گەنجان تا چەند پابەند بە رێنماییەكانی خۆپاراستنن دژ بە كۆرۆنا ڤایرۆس

گەنجان تا چەند پابەند بە رێنماییەكانی خۆپاراستنن دژ بە كۆرۆنا ڤایرۆس

پشتیوان كەریم برادۆستی – سۆران :
بەشی زۆر لە گەنجان پابەندن بە رێنماییەكانی تەندروستی لە رێگەی زاری كرمانجی یشەوە داوا لە هاوشارییان دەكەن پەیوەست بن بە رێنماییەكان و گیانی خۆیان بپارێزن و هەندێكی تریشیان باوەڕییان بە بوونی ڤایرۆسەكە نییە و ناخوازن بە هیچ شێوەیەك قسە لەسەر ئەو بابەتە بكەن.
هەندێ لە گەنجان لە بارەی خۆپارێزی و بەستنی ماسك و دەستكێشەوە راو بۆچوونی خۆیان خستە روو ئەوان دەڵێن باوەڕی تەواومان بە نەخۆشیەكە هەیە و جددیە, هەروەك خۆیان دەڵێن پێویستە هاوڵاتیان خۆبپارێزن و تاكو دوور ببن لەو پەتایە.
محەممەد عەبدولا ی تەمەن 19 ساڵ دانیشتوی قەزای سۆرانە بۆ زاری كرانجی گووتی"من وەك گەنجێك نەم بەستیوە ناشی بەستم وە پڕ بەدڵ حەز دەكەم بمرم و نەمێنم لەژیان چونكە سەدان گەنجی وەك من ئاواتە خوازە و ئاوات بە مردن دەكات, من گەنجێكم وازم لە خوێندن هێناوە بۆ خۆم كاری دەستگێریم دەكرد بە عارەبانەیك رۆژانە دە هەزار دینارم دەست دەكەوت, بژێوی خۆم و بەشێكی ماڵەوەم پێدابین دەكرد، بەڵام شارەوانی وازمان لێناهێنێت بۆ خۆمان كار بكەین".
محەممەد دەڵێت"تاكو ئێستا چوار جار شارەوانی سۆران غرامەیان كردووم و هەر جارێك بە سی هەزار و ناهێڵن ئەم كارە بكەین ئەوان دەڵێن سیمای شار ناشرین دەبێت، بۆیە لەكۆتایشدا گووتی من ماسك نابەستم بەڵام بەخەڵك دەڵێم ماسك و دەستكێش ببەستن و خۆ بپارێزن چونكە ئەو پەتاییە جدییە و بوونی هەیە".
سیروان حەسەن گەنجێكی تری قەزاكەیەو بۆ زاری كرمانجی گووتی"من ماسك و دەستكێش نابەستم ئەو خەڵكانەشی دەیبەستن لە ترسی پێبژرادن دەبەستن و دەشڵێت ئەوانەی ئەبەستن سایەقی ئۆتۆمبێل و دوكانداران و كاسبكارانن كەوا لەترسی غرامەكردن و پێبژاردن دەبەستن وە بەچاوی خۆشم بینیوە فرۆشیار هەبووە ماسكی بەستوە دەستكێشی لەدەست بووە، بەڵام دوای تێپەربوونی لێژنە و ئەوانەی دەسورێن بۆ ئەوەی بزانن كێ پابەند نییە تا غرامەی بكەن، دوای رۆشتنیان راستەوخۆ دەستكێش و دەمامكی فرێداوە
سیروان گووتیشی"باوەری تەواوم بەو پەتایە هەیە و بەربڵاوە لە هەموو شوێنێك بەڵام ئەوەی خوداش هێنای هەر دێت".
سیروان لەكۆتایشدا دەڵێت دانەی ماسكی ببێ بە دوسەت و پەنجا دیناریش من نایبەستم نەك لە بەر ئەوەی پارەم نییە، گەر بە خۆڕایش بێت، ئامادەنیم ببەستم چونكە بێزارم و بێتاقەتم لەهەموو شتێك".
ئەحمەد محمود ی تەمەن 20ساڵ دانیشتوی قەزای سۆران دەڵێ‌"پابەندبوون بەرێنمایی و رێكارەكانی خۆپارێزی، ئەركی هەمووانە، بۆیە دەبێت هەموو كەس خۆی بپارێزێت و دەستكێش و دەمامك بەكار بهێنێت و دوور بكەوێتەوە لە شوێنی قەڵەبارغ, ماسك و دەستكێش بەكار دەهێنم چونكە دەزانم نەخۆشییەكە جدییە و بوونی هەیە"،
گووتیشی"زۆر جار بە هاوڕێیانیشم دەڵێم كەوا خۆیان بپارێزن, چونكە خۆپاراستن لەپەتای كۆرۆناو جێبەجێكردنی رێنمای و رێكارەكانی خۆپارێزی ئەركێكی ئەخلاقی و مرۆڤیە"،
ئەوەش دەڵێ‌"بەشێك لە گەنجان خۆپارێزی ئەنجام نادەن دڵنیاشم كەوا لەتواناییان دایە ماسك و دەستكێش بەكار بهێنن و بیكڕن، بەڵام بەكار نەهێنانیان دەكەوێتە ئەستۆی خۆیان زیان بە خۆیان دەوروبەرو كۆمەڵگە دەگەیێنن".

زۆرترین بینراو