Zarikrmanji.com || ده‌زگای زاری كرمانجی

ئەمڕۆ دووشەم یارییەكانی گەڕی 14ی خولی تۆپی پێی یانە پلە یەكەكانی كوردستان دێتە ئەنجامدان و پێشبینیی گۆڕانكاری لە ریزبەندییەكەدا دەكرێ.خولی یانە پلە یەكەكانی كوردستان بەرەو قۆناغەكانی كۆتا دەڕوا و ململانێی یانەكان تێیدا بەهێز بووە و ئەمڕۆ دووشەم سات 14:30 بەكاتی ناوەخۆ 9 یاریی لە خولەكەدا دێتە ئەنجامدان.یانەی دهۆك كە لە پلەی یەكەمی ریزبەندی خولەكەیە بە 27 خاڵ، لە یاریگەی خۆیدا رووبەڕووی یانەی خاك دەبێتەوە. یانەی دهۆك كە وەرزی رابردوو لە پلە نایابەوە بۆ خولی پلە یەك دابەزی، هەموو هەوڵێكی بۆ ئەوەیە یارییەكە بباتەوە و لە سەرووی ریزبەندییەكەدا بمێنێتەوە بۆ ئەوەی وەرزی داهاتوو بگەڕێتەوە ریزی یانە نایابەكانی كوردستان.لە یارییەكی تردا هەر لە شاری دهۆك، یانەی سێمێل لە یاریگەی خۆی مێوانداریی یانەی دەربەندیخان دەكات، سێمێل لە پلەی دووەمە و وەك دهۆك 27 خاڵی هەیە، بۆیە هیوای زۆرە بتوانێ لە وەرزی داهاتوو ببێتە نوێنەرێكی تری شاری دهۆك لە خولی نایابی كوردستاندا.لە شاری سلێمانی یانەی سیروانی نوێ كە ئەویش پارساڵ لە پلە نایابەوە گەڕایەوە پلە یەك، لە یاریگەی خۆیدا مێوانداریی یانەی چەمچەماڵ دەكا.لای خۆیەوە یانەی برایەتی كە بە 26 خاڵ لە پلەی سێیەمە رووبەڕووی یانەی كۆیە دەبێتەوە، یانەی كۆیە لە پلەكانی كۆتای ریزبەندە و لە ناوچەی مەترسیی دابەزینە بۆ پلە 2ی كوردستان، بۆیە پێشبینیی دەكرێ یارییەكی بەهێز بێ.فارووق خدر راهێنەری یانەی برایەتی لەبارەی ئامادەكاریی تیپەكەیەوە بە ئاژانسی كوردستان بۆ دەنگوباس (ئاكانیوز)ی گوت، بەشێوەیەكی باش خۆمان بۆ یارییەكە ئامادە كردووە و هەوڵ دەدەین سەركەوتن تۆمار بكەین، ئاماژەی دا یارییەكە لە یاریگەی خۆمانە و ئەمەش هۆكارێكی باشە بۆ بردنەوەی 3 خاڵی یارییەكە. لە یارییەكی تردا، یانەی ئاڵا كە لە پلەی چوارەمی ریزبەندییە بە 25 خاڵ و ڕكابەریی بۆ بەدەستهێنانی پلەكانی یەكەم و دووەم دەكا، لە یاریگەی خۆیدا لە هەولێر رووبەڕووی یانەی خانەقین دەبێتەوە، یانەی ئاڵا ئەنجامەكانی باشن و ئامادەكاری باشیان هەیە لە خولەكەدا.تەها قادر راهێنەری یانەی ئاڵا بە (ئاكانیوز) گوت، یارییەكە بۆ ئێمە زۆر گرینگە و بە بردنەوەمان هەلی ئەوەمان بۆ دەڕەخسێ بگەینە پلەكانی پێشەوە، چونكە ركابەرەكانمان (دهۆك و سێمێل) یاریی بەهێزیان هەیە و ئەركیان ئاسان نییە.زیاتر گوتی، هەرچەندە خۆمان بۆ یارییەكە ئامادە كردووە، بەڵام 3 یاریكەری سەرەكیمان لە یارییەكەدا بەشداریی نابن ئەوانیش شەیدا حوسێن و عەبدوڵا عەزیز بەهۆی وەرگرتنی 2 كارتی زەرد و ڕێبەر چەتۆش بە هۆی ئەنگاوتنەوە. لە لایەكی تر لە شاری سلێمانی هەردوو یانەی ئاشتی و سۆلاڤی نوێ بەیەك دەگەن.لە شارۆكەی هەڵەبجەی شەهیدیش یارییەكی بەهێز لەنێوان یانەكانی هەڵەبجە و سۆران دێتە ئەنجامدان.فازڵ عەباس راهێنەری یانەی سۆران گوتی، هەردوو تیپ بۆ بردنەوە و بەدەستهێنانی 3 خاڵ یاریی دەكەن، ئاماژەی دا ئێمە بەشێوەیەكی باش ئامادەی یارییەكەین و هەوڵی سەركەوتن دەدەین، لەگەڵ ئەوەشدا هەر تیپێك باشتر یاریی بكا و هەلی گۆڵكردن لە دەست نەدات، براوە دەبێ.زیاتر گوتی، یاریكەرانی تیپەكەمان بەگشتی ئەزموونیان كەمە و پێویستمان بەكاتە بۆ پێگەیشتنیان، هەروەها چەند كەموكوڕییەكمان لە هەندێك بەشی تیپەكە هەیە، بەڵام بەپلانێكی هونەری تایبەتەوە كەموكوڕییەكانمان چارەسەر كردووە. لای خۆیەوە یانەی مەخموور، كە ترسی دابەزینی بۆ پلە دووەكان لەسەرە لە یاریگەی خۆیدا بەرامبەر یانەی ئاسۆ یاریی دەكا. خولی تۆپی پێی یانە پلە یەكەكانی كوردستان لە لایەن یەكەتیی تۆپی پێی كوردستانەوە رێك دەخرێ و بە بەشداریی 18 یانە دێتە ئەنجامدان، سەرجەم یارییەكانیش بەشێوازی خول و بەقۆناغ ئەنجام دەدرێ.دوای كۆتایی هاتنی خولەكە 2 یانەی خاوەن پلەكانی یەكەم و دووەم بۆ خولی پلە نایابی كوردستان سەردەكەون و 2 یانەی كۆتای ریزبەندییەكەش بۆ خولی پلە 2 دادەبەزن.

یانەی مانچستەر یونایتد یەكسانبوونێكی دراماتیكیی بەئەنجامی 3-3 لەگەڵ یانەی چێڵسیدا تۆمار كرد، لەو یارییەدا كە ئەمڕۆ یەكشەم لە چوارچێوەی یارییەكانی گەڕی 24ی خولی تۆپی پێی ئینگلتەرا (پریمەر لیگ) لە یاریگەی "ستامفۆرد بریدج" هاتە ئەنجامدان.لەو یارییەدا چێڵسی بە3 گۆڵ پێشكەوت كە جۆنی ئیڤانز لە خولەكی 36 (بەهەڵە گۆڵی لە تیپی خۆی كرد) و خوان ماتا لە خولەكی 46 و دێڤد لویز لە خولەكی 50دا تۆماریان كرد.بەڵام مانچستەر یونایتد توانی لە رێگەی 2 گۆڵی واین رۆنیی هێرشبەری لە رێگەی 2 لێدانی سزاوە لە خەلەكەكانی 58 و 70 كە یەكێكیان گومانی لەسەر بوو و خاویێر هێرناندز لە خولەكی 84دا، ئەنجامی یارییەكە یەكسان بكاتەوە. مانچستەر یونایتد بەو یەكسانبوونە، كۆی خاڵەكانی خۆی گەیاندە 55 خاڵ و بەجیاوازیی 2 خاڵ لەگەڵ مانچستەر ستیی پێشەنگ، لە پلەی دووەمی ریزبەندی خولی ئینگلتەرا مایەوە، هاوكات چێڵسی كۆی خاڵەكانی خۆی گەیاندە 43 خاڵ و هاتە پلەی چوارەمی ریزبەندەكە.لە یارییەكی تری ئەمڕۆ نیوكاسڵ یونایتد بەئەنجامی 2-1 توانی لە ئەستۆن ڤێلای مێوانی بباتەوە و بە كۆكردنەوەی 42 خاڵ بێتە پلەی پێنجەم.

سكرتێری یانەی وەرزشیی هەولێر ئاشكرای كرد ئەمڕۆ یەكشەم گرێبەستیان لەگەڵ دوو یاریكەری سووریایی و ئۆگەندایی ئیمزا كردووە و لە هەوڵی ئەوەدان یاریكەرێكی لبنانییش بێننە یانەكەیانەوە.مەحموود عەزیز بە ئاژانسی كوردستان بۆ دەنگوباس (ئاكانیوز)ی گوت، ئەمڕۆ گرێبەستمان لەگەڵ دوو یاریكەری بیانیدا ئیمزا كرد، بۆ ئەوەی لە خولی بژاردەی عێراق و تاسی یەكەتیی یانەكانی ئاسیا بۆ یانەكەمان یاری بكەن، گرێبەستی یەكەممان لەگەڵ یاریكەری سووریایی عەبدولڕەزاق حوسێن بوو كە لە یانەی تەعاونی سعودیایی یاریی دەكرد، گرێبەستەكەی بە بڕی 83 هەزار دۆلاری ئەمەریكایییە و بۆ ماوەی یەك وەرزە، بەشێكی پارەكەی پێشەكی و ئەوی تر بە شێوەی مووچەی مانگانە پێ دەدەرێ، ئەو یاریكەرە لە هێڵی ناوەڕاست یاری دەكا و ئاستێكی بەرزی هەیە.زیاتر گوتی، گرێبەستی دووەممان لەگەڵ یاریكەری ئۆگەندایی ئیڤان بۆكیت بوو كە ئەویش بۆ ماوەی 8 مانگ بۆ یانەی هەولێر یاری دەكا بەرامبەر بە 70 هەزار دۆلار، ئەویش بەشێكی پارەكەی وەردەگرێ و ئەوی تریشی بە شێوەی مووچە پێی دەدرێ، ئەو یاریكەرە لە هێڵی بەرگری یاری دەكا و هێز و توانایەكی زۆری هەیە.سكرتێری یانەی هەولێر ئەوەشی ئاشكرا كرد، لە هەوڵی گفتوگۆ و رازیكردنی یاریكەری هەڵبژاردەی تۆپی پێی لبنان (مەحموود ئەلعەلی)داین، كە لە یانەی عەهد یاری دەكا، داوامان لێ كردووە بە شێوەی خواستن یاریمان بۆ بكا، بەڵام تا ئێستە نەگەیشتووینەتە رێككەوتن، چونكە ئەو یاریكەرە داوای پارەیەكی زۆری كردووە، بەڵام هەوڵ دەدەین لەگەڵیدا رێك بكەوین، چونكە یاریكەرێكی ئاستبەرزە و لە هەردوو هێڵی ناوەڕاست و هێرشبردندا یاری دەكا.هەژیی گۆتنە ئەو یاریكەرە لە یانەی رەیانی قەتەریش یاریی كردووە.یانەی هەولێر حەوتووی رابردوو گرێبەستی لەگەڵ دوو یاریكەری تر ئیمزا كرد، ئەوانیش برێتی بوون لە هەرێم بورهان كەلاری یاریكەری یانەی پێشمەرگەی سلێمانی و نەدیم سەباغ یاریكەری یانەی جەیش و هەڵبژاردەی سووریا.یانەی هەولێر لە هەوڵی بەردەوامدایە بۆ بەهێزكردنی ریزەكانی بۆ خۆئامادەكردن بۆ پاڵەوانیەتیی تاسی یەكەتیی یانەكانی ئاسیا لە تۆپی پێ بۆ ساڵی 2012 كە لە مانگی ئادار/مارسی داهاتوو یارییەكانی دەست پێ دەكەن و تێیدا یانەی هەولێر لە قۆناغی گرووپەكاندا، لە گرووپی دووەمدا رووبەڕووی یانەكانی كازمەی كوێتی، ئێست بەنگالی هیندی و عرووبەی عومانی دەبێتەوە.

ئێوارەى ئەمڕۆ یەكشەم لە میانی یارییەكانى حەوتووى یەكەمی خولی تۆپی پێی یانە نایابەكانى عێراق كۆمەڵەى باكور، یانەى سلێمانى بە ئاسانی 3 خاڵی وەرگرت. یارییەكە دەبوو لە یاریگەى سلێمانى بێتە ئەنجامدان لە نێوان یانەى سلێمانى و یانەى سەورە، بەڵام بە هۆى ئامادەنەبوونی یانەى سەورە ناوبژیوان فیكەى كۆتاهاتنی یارییەكەی لێ دا بە ژماردنی بردنەوەى یارییەكە لە بەرژەوەندیی یانەى سلێمانى بە ئەنجامى (3 – سفر) گۆڵ. دواى یارییەكە خەسرەو گورون راهێنەرى یانەى سلێمانى بە ئاژانسی كوردستان بۆ دەنگوباس (ئاكانیوز)ى راگەیاند، تیپەكەمان بە پێكهاتەیەكی لاو و بە راهێنانێكی زۆرەوە بەشداریمان كردووە، ئومێدمان گەیشتنە بە ریزی یانە بژاردەكانى عێراق. یانەكانى كۆمەڵەى باكور برێتین (سلێمانى، سەورە، ئاڵا، پێشمەرگەى سلێمانى، غاز شیمال، دووزخورماتوو ). لاى خۆیەوە سەڵاح محەمەد كەریم ئەندامى لێژنەى شارەزایانی یەكەتیی ناوەندیی تۆپی پێی عێراق لەبارەى شێوازى خولەكە روونی كردەوە، ئەم خولە بە بەشداریی 50 یانەیە كە دابەش كراون بەسەر 6 كۆمەڵەدا، یارییەكان بە شێوازى چوون و هاتن بەڕێوە دەچن و لە هەر كۆمەڵەیەك 2 یانە سەردەكەوێ بۆ قۆناغی كۆتا، هەروەها دواى تەواوبوونی یارییەكانى قۆناغی كۆتا 2 یانە سەردەكەون بۆ ریزی یانە بژاردەكانى عێراق. خولی تۆپی پێی یانە نایابەكانى عێراق بە سەرپەرشتیی یەكەتیی ناوەندیی تۆپی پێی عێراق بەڕێوە دەچێ.