هەردەم هەوڵیداوە بەرگری لە خۆی بكات، بۆ ئەوەی گەلی كوردستان بە ئازادی و سەرفرازی بژیت هەزاران رۆلەی ئەم گەلە خۆیان فیدا كردووە.
لەم ژمارەی هەفتەنامەی زاری كرمانجیدا مەبەستمانە بگەڕێینەوە بۆ باسكردنی چەند وێستگەیەكی ژیان و خەباتی شەهید (سەربەست ئەنوەر ماوانی).
شەهید سەربەست، لە 1-10- 1978 لە گوندی ماوانی سەر بە قەزای چۆمان لە دایك بووە.
دوای لە دایك بوونی شەهید سەربەست، حكومەتی عێراق دەستی دایە ڕاگواستن و خاپۆركردنی گوندەكانی كوردستان، بەمەش شەهید سەربەست هەر لە تەمەنی منداڵییەوە باجی كوردبوونی خۆی دەدات و دەگوازرێتەوە بۆ شارۆچكەی شاوێسی سەر بە پارێزگای هەولێر، بەو هۆیەوە شەهید سەربەست لە خاكی گوندی خۆی دوور دەكەوێتەوە.
ئاوارەیی و دەربەدەری وایكرد هەستی نەتەوەیی لای شەهید سەربەست گەڵاڵە بێت.
شەهید سەربەست، هەر لە شاوێس دەبێتە قوتابی، بەڵام لەبەر بارودۆخی سیاسی و كۆمەڵایەتی نەیتوانی خوێندن تەواو بكات، بەمەش دوور دەكەوێتەوە لە خوێندن، بەڵام خوێندن و زانست یەك لە ئارەزوویەكانی شەهید سەربەست بوونە، بۆیە لەم دوایانەدا دەستی كردەوە بە خوێندن و توانی تا قۆناغی ئامادەیی زۆر بە سەركەوتووی ببڕێت.
دوای راپەڕینی ساڵی 1991 بنەماڵەی شەهید سەربەست دەگەڕێتەوە بۆ زێدی خۆی لە ماوان.
دەڤەری باڵەكایەتی هەر وەك لە سەردەمی شۆڕشی ئەیلول لانەی شۆڕش و بەرخودان بووە، دوای راپەڕین و گەڕانەوەی خەڵكی دەڤەرەكە هەر كاریگەری شۆڕشی ئەیلولی لەسەر بووە، بەمەش چەندین لاو و گەنجی دەڤەرەكە لە دوای راپەڕین ئەركی بەرپرسیاریەتی پاراستنی كوردستان لە ئەستوو دەگرن، شەهید سەربەست، یەك لەو گەنجە خوێن گەرمان بووە كەوا دوای راپەڕین چەكی پێشمەرگایەتی لە شان دەكات و لە هێزی 74 باڵەك دەبێتە پێشمەرگە.
لە پڕۆسەی رزگاری عێراقدا شەهید سەربەست وەك پێشمەرگەیەك بەشداری كردووە و رولێكی باشی گێڕاوە، بەمەش شوێنی خۆی لای هاوكارانی دەكاتەوە.
هەر وەك چۆن هاوسەنگەرەكانی شەهید دەڵێن: شەهید سەربەست یەك لەو كەسانەبوو كەوا نمونەی زۆر كەمە، كەسێكی دڵسۆز و بەوەفا بوو، هەردەم هەڵسەنگاندنی بۆ بارودۆخی هاوكارانی دەكرد، هەردەم خۆی دەكرد بە قۆربانی بۆ ئەوەی دڵخۆشی و برایەتی ناو هاوكارەكانی بەردەوام بێت. بۆیە شەهیدبوونی سەربەست لای ئێمەی هاوكارانی برینێكی گەورەیە، ئێستاش شوێنی ئەو لە دیوان و كۆبونەوەكانی ناو سەنگەرەكانی پێشمەرگەدا دیارە.
لەبەر لێهاتووی و خەمخۆری بۆ پیشەكەی شەهید سەربەست لە ساڵی 2005 دەگوێزرێتەوە بۆ فەرماندەی هەڵگورد، دواتر وەك ئەفسەر درێژە بە خەباتی خۆی دەدات و چەندین ئەرك و بەرپرسیاریەتی دەگرێتە ئەستوو.
دایكی شەهید دەڵێت: دوای مردنی باوكی، شەهید سەربەست بۆ من وەك كێوێك بوو، شەهید توانی دوای باوكی ئەركی پەروەردەكردن و بەخێوكردی خۆشك و برایەكانی لە ئەستوو بگرێت، ئەو بڕیاری دابوو تاكو هەموو خۆشك و برایەكانی نەگەینێت بە ژیانی هاوسەرگیری ئەوا ئەو نەچێتە ناو ژیانی خێزاندارییەوە، ئاواتی من ئەوبوو منداڵەكانی سەربەست ببینم، بەڵام خوای گەورە ئەوە ئاواتەی بۆ بەدینەهێنام و ئەو دیارییە گەورە و بە بەهایەی لە من ستاندەوە.
دایكی شەهید بەردەوامن بوو و گوتی: هەستێكی زۆر ناخۆشە ببینی ئەو شوێنەی رۆڵەكت لەپێناو شەهیدبووە وا بە ئاسانی لەلایان غائینانەوە بفرۆشرێت. زۆر داخ بە دڵم لەوانەی كەوا بوونە هۆكاری ئەوەی ئەو خاكەی كوڕەكەم لە پێناو شەهیدبوو وا بە ئاسانی بفرۆشن.
دوای دروست بوون و هاتنی چەكدارانی داعش بۆ سەر سنوورەكانی كوردستان، شەهید سەربەست بە مەبەستی بەرگری و پاراستنی كوردستان دەچێتە سەنگەرەكانی پێشەوە، وەك ئەفسەرێك چەندین ئەرك و بەرپرسیارەتی بەڕێوە دەبات.
شەهید لەو شەڕانەی بەشداری كرووە توانیویەتی ناوێكی گەورە بۆ خۆی دروست بكات.
دوای دەستپێكردنی هێرشی پێشمەرگە بۆ سەر میحوەری بەعشیقە، توانرا لە ماوەیەكی كورتدا زۆر گوند كونترۆل بكات، دوای ئەوەی رۆژی 20-10-2016 هێزی پێشمەرگە دەستی كرد بە پاككردنەوەی گوندی ( تیس خراپ) لە تیرۆرستانی داعش، لەو رۆژەدا ئۆتۆمبێڵكی خۆكوژی تیرۆرستانی داعش خۆی بە هێزەكانی پێشمەرگەوە دەتەقێنێتەوە و ژمارەیەك پێشمەرگە شەهید و بریندار دەبن، شەهید سەربەست یەك لەو فەرماندانەبووە كەوا لەو هێرشە خۆكوژیەدا شەهید بوو.
دوای شەهیدبوونی لە رێوڕەسمێكی شایستەدا تەڕمی پیرۆزی لە گۆڕستانی (بەرگوانی خواروو)، بەخاك سپێردرا.
لە كۆتایدا دەڵێین، هەموومان تامی مەرگ و مردن دەكێشین، بەڵام هەزاران خۆزگە بەوانەی كەوا ئەم دونیایە بە سەربەرزی و سەرفرازی بەجیَِدێڵێت، بە تایبەت ئەوانەی پلەی شەهیدبوون وەردەگرن، ئەم دونیایەدا زۆر بە سەربەرزی بەجێهێشت.

 

 

زۆرترین بینراو