یابان دەیەوێت خانمان لە ماددە كیمیاییەكان دوور بكەونەوە

یابان دەیەوێت خانمان لە ماددە كیمیاییەكان دوور بكەونەوە

" بەم كارە نەمتوانیوە بژێوی ژیانم دابین بكەم"

د/ هۆژین شەوكەت

سەردەمی كاركردنی ئافرەتە، ئافرەتان هەریەكەو بە حەزی خۆیان كاری جیاواز ئەنجام دەدەن، هەریەكە و لەو بوارەی حەزی لێیەتی و هەندێكیشیان وەك دەرفەتێك هاتووتە پێشیان و حەزیان بۆ كارەكە پەیدا بووە، یابان یەكێكە لەو خانمانەی كارێكی هەڵبژاردوە بە حەز و ویستی خۆی بۆ ئەوەی بتوانێت حەز و خەونەكانی بكاتە راستی و خزمەت بەو بوارە بكات كە هەڵیبژاردووە، ئەو وەك مەیكئەپ ئاڕتیست كاردەكات و رۆژانە بە رێنماییەكانی بۆ مەیكئەپ و ماسكی سرووشتی ئافرەتان ئاگادار دەكاتەوە لە باشی و خراپی بەكارهێنانی ماددە كیمیاییەكان، جیا لەوە وەك فەیس مودێلیش كاردەكات و هەردووك كارەكەی وەك یەك خۆشدەوێت. یابان لە دیمانەیەكی كورتدا بۆ زاری كرمانجی دوا و باسێكی كورتی ژیان و كاركردنی خۆی كرد و گووتی" من یابان رەسوڵ لە قەڵادزێ لە دایك بووم، ماوەی دوو ساڵە دەستم كردووە بە كاری مەیكئەپ و لەگەڵ ئەوەشدا كاری فەیس مودێل دەكەم كە نزیكەی ساڵیكە دەستم بەم كارە كردووە، ئەم دوو كارە حەز و خولیای خۆم بوون هەمیشە ویستوومە ئەم كارە بكەم و خەونی منداڵیم بەدیبهێنم، خێزانەكەم زۆر پاڵپشتم بوون جگە لە ئەوان هیچ كەسێكی تر هاوكارو پاڵپشتم نەبووە".
سەبارەت بەشێوازی هەڵبژاردنەكانی یابان گووتی" من زیاتر حەز بە شێوازی كلاسیك دەكەم و هەر هەمان شێواز بەكاردەهێنم چونكە بۆ رووخسارم زۆر گونجاوە، هەردوو كارەكانم پەیوەستن بە یەكەوە و جیاوازییەكی وایان نییە، سەرسامم مەیكئەپ ئارتیستی كورد رۆی و لە دەرەوەش بە نیككی، ئەم كارە نەیتوانیوە بژێوی ژیانم دابین بكات چونكە من بۆ پەیدا كردنی بژێوی ژیانم ئەم كارەم هەڵنەبژاردووە بەڵكۆ حەزی خۆم بووە و ویستوومە بیكەم".
گووتیشی" خانمان منیان خۆشدەوێت چونكە هەمیشە ماسكە سرووشتییەكانیان بۆ بڵاودەكەمەوە، حەزم زۆر لەم كارەیە بڕیارە لە ئایندەیەكی نزیكدا باشترین بڕاند بۆ خانمان بڵاوبكەمەوە بە ناوی خۆمەوە كە هەموو زانیارییەكان بە كوردی لەسەری نووسرابێت، هەمیشە و ئێستاش رێنماییم بۆ خانمان ئەوەیە كە دوور بكەونەوە لە بەكارهێنانی ماددەی كیمیایی و تا پێیان دەكرێت ماددە سرووشتییەكان بەكاربهێنن".

زۆرترین بینراو