Share on facebook
یانەی وەرزشی رواندز و سنوور، كۆنفرانس و هەڵبژاردنی خۆیان ئەنجامدا
دووشەممە, 13 تشرینی دووەم 2017 12:40

ZKW: جەلال سەعید – لێژنەی سەرپەرشتی هەڵبژاردنی یانە وەرزشییەكانی سنووری پارێزگاری هەولێر دوای ئەوەی كۆنفرانس و هەڵبژاردنی یانەی وەرزشی رواندزی لە رۆژی 14-9-2017 بەهۆی چەند كێشە و گرفتێك لە نێوان ئەندامانی كۆنفرانس و كاندید و پالێوراوان بریاریدا هەڵبژاردنی یانەكە دوا بخرێت، جارێكی لە هەفتەی رابردوو بەئامادەبوونی لیژنەی سەرپەرشتی كۆنفرانسەكان و ئەندامانی دەستی گشتی و دامەزرێنەری یانەی رواندز لە هۆڵی وەرزشی رواندز كۆنفرانس و هەڵبژاردنی دەستەیەكی نوێ‌ بۆ یانەی وەرزشی رواندز ئەنجامدرا.
پاش كردنەوەی دەرگای خۆ پالاوتن و كاندیدكردن بۆ دەستەی نوێی یانەكە 11 كەس خۆیان پالاوت و لە كەش و هەوایەكی هێمن و ئارامدا پرۆسەی دەنگدان بەشێوازێكی رێك و بە گیانی وەرزشی بەرێوە چووە.
لە ئەنجامی جیاكردنەوەی دەنگەكان هەر یەك لە رزگار شێركۆ و عیسا محەمەد و تەها عەزیز و حوسێن حەسەن و فارس عەولا و جەبار رەحمان و رێبوار جەلال دەرچوون و دەنگی متمانەی زۆرینەی ئەندامانی كۆنفرانسیان بە دەست هێنا.
لە یەكەم كۆبونەوەی خۆشیاندا عیسا محەمەد بە سەرۆكی یانەی رواندز دیاركراو هەریەك لە حوسین حەسەن بە جێگری سەرۆك و تەها عەزیز بە سكرتێر و رزگار شێركۆ بە دارایی و فارس عەولا و جەبار رەحمان و رێبوار جەلال بە ئەندام دەست نیشانكران.
لەلایەكی تردا لە سۆران و لە هۆڵی دەزگای ئەیلوول یانەی وەرزشی سنوور بە ئامادەبوونی ئەندامانی كۆنفرانس و لێژنی هەڵبژاردنی یانە وەرزشییەكانی سنووری پارێزگای هەولێر، كۆنفرانس و هەڵبژاردنی یانەی سنوور بەرێو چوو.
دوای ئەوەی لیژتەی سەرپەرشتی هەڵبژاردنی یانەكان رێنمای و شێواز و سیستەمی خۆ پالاوتن و كاندیدكردن بۆ دەستەی نوێی یانەكە شیكردەوە، ئینجا دەستەی كۆن لەلایەن سەرۆكی یانەكە هەڵوەشێندرایەوە و دەستكرا بە هەڵبژاردنی دەستەیەكی تازە و نوێ‌ بۆ یانەی سنوور.
حەفت كەس هەلبژێردران بۆ دەستەی كارگێری یانەكە بۆ ماوەی چوار ساڵی دەهاتوو ئەركی راپەراندن و خزمەتكردنیان لە ئەستۆ گرت.
یانەی سنوور لە ساڵی 2015 دامەزراوە و بە یانەیەكی نوێ‌ دەخوێندرێتەوە و نوێنەرایەتی هێزەكانی پاسەوانی سنوور دەكات و لەلایەن هەمان هێزیشەوە پشتیوانی دەكرێت و تیپی تۆپی پێشی لە خولی یانە پلە سێیەكان یاری دەكات.