گوند و ئاوایەكانی دەڤەری برادۆست  و باڵەكایەتی بە هەڕەمەكی تۆپباران دەكرێن

گوند و ئاوایەكانی دەڤەری برادۆست و باڵەكایەتی بە هەڕەمەكی تۆپباران دەكرێن

موڕشید برادۆستی-سیدەكان: هەفتەی رابردوو، كۆماری ئیسلامی ئێران بە چڕی گوند و ئاوایەكانی سنووری كارگێڕی ناحیەی سیدەكان سەر بە قەزای سۆران تۆپباران كرد و زەرەر و زیانی گیانی و ماددی لێكەوتەوە .
ماوەی چەند مانگێكە ئێران تۆپبارانی ناوچەی برادۆستی نەكردووە و لە رۆژی چوارشەم و پێنجشەممەی رابردوو، بە چڕی تۆپبارانی دەستی پێكردووە و ئەمەش نیگەرانی هاووڵاتیانی دەڤەرەكەی لێكەوتەوە. تۆپبارانی ناوچە سنوورییەكان دوای ئەوە دێت 9-7-2019 لە ناوچەی پیرانشاری ئێران، یەكێك لە دیارترین فەرماندە سەربازییە خۆجێییەكانی سوپای پاسداران لەگەڵ دوو چەكداری دیكە لە هێرشێكدا كوژران، حكومەتی هەرێمی كوردستان ناڕەزایەتی خۆی دژی هێرشكردنە سەر سوپای پاسداران لە پیرانشار، هەروەها تۆپبارانەكەی ئێران بۆ سەر ناوچە سنوورییەكان دەربڕی و راشیگەیاند "حكومەتی هەرێمی كوردستان داوا لە كۆماری ئیسلامیی ئێران دەكات بۆردوومانكردنی ناوچەكە رابگرێت و نەبێتە هۆی دڵەڕاوكێ و دەربەدەربوونی دانیشتووان".
محەمەد عەزیز موختار لە ناحیەی سیدەكان بە زاری كرمانجی راگەیاند" جاری یەكەم نییە ئێران بە تۆپ و فڕۆكە بۆردومان و تۆپبارانی گوند و ئاوایەكانی سنووری سیدەكان دەكات، مێژووێكی لە مێژینەی لەگەڵ بۆردومانەكان هەیە، لە ساڵانی رابردوو تا ئێستە چەندان ژن و پیاوی دەڤەرەكەمان بەهۆی بۆردومانەكانی ئێران بوونە قوربانی و لەم دووایەشدا بەهۆی تۆپبارانی ئێران 3 ئەندامی یەك خێزان بوونە قوربانی .
زیاتر گووتی " جیا لە زیانە گیانیەكان، بەهۆی بۆردومان و تۆپبارانەكانی ئێران چەندین خانوو خاپوور بوونە و زەرەر و زیانی ماددی زۆر بەر هاووڵاتییان گەیشتووە، داوا دەكەین وڵاتی ئێران ئەو تۆپبارانانەی سەر گوند و ئاوایەكانمان رابگرێت .
ئیحسان چەلەبی بەڕێوەبەری شارەدێی سیدەكان بە زاری كرمانجی راگەیاند" تۆپبارانی ئێران هەریەك لە گوندەكانی " تەلان، داسنیا، دێرێ، دووستانا، بەربزینی گرتۆتەوە و بەو هۆیەوە هاووڵاتییان و دانیشتوانانی ئەو گوندە كە زیاتر كاسبكارن و لە وەرزی بەهار و هاوینان روو لەو سنوورە دەكەن ئاوارەبوونە و لە ترسی تۆپباران ناچار بە جێهێشنی گوندەكانیان بوونە .
بەڕێوەبەری شارەدێی سیدەكان دەڵێت" تۆپبارانەكانی ئێران بۆ سەر گوند و ئاوایەكانی سنووری كارگێڕیمان بەردەوامی هەیە و سەرووی خۆمان لە زیانە گیانی و مادییەكانی تۆپبارانەكە ئاگادار كردۆتەوە .
چەلەبی ئاشكراشی كرد" كۆماری ئیسلامی ئێران بە بیانووی هەبوونی بنكە و بارەگای پێشمەرگەكانی دیموكرات بە هەڕەمەكی تۆپبارانی ناوچەكەی كردووە و بەو هۆیەوە كچێكی تەمەن 18 ساڵان بەناوی ( زەیتوون قادر ) شەهیدبووە و دووبرای تریشی بەناوەكانی ئیسماعیل تەمەن 14، سیروان تەمەن 23 بە سەختی بریندار بوونە و ڕەوانەی سۆران و هەولێر كراون .
لە ڕاگەیاندراوێكدا قوتابخانەی گوڵی زەردی زانستی كچان لە ناحیەی دیانا، وێڕای دەربڕینی هاوخەمیان بۆ شەهیدكردنی كچە قوتابیەكی قۆناغی زانستی قوتابخانەكەیان، رایدەگێنن "پێشنیوەڕۆی رۆژی چوارشەممە 10-7-2019 بەهۆی تۆپبارانەكانی سوپایی پاسدارانی ئێران، لە گوندەكانی دەڤەری برادۆست لەسنووری شاردەێی سیدەكان، بەداخێكی زۆرەوە كچە قوتابی ئامادەییەكەمان بەناوی (زیتون قادر جوجۆ) بووە قوربانی، كە ئەم كچە قوتابیە بۆ ئەم ساڵی خوێندن پۆڵی یازدەمی زانستی بە سەركەوتوویی بڕی، لە ئامادەكاری دابوو، بۆ خوێندنی ئەم ساڵ لە پۆلی 12 زانستی كار بۆ داهاتووی خۆی بكات، بەڵام دوژمنانی خاك و ووڵات، خەونەكەیان لە گۆڕناو لەبری گەیشتن بە هیواو ئاواتەكانی گیانی پیرۆزی بەخشی".
بەپێی زانیاریەكانی دەست زاری كرمانجی كەوتوون، ئێران زیاتر لە 40 تۆپی لە دەڤەری برادۆست داوە و وێڕای زیانی گیانی، زیانی زۆریشی بەر گژووگیا و رەز و باخی هاووڵاتییان گەیاندوو و تۆپبارانەكە ترس و دڵەڕاوكێی زۆری لای تەواوی گوندەكانی دۆڵی زەرزێ و مهاجیران لە سیدەكان درووست كردووە .
زێدان رەشید برادۆستی ئەندامی پەڕڵەمانی كوردستان لە فڕاكسیۆنی پارتی بە زاری كرمانجی راگەیاند" بە توندی ئیدانەی ئەو بۆردوومانە و ئەو تاوانە گەورەیە دەكەین و داواكاری هەرچی زووە حكومەتی هەرێم بێتە دەنگ و بە هاواری خەلكی دەڤەری برادۆست بێت و ئەو بۆردوومانان و تۆپبارانە رابگیرێت. گووتیشی" بەداخەوە ئەو بۆردوومانە بووە هۆی بریندار بوون و شەهید بوونی چەند هاولاتیەك كە هەموویان سەربەیەك خانەوادەن.
ئەو ئەندامەی پەڕلەمانی كوردستان دەڵێت " بەیاوەری سەرۆكی فڕاكسیۆن و ئەندامانی فڕاكسۆنی پارتیمان بریندارەكانی تۆپبارانی دەڤەری برادۆستمان لە شاری هەولێر بەسەركردەوە، بەپێویستی دەزانین لێرەوە زۆر سوپاسی نوسینگەی سەرۆكی هەرێمی كوردستان رێزدار نیچیرڤان بارزانی دەكەین كە ئەركی چارەسەركردنی بریندارەكانی گرتە ئەستۆ. وە سوپاسی جێگری سەرۆكی پەڕڵەمانیش دەكەین كە داواكاری ئەندامانی دەڤەری سۆرانیان قبولكرد بە هاوكاری كردنی دارایی بریندارەكان بكەن .
جیا لە تۆپبارانی دەڤەری برادۆست و سیدەكان، تۆپخانەكانی ئێران بە چڕی تۆپبارانی گوند و ئاوایەكانی سنووری حاجی ئۆمەران و باڵەكایەتی كرد، لەو بارەیەوە، ئەحمەد قادر، قایمقامی چۆمان بە زاری كرمانجی گووت " كاتژمێر 8ی بەیانی رۆژی پێنجشەمە زنجیرە چیاكانی كوێستانەكانی گوندی ئاڵانە لە لایەن تۆپخانەكانی ئێران تۆپباران دەكرێن. زیانی گیانی نەبووە، بەڵام زیانی ماددی هەبووە. ئەو تۆپبارانە ماوەی دوو رۆژە بەردەوامە، لەراستیدا هیچ بیانوویەك نییە كە ئێران كەسانی مەدەنی و سەر و سامانیان بكاتە ئامانج، ئەمە دوورە لە خەسڵەتی دراوسێیەتی و هیوادارین بەزووترین كات تۆپباران بووەستێت .
هاورێ حمەدەمین هاوڵاتێكی دانیشتوی دۆڵی ئاڵانەی دەڤەری باڵەكایەتییە بە زاری كرمانجی گووت "بەرەبەیانی رۆژی 11 تەموزی 2019 لە لایان تۆپخانەكانی ئێران بە چڕی ناوچەكانی دۆڵی ئاڵانە و زنجیرە چیایەكان و گوندی كانیەڕەش و مارێن و بێشە، بۆردومان دەكرێت، بەداخەوە بەم هۆیەوە رەز و باخ و پوش و پاوانێكی زۆر سوتاوە، هەر لە گوندی ئاڵانە رەز و باخی دوو هاووڵاتی سوتاوە، لەم نێوەندێیەدا تەنها هاووڵاتی و خەڵكی سڤیل دەبێتە قوربانی، ئەم بۆردومانەش نە جارێك نە دووجار هەموو ساڵێك روو دەدات، داواكارین لە حكومەتی عێراق و حكومەتی هەرێم دەكەین هەڵوێستیان هەبێت لەم بۆردومانەی كە دەكرێتە سەر سنوری باڵەكایەتی و ناوچەی برادۆست، بەسە با چیتر ڕۆلەكانمان شەهید نەبن.
دەربارەی تۆپباران كردنی ناوچە سنووریەكانی كوردستان، حكومەتی هەرێم راگێندراوێكی بڵاو كردەوە و تێدا هاتووە، رۆژی سێشەممە 9 – 7 – 2019 لە ناوچەی پیرانشاری سنووری لەگەڵ هەرێمی كوردستان، هێرشێكی چەكداری كرایە سەر چەند ئەندامێكی سوپای پاسداران، لە بەرامبەردا كۆماری ئیسلامیی ئێران ناوچە سنوورییەكانی ناوخاكی هەرێمی كوردستانی بۆردومان كرد. كە بەداخەوە بە هۆی بۆردوومانەكە لە یەك خانەوەدەدا هاووڵاتیەك شەهید و دووی دیكەش برینداربوون. هەردوو ڕووداوەكە مایەی نیگەرانی و ناڕەزاییی ئێمەیە.
دووپاتی دەكەینەوە هەرێمی كوردستان كە سەلماندوویەتی لە ناوچەكەدا فاكتەری سەقامگیرییە و ڕێز لە هاوسنووری و دراوسێیەتی دەگرێت‌، هەرگیز ‌ڕێگە نادات و بە هیچ شێوەیەك قبووڵ ناكات‌ سنوورەكانی بۆ هێرش و تێكدانی ئاسایشی وڵاتانی دراوسێ و كردەوەی نابەرپرسانە بەكار بهێنرێت، داواش لە كۆماری ئیسلامیی ئێران دەكەین بۆردومانكردنی ناوچەكە ڕابگرێت و نەبێتە هۆی دڵەڕاوكێ و دەربەدەربوونی دانیشتووان.
ناحییەی سیدەكان لە رووی كارگێریەوە سەر بە قەزای سۆرانە و بە دووری 144 كم لە سەنتەری شاری هەولێر دوورە، خاوەنی 250 گوندە بەهۆی تۆپباران و بۆردومانەكانی توركیا و ئێران ، زیاتر لە 100 گوند تا ئێستا ئاوەدان نەكراوەتەوە و 20 گوندی دیكەش مەترسیان لەسەرە، لە ساڵانی رابردوو دەیان خەلكی سڤیلی ناوچەكە بووەتە قوربانی تۆپباران و بۆردومانەكانی وڵاتانی دراوسێ.

 

زۆرترین بینراو