یانەكان دەیانەوێ خولی عێراق دوابخرێت

یانەكان دەیانەوێ خولی عێراق دوابخرێت

زاری كرمانجی: یانە بەشدارەكانی خولی نایابی عێراق، داوا دەكەن دەسپێكردنی یارییەكانی خولەكە دوابخرێت بەهۆی ئەنجامنەدانی ئامادەكارییەكی باش و مەترسییەكانی ڤایرۆسی كۆڕۆنا.
دەستەی كاتی یەكێتی تۆپی پێی عێراق، رۆژی 20ی مانگی سێپتێمبەری داهاتووی دیاریكرد بۆ بەڕێكەوتنی شەمەندەفەری وەرزی نوێی یارییەكانی خولی عێراق، بەڵام هێشتا یانەكان بەهۆی مەترسییەكانی ڤایرۆسی كۆڕۆنا نەیانتوانیوە راهێنانەكانیان دەستپێبكەنەوە.
یانەی هەولێر خاوەن چوار نازناوی خولی عێراق، ئەمساڵ رادان گاسانینی راهێنەری كرواتی سەرپەرشتی دەكات، هێشتا ئەو راهێنەرە نەگەڕاوەتەوە شاری هەولێرو تیپەكەش دەستی بە ئامادەكاری نەكردووە.
پشتیوان شبیب، جێگری سەرۆكی یانەی وەرزشی هەولێر لە لێدوانێكدا رایگەیاند" ئێمە داوا دەكەین خولی نایابی عێراق دوابخرێت، لەبەرئەوەی لەبەرژەوەندی هەموو یانەكانە، بۆ ئەوەی بتوانین بەشێوەیەكی باش خۆمان ئامادە بكەین و تیپێكی بەهێز ئامادە بكەین بۆ وەرزی نوێ".
یانەی زاخۆ نوێنەرێكی دیكەی هەرێمی كوردستانە لە خولەكە، ئەمساڵ ئەحمەد سەڵاح ئەستێرەی پێشووی هەڵبژاردەی عێراق راهێنەری یانەكەیەو گرێبەستیش لەگەڵ ژمارەیەك یاریزانی عەرەب و كورد واژۆكراوە، زاخۆ هیوای ئەنجامێكی باشی لە خولی عێراق هەیە.
ئیدریس كۆچەر، سەرپەرشتیاری یانەی زاخۆ لەبارەی هەڵوێستیان روونیكردەوە" باشترین بژاردە دواخستنی خولی عێراقە بۆ مانگی ئۆكتۆبەر، بەهۆی مەترسیەكانی كۆڕۆنا نەمانتوانیوە راهێنان دەستپێبكەین و وا زووش تیپەكە كۆنابێتەوە، هەر بۆیە ئێمە بە نووسراوێكی فەرمی داوا لە دەستەی كاتی یەكێتی تۆپی پێی عێراق دەكەین خولەكە دوابخات".
یانەی نەفتی ناوەڕاست خاوەن نازناوێكی خولەكەیە، ئەمساڵ بەكۆكردنەوەی ئەستێرەكانی عێراق دەیەوێت ململانێ لەسەر نازناوی خولەكە بكات.
فیراس بەحرلعلوم، سەرۆكی یانەی نەفتی ناوەڕاست ئاشكرایكرد" هێشتا مەترسیەكانی كۆڕۆنا بەشێوەیەكی بەربڵاو ماوە لە عێراق، واتا كۆبوونەوەو هاتوچۆمان بۆ شارەكان مەترسیدارە، پێویستە بڕیار لەسەر دواخستنی خولەكە بدرێت".
یارییەكانی وەرزی نوێی خولی نایابی عێراق بە بەشداری 20 یانەیە.

بابەتى پەیوەندیدار وەرزشى

زۆرترین بینراو