بەرپرسی لقی 26ـی گوڵان:  داوامكردووە كەسێكی دڵسۆزی باڵەكایەتی لە پۆستەكەم دابندرێت

بەرپرسی لقی 26ـی گوڵان: داوامكردووە كەسێكی دڵسۆزی باڵەكایەتی لە پۆستەكەم دابندرێت

گفتوگۆی: كەریم سمكۆ
 
حەسەن حەدۆ، بەرپرسی لقی 26ـی گوڵانی پارتی دیموكراتی كوردستان ئاشكرای دەكات گۆڕانكاری لە پۆستەكەیدا دەكرێت و دەڵێت: خۆ هەر ئێمە ئەركی بەرپرسیارییەتی هەڵناگرین، سبەی كادیرە گەنجەكانی پارتی شوێنی ئێمە دەگرنەوە و دەبێت هەموومان پاڵپشتییان بكەین و شانازیان پێوە بكەین.
ناوبراو لە دیمانەیەكی زاری كرمانجی بەراشكاوی وەڵام دەداتەوە و دڵنیایە پارتی بۆ هەڵبژاردنی ئەمجارەی پەرلەمانی عێراقیش دەنگی یەكەم دەهێنێتەوە و دەبێتە حزبی براوەی یەكەم. لەسەر پەیوەندیكردنی كادرو ئەندامانی پارتەكانی تر بۆناو ریزەكانی پارتی دەڵێت: رۆژانە خەڵك و كەوادیرەكانی پارتەكان پەیوەندیمان پێوە دەكەن و پاڵپشتی خۆیان بۆ لیستی پارتی دەردەبڕن و دێنەوە ناو رێكخستنەكانی پارتیمان..
* پێگەی پارتی لە سنووری لقی 26ـی گوڵان بەراورد بە ساڵانی رابردوو چۆنە، خەڵكتان لێبۆتەوە یان پێگەی پارتی روو لە فراوانبوون دەكات؟
- پێگەی پارتی لە باڵەكایەتی دەگەڕێتەوە بۆ سەردەمی شۆڕشی مەزنی ئەیلوول، خەڵكی شۆرشگێڕی ئەم دەڤەرە هەمیشە نزیكی بارزانی نەمر و سەرۆك بارزانی بوونە، بۆیە ئێستاش ئەو باگڕاوندە كوردپەروەرییە لێرە هەرماوە و هەمیشە لە فراوانبووندایە، لە هەڵبژاردنەكانی پەرلەرمانی كوردستان و ئەنجوومەنی نوێنەرانی عێراقیش لە رابردوو پارتی دەنگی یەكەمی هێناوە، ئەمەش بۆ متمانەی خەڵك بە بەرنامە و كاری ئەم حزبە دەگەڕێتەوە. لەلایەكی دیكە نزیكایەتی سەرۆك بارزانی بۆ خەڵكی ئەم ناوچەیە و هاتنی بەڕێزیان بۆ چۆمان،  وایكردووە رۆژ بە رۆژ جەماوەری پارتیمان لەم دەڤەرە رووی لە بەرفراوانی بكات.
* واتا بەهەمان شێوازی پێشووتر، خۆتان بۆ هەڵبژاردنی پێشوەختەی پەرلەمانی عێراق ئامادە كردووە بۆ ئەوەی هەمدیسان دەنگی یەكەم بەدەست بهێننەوە؟
- بەڵێ بێگومان، پارتی هەمیشە متمانەی بە ئەندام و جەماوەری خۆیەتی، لەم دەڤەرەش كە هەمیشە لە خەبات و قوربانیدان بۆ كوردستان و رێبازی پارتی و بارزانی درێخیان نەكردووە، بەردەوامیش بە دڵسۆزانە متمانەیان بە پارتی كردووە بۆ ئەوەی لەرووی خزمەتگوزاری و ئاساییش و سەقامگیری پارتی هەڵبژێرنەوە و بیكەنە دەنگی یەكەم و حزبی براوە.
*بەڵگەت بۆ ئەمە چییە؟ فراوانبوونی ریزەكانی پارتی لەم سنوورە بۆچی دەگەڕێننەوە؟
- ئەزانی چۆنە، با ئێمە بە ژمارە و داتا قسە بكەین، جگە لە دەنگدەری پێشووتر، ئەمجارە سێ موالیدیش هاتوونەتە ناو پڕۆسەكە، رۆژ بە رۆژیش كادیر و ئەندام و لایەنگری پارتەكانی دیكە سەردانی بارەگای لق دەكەن و دێنەوە ناو ریزەكانی پارتیمان و پەیوەندیی بە ریزەكانی ئێمەوە دەكەن و پشتیوانی بۆ لیستی پارتی دەردەبڕن و بەڵێن دەدەن كە لەسەر هەمان نەهج و رێبازی پارتیمان خزمەت بكەن و ببینە ئەندامی دڵسۆز، هەر ئەوەش نا، بەڵكو بنەماڵە و كەسایەتی و پیاوماقوڵیش كە پێشتر بەهەر هۆكارێك بێت لێمان دوور بوون، ئێستا بوونەتە پشتوپەنامان و رۆژانە سەردانمان دەكەن و بەڵێن بۆ سەرخستنی لیستی پارتیمان دووپات دەكەنەوە، ئەمەش مایەی دڵخۆشی ئێمەیە.
*چ بەرنامەیەكی گشتگیرتان هەیە بۆ ئەوەی كاندیدەكەی سنوورتان (نەهرۆ رواندزی) بە ژمارە 26 سەربخەن؟
- كاك نەهرۆ رواندزی، هەر ئێستا نا، بەڵكو كار و چالاكییە خێرخوازییەكان و هاوكارییە مرۆییەكانی بۆ خەڵكی ئەم دەڤەرە گەواهیدەری ئەوەیە كە كەسێكی خۆشەویست و دڵسۆز و متمانەپێكراوە، جگە لەوەش كاك نەهرۆ لە بنەماڵەیەكی كوردپەروەرە و متمانەپێكراون و شایستەی ئەوەیە لە شوێنێكی وەها خزمەتەكانی بەردەوامی پێبدات، ئێمەش لە سنووری لقی 26ـی گوڵان لە ماوەی رابردوو بە فەرمی كاندیدی سنوورمان بە جەماوەری خۆمان ناساند، وە لە هەموو كۆبوونەوەكان و لەگەڵ تەواوی ستافی ناوچەكانیش بەردەوام لەسەر هێڵین بۆ ئەوەی باشترین كار بكەین بۆ ئەوەی كاندیدی خۆمان ببێتە دەنگی یەكەم و هەموو هەوڵ و تێكۆشانیشمان بۆ ئەوەیە و گەشبینیشین كە كاك نەهرۆ رواندزی دەنگی یەكەم دەهێنێت.
*پێشتر لە هەندێك گوندەكانی باڵەكایەتی چەكدارانی پەكەكە هۆكاربوون بۆ نائارامی و تێكدانی ژیانی گوندنشینان و تەنانەت رێگربوون لە گەیاندنی هەندێك پڕۆژەی خزمەتگوزاری حكوومەتیش بۆ ناوچەكان، بەڵام لە ماوەی رابردوو هێزی پشتیوانی یەك لەم دەڤەرە جێگیركراوە، لەگەڵ جێگیركردنی ئەم هێزە ئێستا چەكداری پەكەكە ئەو مەترسییەیان لەم ناوچەیە ماوە؟
- لەراستیدا پێشتر بنكە و جموجۆڵی چەكدارانی پەكەكە لە هەندێك ناوچەی سنووری و گوندەكانیش وایكردبوو كە ژیانی خەڵك، ئاژەڵداران، جوتیاران لە مەترسیدابێت،  ئێستاش پەكەكە مەترسییە بۆ سەر هاووڵاتیان و حكومەتی هەرێم و هۆكارێكی سەرەكییە بۆ ئەوەی كێشەی مەزن بۆ هەرێمی كوردستان دروست بێت.
*با بێینە سەر هەندێك لە گۆڕانكارییەكان، بڕیاری ئیدارەی سەربەخۆی سۆران چ كاریگەرییەكی بۆ سنوورەكەتان هەیە و تاچەند بڕیارەكە گرنگ و دەستكەوت بوو؟
-ئەمە خەونی نەك تەنها ئێمە، بەڵكو ئومێدی هەموو تاكێكی سنووری ئەم قەزایانەیە كە سۆران كرایە ئیدارەی سەربەخۆ، ئەمە ئەو بەڵێنە بوو كە سەرۆك بارزانی لەپێشتردا بە خەڵكی ئەم دەڤەرەی دابوو كە لەگەڵ زاخۆ بڕیارەی ئیدارەی سەربەخۆی لەلایەن بەرێز مەسرور بارزانییەوە بۆ دەرچوو، بێگومان ئەم بڕیارە گرنگی و بایەخێكی زۆری هەیە و كاریگەری زۆرباشی لەسەر تەواوی سێكتەرەكانی حكوومەت هەیەو كارئاسانی بۆ خەڵك و تەواوی دانیشتووانی هەرچوار قەزاكانی دەوروبەریش دەكات.
*لە سنووری قەزای چۆمان و ناحیەكانی دەوروبەری حزب چی دەكات بۆ ئەوەی گۆڕانكاری لە پۆستە ئیدارییەكان بەردەوامی هەبێت؟
- لەگەڵ دەستبەكاربوونی كابینەی نۆیەم، گۆڕانكاری لە هەموو لایەكەوە دەستی پێكردوە و  ئەم پڕۆسەیەش بەردەوامی هەیە بۆ قەزا و شوێنەكانی دیكەش، بێگومان ئێمەش چەندجارێكیش لەگەڵ تیمی حكوومەت كۆبوونەوەمان كردووە تەنها داواكاری ئێمە ئەوەبووە ئەگەر گۆرانكاری بكرێت، دەبێت رەچاوی شیاوی و پسپۆڕی كەسەكان بكرێت و ئەولەویەت بدرێتە گەنج و لاوان بۆ ئەوەی پشت بە لێهاتوویی و تواناكانیان ببەستین و سوود لە وزەی ئەوانە وەربگرین، لە سنووری ئێمەش بۆ پۆستە ئیدارییەكانیش داوامانكردووە گۆڕانكاری بكرێت و هەتا دەكرێت كەسی شیاو و لێهاتووی دانیشتووی هەمان ناوچە دابندرێن ئەگەر ئەو كەسە لەو شوێنە نەبوو، ئینجا لە شوێنی دیكە كەسەكان دابندرێن.
*زۆرجار گلەیی ئەوە دەكرێت، كاتێك گۆڕانكاری دەكرێت كەسێك لە ناوچەیەكی دوور دێنن و پۆستی پێ دەدەن، كەچی كەسی شیاوی ئەو ناوچانە فەرامۆش دەكرێن؟
- بڕوا بكە زۆرجار تەئكید لەو خاڵە كراوەتەوە، سەرۆك بارزانی خۆی فەرموویەتی هەتا كەسێكی شیاو لەو ناوچەیە هەبێت بتوانن سوود لە توانای ئەو كەسە وەربگرن، ئەگەر كەسەكە نەدۆزرایەوە ئینجا پەنا بۆ شوێنێكی تر ببەن و سوود لە توانای كەسی دیكە وەربگرن، ئەگینا سەرۆك بارزانی خۆی پاڵپشتی لاوانە بۆ ئەوەی وزەكانیان بۆ خزمەتی كوردستان بخەنەگەڕ.
*ئێوە وەك نوێنەری پارتی دیموكراتی كوردستان لە ناوچەكە، چیتان لەبەرنامەدایە بۆ بنەماڵەی سەربەرزی شەهیدانی ئەم دەڤەرە؟
- پارتی هەمیشە خۆی بە قەرزداری بنەماڵەی سەربەرزی شەهیدان و پێشمەرگە قارەمانەكان دەزانێت، هەمیشە ئەوەی لە توانایدا بووبێت درێخی نەكردووە لە هەموو روێكەوە، بەڵام هەموو لایەك ئاگادارن شەڕی دژ بە تیرۆریستانی داعش و قەیرانی دارایی لە ماوەی ساڵانی رابردوو وایكردووە نەتواندرێت وەك پێشووتر پڕۆژە بۆ ئەم چینە قوربانیدەرە رابگەیەنین، ئەمە لەكاتێكدایە كە بەردەوام لەلایەن براگەورە و سەرۆكی هەرێم هەمیشە ئاوڕدانەوە هەبووە لە خێزان و ماڵباتی سەربەرزی شەهیدان، سەبارەت بە ماف و ئیمتیازاتەكانی وارسی شەهیدانیش بەدڵنیاییەوە پارتی دیموكراتی كوردستان پاڵپشتیانە و لە هەموو مافەكانیان لە داهاتوو بێبەش نابن.
*لە ماوەی رابردوو لە پۆستی حزبیدا هەندێك گۆڕانكاریتان لە سنووری لقی 26 ئەنجامدا، ئەم گۆڕانكارییانە بەردەوام دەبن؟
- ئێستا بۆ ئەنجامدانی پڕۆسەی هەڵبژاردن دەچین و لەلایەكی دیكەش پارتی كۆنگرەی لەپێشە، ئەگینا هەمیشە گۆڕانكاری كارێكی باشە، ئێمە بەردەوام لەگەڵ نوێبوونەوە و گۆڕانكاریداین لە كاری حزبیدا، ئێمە وەك كادری ئەم حزبە دەبێت گۆڕانكارییەكان بە شتێكی ئاساییی و نۆڕماڵ وەبگرین و لە داهاتووشدا بێگومان ئەم گۆڕانكارییانە بەردەوامی دەبێت، ئەمیش بە ئامانجی خۆنوێكردنەوە و هاتنە پێشەوەی سیمای تازەی لاوان.
*ئەگەر گۆڕانكارییەكان بەردەوام بوون، كادیری گەنجی ئەم ناوچەیە ئەولەویەتی پێدەدرێت بۆ ئەوەی بخرێتە ناو گۆڕانكارییەكان؟
-ئێمە پێمان باشە كادری خۆمان بەرەو پێش بچێت، سوپاس بۆ خوا كادری لێهاتوو و گەنجی بەتوانامان لە بارەگای لق و سنووری لێژنە ناوچەكاندا هەیە، ئیدی دوارۆژ بۆ ئەوانەیە كە بێنە پێشەوە و بەرپرسیارییەتی وەربگرن و خزمەتی ناوچەكانی خۆیان بكەن، چونكە ئەوان هیواو ئاواتی دوارۆژن و پێویستە ئەم ئەركە بخەنە سەرشان، دەبێت ئێمەش رێگەخۆشكەریان بین و مەجالیان پێبدەین بێنە پێشەوە بۆ ئەوەی لەناو رێكخراوەكان و ئۆرگانەكانی حزب پلەی بەرزتر وەربگرن و ببنە خزمەتكار و جێی متمانەی خەڵك، چونكە من متمانەم پێیانە و دەبێت وابكەن بێنە جێگای من.
*بەپێی زانیارییەكانی ئێمە جەنابتان داوای گواستنەوەتان كردووە، واتا گۆڕانكاری لە پۆستی بەرپرسی لقیش دەكرێت، سەركردایەتی پارتی چ وەڵامێكیان دایتەوە؟
- لەراستیدا ئەوكاتەی پێش پێنج ساڵ، كە سەركردایەتی پارتیمان بڕیاریدا وەك بەرپرسی لقی 26ـی گوڵان دەستبەكار بووم، من ئاگاداری ئەو بڕیارە نەبووم، هەر ئەوكات لە كۆبوونەوەیەك گووتم: هیوادارم بەهەمان شێوە دوای چوار ساڵ بڕیارێك بدەن من بچمە شوێنێكی دیكە، یان هەر ئەركێكی دیكەم پێ بسپێرن، یان ببمەوە پێشمەرگەی جەنابی سەرۆك، ئیدی بە بڕوای من هەر كەسێك خۆی خۆشبوێت نابێت رێگە بدات دوای چوار ساڵ لە ئەركەكەی زیاتر بەردەوام بێت، بۆیە كەسی دیكە هەیە بۆ ئەوەی لەشوێنی من خزمەتی زیاتری ئەم پارتە لەم دەڤەرە بكات و ئەركەكانی جێبەجێ بكات، من داوام لە جەنابی سەرۆك و سەركردایەتی پارتی كردووە و جەنابی سەرۆكیش بە سوپاسەوە داواكەی منی قبوڵ كردووە، بۆ ئەوەی كەسێكی دیكە لە شوێنی من ئەركەكانی جێبەجێ بكات و بەرپرسیارییەتی وەربگرێت لەم پۆستە.
*كەی بڕیارەكە جێبەجێ دەكرێت؟
- بڕیار بڕیاری جەنابی سەرۆكە و كەی پێمان بگات، جێبەجێی دەكەین.
*تا ئێستا هیچ كەسێك، ناوێك دەستنیشانكراوە بۆ ئەوەی ئەم پۆستە وەربگرێت؟
- تا ئێستا ئەوەی هەیە هیچی فەرمی نییە، تەنها قسەیە، هیوادارم لە داهاتوویەكی نزیك كەسێك دەستنیشان بكرێت و بێتە ئەم دەڤەرە و خزمەتی خەڵكە خۆشەویستەكەی باڵەكایەتی بكات.
*بەڕای ئێوە ئەوەی كە دادەندرێت لەشوێنێكی دیكەوە دێت، یان هەر لە باڵەكایەتی دەستنیشان دەكرێت؟
-ئەو داوا و پەیامەی من بە سەرووی خۆم گەیاندووە، خەڵك و كادری باش لەم ناوچەیە هەیە و سەركردایەتی دەتوانێت لە توانا و لێهاتوویی خەڵكی دەڤەرەكە سوود وەربگرێت، ئەوەش دەگەڕێتەوە بۆ بڕیاری سەركردایەتی پارتیمان و ئێمەش هەموومان پێیەوە پابەند دەبین.
*لەو  ماوەیەی لەم پۆستەدا بوویت، خەڵكی ناوچەكە لەگەڵ ئێوە چۆن بوون و چۆن هاوكارت بوون؟
-من ماوەیەك بوو لێرە دەستبەكار بووم، لە كۆبوونەوەیەكدا لەگەڵ جەنابی سەرۆك و كاك نێچیرڤان و كاك مەسروور بارزانی گووتم: ئەگەر (حەسەن حەدۆ) شەو و رۆژ خزمەتی دەڤەری باڵەكایەتی بكات، ناتوانێت مافی یەك منداڵی بچووكی ئەو دەڤەرە بدات، چونكە لە رووی خانەدانی و كوردایەتی و دڵسۆزی، وە لە ساڵانی پێشوو تا ئێستاش خەباتیان كردووە و قوربانیان بۆ ئەم رێبازە داوە و بۆچوونێكی كوردانە كۆی كردوونەتەوە و ئامادەن بمرن، بەڵام ئامادەنین لەژێر زوڵم و ستەم بژین. بۆیە من كە هاتم وەك خزمەتكاری خەڵك هاتم و خەڵكیش بە لەخۆبوردوویی و بە ئەمەكەوە پاڵپشتم بوون، ئەمە مایەی شانازییە كە ئەو چەند ساڵەم لێرە بەڕێ كردووە و هەرگیز رێز و خۆشەویستی خەڵكی باڵەكایەتی لەبیر ناكەم.
*واتا پێویستە زیاتر خزمەتی ئەو خەڵكە بكرێت كە قوربانی زۆریان لەپێناو هێنانەكایەی ئەم كوردستانە داوە؟
- ئەم ناوچەیە راستە قوربانی زۆری داوە، بەڵام حكوومەتی هەرێمیش كاری زۆرباشی ئەنجامداوە لێرە، لەدوای ئەم قەیرانە داراییەش كە جەنابی سەرۆك بارزانی سەردانی چۆمانی كرد، ئێستاش ئەو كاروپڕۆژانەی لێرە ئەنجام دەدرێن و بەدواداچوونیان بۆ دەكرێت هەمووی دەگەڕێتەوە بۆ بەڵێنەكانی جەنابی سەرۆك لەم سەردانەیدا بۆ باڵەكایەتی،  لەم هەفتەیە كە وەزیری تەندروستی هاتە ئەم ناوچەیە جێبەجێكردنی هەمان بەڵێنی سەرۆك بارزانی بوو بۆ خەڵكی بە ئەمەكی باڵەكایەتی، چونكە سەرۆك بارزانی خۆشەویستییەكی زۆری بۆ باڵەكایەتی هەیە و خۆی بە تاكێكی ئەم ناوچەیە دەزانێت. بەردەوامیش لێژنەكانی ئەنجوومەنی وەزیران بەدواداچوون بۆ ئەو بەڵێنانە دەكەن كە جەنابی سەرۆك بارزانی بە خەڵكی ئەم ناوچەیەی داوە بۆ ئەوەی خزمەتی خەڵكی بكرێت، ئەوەی كە لە بەرنامەدایە پرسی چاكردنی رێگای سەرەكییە، لەگەڵ راكێشانی هێڵی 132 كەیڤی بۆ چۆمان، لەگەڵ گرنگیدان بە كەرتی گەشتوگوزار و بواری كشتوكاڵی لە ناوچەكەدا.
*بەڵام چینی رۆشنبیران و رێكخراوەكان لەم ناوچەیە گلەیی لە جێبەجێنەكردنی هۆڵێكی داخراوی كۆڕ و سمینار دەكەنەوە كە جەنابی سەرۆك بارزانی بەڵێنی بە خەڵكی ناوچەكەدا؟
- راستە، هەر ئەوكات جەنابی سەرۆك بارزانی فەرمووی ئەگەر زەوی گونجاو هەبێت سبەی ئەندازیار دەنێرم بۆ ئەنجامدانی پڕۆژەكە، ئیدی دوای ئەوە شوێنێكیان دەستنیشانكرد و تیمی حكوومەت سەردانیان كرد شوێنەكە كێشەی هەبوو و دوور بوو لە سەنتەری شار، بۆچوونێك هەبوو كە پڕۆژەكە نزیك سەنتەری شار بێت و پڕۆژەكەش پێویستی بە رووبەرێكی زۆری زەوی هەیە، ئیدی هەر كاتێك ئەمە چارەسەر كرا، ئەمە لە بەرنامەی تیمی ئەنجوومەنی وەزیراندایە و پڕۆژەكە جێبەجێ دەكرێت.
*با دوا پەیامت بۆ خەڵكی ئەم ناوچەیە بزانین لەم پۆستە؟
- تەنها ئەوە دەڵێم، جوامێریان، خانەدانیان، كوردپەروەری و موخڵیسیان بۆ رێبازی پارتی و بارزانی لەبیر ناكەین، من پێشئەوەی بێمە ئێرە كەمتر تێكەڵاوی خەڵكی ئەم ناوچەیە ببووم، بەڵام دوای دەستبەكاربوونم تێگەیشتم كە چ خەڵكێكی بە ئەمەك و بەرێز و شۆڕشگێر لەم ناویە هەن، ئافرەتەكانیان چ شێرە ژنێكن و  شایستەی هەموو خزمەتێكن بۆیان بكرێت، ئەو نەوەیەی لێرەش پێگەیشتووە جێگای ئومێدن بۆ دوارۆژی كوردستان و پێویستە بایەخی جددیان پێ بدرێت.

 

زۆرترین بینراو