گەنجێكی فۆتۆگرافەر بە بیرۆكە ناوازەكانی دیمەنەكانی سروشت جوانتر دەكات

گەنجێكی فۆتۆگرافەر بە بیرۆكە ناوازەكانی دیمەنەكانی سروشت جوانتر دەكات

بۆتان محەممەد – رواندز
زۆربەی ئێواران و لەكاتی ئاوابوونی خۆر، لەسەر لێواری خەرەندی شار دەبیندرێ و بە زوومی كامیرەكەی خەریكی وێنەگرتنی دوا دیمەنەكانی خۆرە، تاڵیب بەدرەدین حەسەن تەمەن 22 ساڵ دانیشتووی قەزای رواندز و دەرچووی بەشی كارگێری یە، هەروەكو خۆی باسی دەكات نزیكەی ساڵێك دەبێ خەریكی كاری فۆتۆگرافەری یە، بەڵام بە شێوەیەكی جیاوازترو بە بیرۆكەی جیا جیا وێنەكان دەگرێت و بۆتە جێگەی سەرنجی زۆر لە پەیج و ماڵپەرەكانی تایبەت بەم بوارە.
تاڵیب لەسەر كاری فۆتۆگرافی خۆی و بیرۆكەكانی بۆ دوا لاپەرەی زاری كرمانجی قسە دەكات و دەڵێ‌"فۆتۆگرافی بۆتە بەشێكی گرینگ لە ژیانم و تێكەڵ بووە لەگەڵ رووحم، هەرچەند باسی بكەم ناتوانم لە پێناسەیەكدا خۆشەویستی و ئارەزووی خۆم بۆ ئەو كارە جوانە دەرببڕم"،
ئەوەش دەڵێ‌"سەرەتای دەستپێكردنی كاری فۆتۆگرافیم دەگەرێتەوە بۆ ساڵی 2019، ئەو كاتەی كامێرایەكی پرۆفیشنالم كڕی و هەر لەو كاتەوە دەستمكرد بە وێنەگرتن بە شێوازێكی جیاوازتر لە فۆتۆگرافەرانی تر و بریاریشم داوە تەنها لە مەجالێكدا كار نەكەم، بەڵكو روو بچمە نێو پانتایی دونیای فۆتۆگرافی و هەموو رێگەكانی تاقی بكەمەوە (Fashion model nature, silhouette, Landscape, Portrait) ".
تاڵیب ی فۆتۆگرافەر دەڵێ‌"هیچ كەسێك هاوكاری نەكردووم و بە حەز و تواناو خۆشەویستیم بۆ كارەكە، بەو رۆژە گەیشتووم و گەرچی تەمەنی كاركردنم لەو بوارەدا ساڵێك تێپەڕ ناكا، بەڵام ئەزموونێكی زۆرم پەیدا كردووەو وێنەكانیشم بۆنەتە جێگەی رەزامەندی خەڵك و سەرنجی زۆر لە ماڵپەڕ و پەیجەكانی تایبەت بەو بوارەی بۆ لای خۆی راكێشاوەو لەهەریەك لەپەیجەكانی( فوكەس فوتۆ، كوردستان فوتو گرافی، ئێكس گرافیك، وۆرلد فوت، بێست فوتوگرافی، فوتو گرافی ریفیوو، وۆرلد فوتو دەیی، ئە مە یزبنگ فوتو، ماكوس فوتوگرافی) وێنەكانم بڵاوبۆنەتەوەو پلەی یەكەمی لیستی فۆتۆیەكانی وەرگرتووە".
تاڵیب ئاواتە خوازە لە دەرفەتێكدا پیشانگەیەكی تایبەت بە فۆتۆیەكانی بكاتەوە، بەڵام هەروەكو دەڵێ‌"دەسەڵاتی كردنەوەی ئەو پیشانگایەم نییەو چاوەڕێ سپۆنسەرێك دەكەم كە هاوكارم بێ بۆ ئەوەی بەرهەمی ئەو ماوەیی كاركردنم نمایش بكەم"،
ئامانجی تاڵیب ی فۆتۆگرافەر گەیشتنە بە ئاستی جیهانی و هەوڵدانە بۆ زیاتر پێشخستنی بیرۆكەكانی، ئەوەش دەڵێ‌"هەر كەسێ بە باشی و خۆشەویستیەوە كار بكات، ئەگەر چەندە سەخت و ماندووكەریش بێ، سەرئەنجام بەرهەمێكی جوانی دەبێ و دڵ و دەروونت ئاسوودە دەبێ".

زۆرترین بینراو