كێشەی ئاوی چۆمان چارەسەر دەكرێت

كێشەی ئاوی چۆمان چارەسەر دەكرێت

موڕشید برادۆستی – چۆمان : ماوەی چەندین ساڵە سەنتەری قەزای چۆمان و دەورووبەری كێشەی ئاوی خواردنەوەیان هەیە، قایمقامی ناوچەكەش دەڵێت " زیاتر لە یەك ملیار بۆ چارەسەر كردنی گرفتی ئاو دابین كراوە .
سەرچاوی ئاوی چۆمان لە كوێستانەكانی ناوچەكە سەرچاوە دەگرێت و لە ژێر كەوی بەفر و كانیاوەكان هەڵدەقولێت لەگەڵ ئەمەشدا هێشتا گرفتی ئاوی خواردنەوە لە ناوچەكە بە دی دەكرێ.
ماوەیەك بەر لە ئێستا بەهۆی تووانەوەی بەفر ئاوی قەزای چۆمان رەنگی گۆڕاوە و لێڵ و شێلوو بووە، ئەمەش نیگەرانی هاووڵاتییانی دەڤەرەكەی لێ كەوتۆتەوە، بەڕێوەبەری ئاوی ناوچەكەش دەڵێت" زیاتر لە 10 مەتر بەفر لە سەر و چاوەی ئاوەكەدا هەیە .
رەحمان سولێمان یەكێكە لە دانیشتوانی سنووری چۆمانە بە زاری كرمانجی گووت " ماوەی بیست ساڵە لە چۆمان دەژین، بە بەردەوام كێشە و گرفتی ئاوی خواردنەوە لەو قەزایەدا هەیە و تا ئێستا چارەسەر نەكراوە، وێڕای هەبوونی ئاوێكی زۆر لە سەرووچاوەكە كەچی لە ناو سەنتەری شار و گەڕەك و كۆڵانەكان بەردەوام كێشەی هەیە و ماوە ماوە ئاوی خواردنەوەمان تێكدەچێت، داوا دەكەین پەلە بكرێت لە چارەسەر كردنی ئاوی خواردنەوەمان .
رەهند ئەحمەد گەنجێكی چۆمانە بە زاری كرمانجی گووت " ماوەیەك بەر لە ئێستا رۆژانە كاتێك ئاوی سەرەكیمان بۆ دەهات قوڕاو داتە نێو تانكیەكانمان، ئەمە جیا لەوەی ئاوەكە بۆ خواردنەوە و چێشت لێنان و چا سوودی لێنەدەبینرا، لە هەمان كات تانكی و بۆریەكانیشیمان هەمووی پڕ بووە لە قوڕ و لیتە . چەندین ساڵە ئەمە حاڵی دانیشتوانی چۆمانە و بەدەست خراپی ئاو و گرفتەكانی دەناڵێنن و تا ئێستا چارەسەر نەكراوە. لە رێگەی زاری كرمانجی داوای لە حكومەت كرد چارەسەرێك بۆ گرفتی ئاوی چۆمان بدۆزنەوە و تا رزگاریان بێت لە كەم ئاوی و كێشە و گرفتەكان .
لەلای خۆشیەوە، ئازاد مستەفا بەڕێوەبەری فەرمانگەی ئاوی چۆمان بە زاری كرمانجی گووت " ئاوی سەرەكی چۆمان ئاوی كانیاوەكانی كوێستانی پژێ یە لە دەڤەری باڵەكایەتی، بەهۆی تووانەوەی بەفر لە كوێستانەكە ئاوەكە جار بەجار شێلوو دەبێت و تا مانگی دووای مانگی شەشی هەموو ساڵێك رووبەڕووی ئەو كێشەیە دەبینەوە، ئەمەش تەنها لە چۆمان نییە و لە زۆر شوێنی تر ئاو ئەو كاتانەی ساڵ ئاوی كانیاوەكان رەنگی دەگۆڕێت و شێلوو دەبێت .
زیاتر گووتی " رۆژەك نا رۆژێێك بۆ ماوەی چەند سەعاتێك ئاوی خواردنەوە بەسەر هاوونیشتیمانیان و بەشدار بووانی ئاو لە چۆمان دابەش دەكەین . هۆكاری سەرەكی لێڵ بوون و شێلوو بوونی ئاوەكە تووانەوەی بەفرە لە سەر و چاووەی ئاوی سەرەكی، كە لە كوێستانی پڕژێ سەرچاوە دەگرێت، بە سێ قۆناغ و حەوز و فلتەر تێدەپەڕێ تا دەگاتە ماڵان و ئاوەكە هیچ خیز و قوڕ و لیمی لەگەڵ نییە تەنها رەنگی گۆڕاوە ئەویش هۆكارەكە بۆ تووانەوەی بەفر دەگەڕێتەوە .
گووتیشی " خەلكی دەڤەرەكەمان تا رادەیەك هۆكارە بۆ كەم بوونەوەی ئاو، چونكە دەستی پێوەناگرن و زیاد لە پێویست ئاو بە فیڕۆ دەدەن، بەشێوەیەكی گشتی نیوەی ئاوی چۆمان بە فیڕۆ دەچێت، بۆیە هەوڵی تەواو دەدەین بۆ دابین كردن و دانانی پێوەری ئاو، بەو شێوەیە نەبێ ناتوانین كێشەی ئاو لێرە بنبڕ بكەین .
شایەنی باسە، لە سنووری فەرمانگەی ئاوی چۆمان زیاتر لە چوار هەزار بەشدار بووی هەیە، لە نیوان دوو رۆژ جارێك ئاو بەسەر بەشدار بووان و ماڵان دابەش دەكرێت و سەختی ناوچەكە هۆكارە بۆ درەنگ چاككردنەوەی شكان و خراپ بوونی ئاوی سەرەكی .
لەلای خۆشیەوە، ئەحمەد قادر قائیمقامی قەزای چۆمان بە زاری كرمانجی راگەیاند" دوای هەوڵ و كۆششێكی بەردەوامی قائیمقامیەتمان، بەمەبەستی چارەسەر كردنی كێشەی پڕۆژەی ئاوی پڕژێ، كە ساڵانە كێشەو گرفتێكی زۆری بۆ سەنتەری قەزاكەمان دروست دەكرد، قائیمقامیەتی قەزاكەمان لەڕێگەی پەیوەندی و بەدوواداچوونی بەردەوام بۆ گەیاندنی كێشە و گرفتەكانی ئەو پڕۆژەیە، توانرا لەڕێگەی دەرخستەیەكی تایبەتەوە ڕەزامەندی سەرۆكایەتی ئەنجومەنی وەزیرانی حكومەتی هەرێم بۆ تەمویل كردنی بڕی ( 1,878,058,500) یەك ملیار و هەشت سەدو حەفتاو هەشت ملیۆن و پەنجاو هەشت هەزارو پێنچ سەد دینار، بۆ نۆژەن كردنەوە چارەسەركردنی پڕۆژەی ئاوی پڕژێ ڕەزامەندی وەربیگرێ.
قائیمقامی چۆمان گووتیشی " لێرەوە سوپاسی تایبەتمان بۆ هەر یەك لە سەرۆكایەتی ئەنجومەنی وەزیران و وەزارەتی شارەوانی و پارێزگای هەولێر و بەڕێوەبەرایەتی گشتی ئاوو ئاوەڕۆو بەڕێوەبەرایەتی ئاوی دەوروبەری هەولێر دەكەین. هەوڵ و ماندووبوونەكانی رێزار فرسەت سۆفی وەك پاڵپشت و خەم خۆر كە لەپشتمان بوو بۆ ڕەزامەندی وەرگرتنی چارەسەر كردنی ئەو پڕۆژەیە بەرز دەنرخێنین.
ئەحمەد قادر دووپاتی دەكاتەوە، لێرەوە بە هاووڵاتیانی قەزاكەمان ڕادەگینین كە هەوڵەكانمان بەردەوامی دەبن بۆ خزمەتكردنیان لە داهاتوودا بەهیمەتی هەموو لایەك دەستمان تونددەكەین بۆ ڕاكێشانی باشترین پڕۆژەی خزمەتگوزاری، كە خۆڕاگری و ئارامی هاووڵاتیانمان زیاتریان شایستەیە.
چۆمان لە رووی كارگێڕییەوە سەر بە پارێزگەی هەولێرە و بەدووری 160 كم لە باكووری شاری هەولێر هەڵكەوتووە و ساڵی 1970 بووەتە قەزا و چوار ناحیەی هەیە .

 

زۆرترین بینراو