Share on facebook
قوتابخانە پێویستی بە ژینگەیەكی جوان و سەرنج ڕاكێش هەیە
شەممە, 10 ئازار 2018 16:10

بكركریم حسن

بەرێوەبەری گشتی چاڵاكی وەرزش و هونەر

ماستەر لە كارگێری پەروەردەیی

فەیلەسوفی یۆنانی بەناوبانگ ئەرستۆ دەڵێ " ئەگەر ڕێگایەك هەبوو باشتر باشتر لەوەی تر دڵنیابە ئەوە ڕێگای سروشتە".

بێگومان سروشتی جوان  بە هەموو پێكهاتەكانیەوە ئەو دیمەنە دڵڕفێن و هێور كەرەوەیە كە هەموو ئادەمیزادێك حەز دەكات حەسانەوەیەك پشوویەك گوزەرێك كارێك بە ناو سروشتدا بكات كە دەرئەنجامی سەركەوتوو باشی دەبێت، بۆ ئەوەی لە قوتابخانەكاندا ئەنجامی سەركەوتوومان هەبێت پێویستە ژینگە و سروشتێكی لە بار و جوان و سەرنج ڕاكێش زامن فەراهەم بكەین بۆ قوتابیە خۆشەویستەكانمان، ژینگەی لە بارو و گونجاو ڕەخساو جگە لە جوانی و پاكی و هێمنی و سەوزایی و دڵنیایی ، بێگومان لایەنی پەروەردەیی و فێركردنی مسۆگەر بە هەموو پێداویستیەكانی گونجان  دەگرێتەوە هەروەكو شارەزایان جەخت لە سەر گرنگی و بایەخی ژینگەی قوتابخانە دەكەنەوە وەكو تەواوكەری بنچینەیی گشتگیری پرۆسەی فێركردن و فێربوون لە قوتابخانەكان، وە پاڵنەر و هەنگاوێكی سەركەوتووە بۆ داهێنان و بیركردنەوەی سەركەوتوو ، وەهەروەها گەشەپێدانی پڕۆگرامەكانی خوێندن و ئامادەكردنی مامۆستا و ڕاهێنان و مەشق پێكردنیان دەبنە هۆكاری سەركەوتوو بۆ دابین كردنی ژینگەیەكی لە بار لە قوتابخانە كە هاوكاری قوتابیان و مامۆستایان دەكات لە سەر پێشكەشكردن و دەستەبەركردن و بەدەستهێنانی ئەنجامی سەركەوتوو لە پرۆسەی فێركردن و فێربوون و داخوازی زیاتر لەسەر پرۆسەكە و ڕووكردنە قوتابخانە و بەگشتی سەركەوتنی پرۆسەی پەروەردە و فێركردن.

جگە لەوەش پاڕاستنی ژینگەی قوتابخانە لە ئەستۆ و بەرپەرسیاریەتی هەموو لایەكمانە لە وەزارەتی پەروەردە وە سەرجەم دام و دەزگا پەروەردەییەكان و قوتابخانە و دەستەی مامۆستایان و كەس وكاری قوتابیان هەموو لایەك بە یەكەوە دەست لە ناو دەست بۆ ڕەخساندنی كەشێكی لە بار و گونجاو و ژینگەیەكی لە بار تر  لە قوتابخانە سەرەتا قوتابیە خۆشەویستەكان هەوڵ بدەن قوتابخانەكەیان بە گشتی بە پاك و خاوێنی بیپارێزن و كاغەز و پاشماوەی خواردن و شتی بێ كەڵك فڕێ نەدەنە پۆڵ و گۆڕەپان و باخچە و ڕێرەوەكان و سەرجەم پێكهاتەكانی قوتابخانە بپارێزن و دیوارەكان نەنوسن و مامۆستاكانیش سەبەتەی زبڵ و پیسی لە هەموو قوتابخانە دابنێن و قوتابیان فێر بكەن و ووشیاریان بكەنەوە لە سەر پاراستن و پاك ڕاگرتنی قوتابخانە و چاندنی گوڵ و دارو درەخت و پاڕاستنی پەرتووك و پەڕاو و پێنوس و سەرجەم پێداویستیەكانی تر و پاپەند بوون بە یەك پۆشی و هاتن و چوون و زەنگ لێدان و هاوكاری كردنی قوتابیەكانی تر و گۆێ ڕایەلی مامۆستایان و ڕەخساندنی دەرفەت بۆ قوتابییە خۆشەویستەكان بۆ داواكارییەكانیان و درووستكردنی كەشێكی خێزانی لە قوتابخانە و هەموویان خۆیان بە خاوەنی قوتابخانە بزانن و قوتابیان قوتابخانە و گەڕەك و ماڵ و گوند و شار و خاك و ووڵاتەكەیان خۆش بوێ و دەستبەرداری نەبن  هەرگیز ، بیپارێزن وەك بیلبیلەی چاویان ئەوانە وە چەندەهای تر هەمووی پێویستە  لە بەرنامە و پڕۆگرامی  وەزارەتی پەروەردە ڕەنگ بداتەوە  قوتابی هەردەم ووشیار و چاو كراوە بكات و كەسێكی بەتوانای لێ بێنێتە بەرهەم كە توانای ڕووبەرووبوونەوە و دۆزینەوەی رێگا چارەی هەبێت بۆ كێشەو گرفتەكان كە بەڕۆكی حكومەت و ووڵات دەگرێت و بتوانێت گۆڕانكاری باش بێنێتە بەرهەم.

بۆ ئەوەی لە بیر و هزری قوتابی بە زیندوویی بمێنێتەوە گرنگە وەزارەتی پەروەردە ساڵانە لە ئاستی هەر پارێزگایەك چەند مەدالیەك تەرخان بكات بۆ قوتابخانەكان بە ناوی (مەدالیای ووشیاری ژینگەیی قوتابخانە) بۆ پرۆژە سەركەوتووەكانی ژینگەی قوتابخانە كە لە ئەنجامی كێبركێ باشترینیان بەدەستی بهێنێ و یانیش لە قوتابخانەكەی  جوانترین و سەرنج ڕاكێشترین ژینگەی دەستەبەر و فەراهەم كردبێ بۆ قوتابیەكانی لە ڕووی نەخشاندنی قوتابخانە  بە وێنە و نیگاری ژینگەیی ودابین كردنی هۆیەكانی فێركردنی ژینگەیی و درووستكردنی باخچە و چاندنی گوڵ و گوڵزار و دارو درەخت لە بیرمان نەچێت ،هەروەها زانای ئەڵمانی ئەنیشتاین دەلێ " بە قووڵی تەماشای سروشت بكە ئینجا تێ دەگەی كە هەموو شتێ باشە".