وەرزش لە لێواری مەرگدا بوو

وەرزش لە لێواری مەرگدا بوو

رەمەزان هەرنی– دهۆك: بەهۆی پەتای كۆڕۆنا ماوەیەكی درێژە گشت كارو چالاكیەكانی وەرزشی لە كوردستان وەستاون و هیچ وادەیەك بۆ دەستپێكردنەوەی دیارینەكراوە، یاریزانەكان پەلەیانە لە نێو یاریگە راهێنان بكەن, بەڵام كۆڕۆنا رێگرە لەبەر دەم حەزو ئارەزووی یاریزانانی یانەی وەرزشی ئافرەتانی دهۆك.
چریسك یونس، سەرۆكی یانەی وەرزشی ئافرەتانی دهۆك بە زاری كرمانجی راگەیاند" ئەمساڵ بەگشتی كۆڕۆنا زیانی گەیاندۆتە گشت بوارەكانی ژیان و وەرزشیش بێبەش نەبوو لەو زیانانەی ئەمساڵی جیهان و هەرێمی كوردستانیشی گرتۆتەوە، پێش بڵاوبوونەوەی كۆڕۆنا وەرزش لە لێواری مەرگدا بوو, كۆڕۆناش تەواوی كرد, لە كوردستان پێش بڵاوبوونەوەی كۆرۆنا ئاستی وەرزش گەیشتبوو ئاستی سفرو لێواری مەرگ لەگەڵا هاتنی كۆرۆنا وەرزش مردووە بەڵام كەس نەی ناشتووە".
گوتیشی" سەرەڕای مەترسی كۆڕۆنا بەڵام یانەی وەرزشی ئافرەتانی دهۆك چالاكیەكانی لە ئاستێكی باڵا دابوون, لە رۆژانی رابردوو بەهۆی ئەوەی چالاكیەكان لەناو یاریگە نەماون, بەڵام بەرێگەی ئۆنڵاین گشت كارەكانمان و وانەكانی پەیوەست بە وەرزش خوێندومانەو بەردەوامین، لەم ماوەیەدا زۆرترین چالاكیمان ئەنجامداوە بەشێوەی ئۆنڵاین رۆژانە لەسەر ئاستی باڵا وانەكانمان پێشكەشی یاریزانەكان و راهێنەران دەكردن, لە هەمانكاتدا یاریزانەكانمان بەشداری خولێك بوون لە وڵاتی تونس بەرێگەی ئۆنڵاین, ئاستی یانەی وەرزشی ئافرەتانی دهۆك لە چاو یانەكانی تر لە سەردەمی كۆڕۆنا زۆر بەرزتر بوو".
ئەوەشی خستەڕوو" ئێمە وەكو كارگێری یانەی وەرزشی ئافرەتانی دهۆك چاوەرێی بڕیارەكانی یەكێتی تۆپی پێی كوردستان دەكەین تا ژیان ئاسایی نەبێتەوە ناتوانین راهێنان ئەنجام بدەین بەڵام بەگشتی ئێمە لە ئامادەكارییەكانمان بەردەوامین یاریزانەكان لەماڵەوە راهێنان دەكەن بۆ ئەوەی لە وەرزش دوورنەكەونەوە, تەنیا ماوە راهێنان لەناو یاریگە ئەنجام بدەین بۆ ئەو مەبەستەش چاوەرێی بریاری یەكێتی تۆپی پێی كوردستان دەكەین, ئێستاش لەبەر گرنگی تەندرووستی یاریزان و راهێنەران مەشقەكان ئەنجام نادەین, لەبەر ئەوەی تەندرووستی یاریزان و راهێنەران لەسەرووی هەموو شتێكەوەیە, هەر كاتێكیش مەترسی پەتای كۆڕۆنا نەما ئامادەكاریمان هەیەو لە نێو یاریگە مەشقەكان ئینجام دەدەین".
یانەی وەرزشی ئافرەتانی دهۆك ساڵی 2007 دامەزراوە, ساڵی 2009 بە بڕیارێك سركرا بەهۆكارێكی گشتی و ساڵی 2019 سەر لەنوێ‌ كارا كرایەوە.

زۆرترین بینراو