Share on facebook
بەرگری شارستانی هۆشداری دەداتە هاووڵاتییان
دووشەممە, 11 حوزەیران 2018 18:57


زاری كرمانجی-سۆران: بەڕێوەبەرایەتی بەرگری شارستانی سۆران، هاووڵاتیان و گەشتیاران، ئاگادار دەكاتەوە، كە لەكاتی چوونیان بۆ گەشت و سەیران، ئاگاداری رووداوەكانی ئاگر كەوتنەوە بن و خۆشیان لەو شوێنانە بپارێزن كە جێگەی مەترسین بۆ مەلەكردن.
لە راگەیاندراوێكی بەڕێوەبەرایەتی بەرگری شارستانی سۆران، كە كۆپیەكی بۆ زاری كرمانجی نێردراوە، ئەوە خراوەتەروو "لەئێستادا وەرزی هاوین و گەرمایەو گژو گیاش بۆتە پوش و پەڵاش، كە رەنگە بە بچوكترین كەم تەرخەمی گەورەترین رووداوی لێ بكەوێتەوە، بۆیە پێویستە هاووڵاتیان كەمتەرخەم نەبن و هۆشیار بن لەكاتی هەڵكردنی ئاگر لە گەشت و سەیران و كاتی رووكردنیان بۆ چیاو دۆڵ و ناوچە شاخاویەكان، بە تایبەتیش ئەوكەسانەی كە جگەرە دەكێشن لە ناو ئۆتۆمبێل، پێویستە دوای كوژاندنەوەی بە تەواوی ئینجا فرێی بدەن، لە پێناو ئەوەی ڕووداوی ئاگر كەوتنەوەی لێنەكەوێتەوە، كەچی بەداخەوە فرێدانی جگەرە لە ناو ئۆتۆمبێل لە كۆمەڵگای ئێمەدا دیاردەیەكی باوە".
ئەوەش خراوەتە ڕوو "هەر ئاگر كەووتنەوەیەك سەرەڕای زیان گەیاندن، بە سروشتی ناوچەكانمان، دەبێتە هۆی سووتانی سەدان دارو درەختی سروشتی و وێرانكردنی ژینگەی دەڤەرەكە، كۆنتڕۆلكردنیشی ئاستەم دەبێت، ساڵانەش چەندان كارمەندی بەرگری شارستانی، دووچاری بێ هۆشی دەبنەوە بەهۆی نەمان و كەم بونەوەی ئۆكسجین".
ئاماژەش بەوەكراوە، پێویستە هاووڵاتیان و گەشتیاران لە كاتی سەردانی كردنیان بۆ شوێنە گەشتیاریەكان، دڵنیا ببنەوە لە كوژاندنەوەی پاشماوەی ئاگرەكانیان، كە رەنگە لە دوای ئەوان سەرهەڵبداتەوەو رووداوی نەخوازراوی لێ بكەوێتەوە".
هەروەك لە ڕاگەیاندراوەكەی بەرگری شارستانی سۆران، ئاماژەش بەوەكراوە، هاووڵاتیان و گەشتیاران، لەكاتی چوونیان بۆ قەراغ رووبارەكان، بە هیچ شێوەیەك مەلەوانی لەو شوێنانە نەكەن، كە تابلۆی ئاگادار كرنەوەی لێ هەڵواسراوە و ئاماژە دەكات بە مەترسی ئەو شوێنانە بۆ مەلەوانی كردن، كە  بە  هەردوو زمانی (كوردی و عربی) لەسەریان نوسراوە، كە ئەمەش ئاسانكاریە بۆ هۆشیار كردنەوەی گەشتیاران، سەرەڕای ئەمەش بەڕێوەبەرایەتی بەرگری شارستانی سۆران، تیمێكی مەلەوانی (غواص) مان لەو شوێنانە داناوە، كە چاودێری ئەم ناوچانە دەكەن و خەڵك لە مەترسی ئەو شوێنانە بۆ مەلەوانی ئاگادار دەكەنەوە، هەروەها یارمەتیان دەدەن لەو حاڵەتانەی كە دووچاری مەترسی دەبنەوە.