گرێبەستی كارمەندان نوێ دەكرێتەوە

گرێبەستی كارمەندان نوێ دەكرێتەوە

وەزارەتی دارایی و ئابووری حكوومەتی هەرێمی كوردستان دەستی کردووە بە نوێکردنەوەی گرێبەستی فەرمانبەران بۆ ساڵی دارایی 2021.
 
 ماڵپەری باسنیوز بڵاو كردەوە ، بە پێی ئەو زانیاریی و بەڵگانەی لە وەزارەتی دارایییەوە دەست كەوتوون، لەسەر بڕیاری حكوومەتی هەرێمی كوردستان، وەزارەتی دارایی دەستی كردووە بە دەرکردنی فەرمانی تازەکردنەوەی گرێبەستی کارمەندانی گرێبەست لە دامودەزگاکانی حکوومەتی ھەرێمی کوردستان.
 
هاوشێوەی ساڵەکانی ڕابردوو نوێکردنەوەی گرێبەستی ئەو فەرمانبەرانە بۆ ماوەی یەک ساڵ دەبێت واتە لە 1/1/2021ەوە تاکو 31/12/2021 دەبێت، مەرجی تازەكرنەوەی گرێبەستەكانیشیان ئەوەیە کە هیچ مووچەی تریان نەبێت و لە دەوامكردنیش بەردەوام بن.
 
سەرچاوەیەك لە وەزارەتی دارایی بە (باسنیوز)ی راگەیاند: "فەرمانی نوێكردنەوەی هەندێك لە گرێبەستەكان بۆ وەزارەت و فەرمانگەكان نێردراوە و ئەوانەی تریش دوای وردبینی لە لایەن بەرێوەبەرایەتی گشتی بودجە تەواو دەكرێن".
 
نزیكەی 29 هەزار فەرمانبەری گرێبەست، لە داموو دەزگاكانی حكوومەتی هەرێمی كورستان دەوام دەكەن.
 
یاسین عەبدولواحید بەرێوەبەری گشتی دیوانی وەزارەتی دارایی راگەیاندووە : "وەزارەتی دارایی دەستی كردووە بە تازەكردنەوەی گرێبەستی فەرمانبەرانی گرێبەست و نووسراوی تازەكردنەوەكەش دەدرێتەوە بە فەرمانگەكان".
 
بەرپرسەكەی وەزارەتی دارایی ئەوەشی خستەڕوو، "رێنماییەكی جێگیر لە وەزارەتی دارایی بۆ تازەكردنەوەی گرێبەستەكان هەیە كە پشتی بە یاسا بەستووە، دەبێت فەرمانی دامەزراندنی بە گرێبەست هەبووبێت، نابێت مووچەی تری هەبێت و دەبێت بەردەوام بێت لەكاركردن، بەم مەرجانە گرێبەستەكان تازەكراونەوە و فەرمانگەكانیش دواتر فەرمانی وەزاری و كارگێڕییان بۆ دەردەكەن".
روونیشی كردەوە، هاوشێوەی فەرمانبەرانی هەمیشەیی، ماف و خزمەتی فەرمانبەرانی گرێبەست لای حكوومەتی هەرێمی كوردستان پارێزراوە.

 

زۆرترین بینراو