Share on facebook
گەنجێك خۆی كوشت، یەكێكیش بەر مین كەوت دوو هاووڵاتیش بە گووللە بریندار كران
دووشەممە, 11 حوزەیران 2018 18:50


زاری كرمانجی-سۆران: هەفتەی رابردوو بەهۆی چەند رووداوێكەوە چەند هاووڵاتییەك گیانیان لەدەست دا و چەند هاووڵاتییەكیش بە گووللە بریندار بوون.
دوای ونبوونی بۆ ماوەیەك تەرمی هاووڵاتییەكی دەڤەری مێرگەسۆر، كە پیشەی پێشمەرگەیە لە چیایی قەلەندەر دۆزرایەوە.
عەمید عیماد كەنعان، بەڕێوەبەری بەرگری شارستانی سۆران، بەزاری كرمانجی رایگەیاند "دوای ئەوەی  ئاگاداركراینەوە كە (كەیهان سلێمان دۆڵەمەری) هاووڵاتییەكی خێزاندار، خەڵكی دەڤەری مێرگەسۆر، لەچیایی قەلەندەر بێسەرو شوێن بووە، دوای گەڕان بەدوایدا لەسەرەتاوە ئۆتۆمبێلەكەی دۆزرابووەوەو دواتریش تیمەكانی بەرگری شارستانی و هێزە ئەمنییەكان و هاووڵاتییان بەردەم بوون لە گەڕان، دواجار بەداخەوە تەرمەكەی دۆزرایەوە".
بەڕێوەبەری بەرگری شارستانی سۆران، گووتیشی "دوای كاتژمێر 1 و 30 خولەكی سێشەممە 5-6-2018 تەرمی ناوبراو دۆزرایەوەو بەپێی ئەو هەواڵانەی پێمان گەیشتوون، ناوبراو بە رووداوی مین گیانی لەدەستداوە.
لە لایەكی دیكەشەوە بەهۆی تەقەی پاسداران لە سنووری كێلەشین، دوو كۆڵبەری رۆژهەڵاتی كوردستان بەسەختی برینداربوون و گەیاندرانە نەخۆشخانەی فریاكەوتنی سۆران.
بەڕێوەبەری بەرگری شارستانی سۆران، رایگەیاند "كاتژمێر 10ی شەوی 6-6-2018 تیمەكانمان لە بنكەی بەرگری شارستانی سیدەكان، ئاگاداركرانەوە، كە 16 كۆڵبەری رۆژهەڵاتی كوردستان، لەكاتی دەربازبوونیان لە سنووری كێلەشین لە دەڤەری شارەدێی سیدەكان و سنووری شاری شنۆی رۆژهەڵاتی كوردستان، كەوتنە بەر بۆردومان و تەقەی پاسدارانی سەر بەئێران، لەئەنجامدا دوو كۆڵبەری خەڵكی شاری ئورمییە بە ناوەكانی (ش-ج) تەمەن 32 ساڵ، (د-ئ) تەمەن 28 ساڵ، بەسەختی برینداربوون ".
هەروەها كوڕە گەنجێكی دانیشتووی گوندی نزاری لە دەڤەری شارەدێی سیدەكان، بەهۆی بەركەوتنی گوللەیەك گیانی لەدەستدا.
راید هاوار ئەرگۆشی، وتەبێژی پۆلیسی سۆران، بە زاری كرمانجی راگەیاند "رۆژی هەینی 8-6-2018 كوڕە گەنجێكی تەمەن 25 ساڵ بەناوی (سیروان ئیسماعیل خدر) دانیشتووی گوندی نزاری، سەربە شارەدێی سیدەكان، بە هۆی بەركەوتنی گوللەیەك بەرسینگی، بە برینداری گەیاندرایە نەخۆشخانەی فریاكەوتنی سۆران، دوای گرتنەبەری رێوشوێنی پزیشكی بەهۆی سەختی گیانی لەدەستدا".
گووتیشی "بەپێی لە لێكۆڵینەوە سەرەتاییەكان، باوكی ناوبراو ئاماژەی بەوەدا "كە كوڕەكەی كێشەیەكی كۆمەڵایەتی هەبووە، هەر لەبەر ئەم كێشەیە هەڵساوە بەپەنابردن بۆ خۆكوشتن، بەڵام لێكۆڵینەوە لە روداوەكە بەردەوامە بۆ گەیشتن بەراستی روداوەكە".