Share on facebook
لەساڵیادی زاری كرمانجی نوسەر و رۆشەنبیران و چالاكوانان بۆ چوونەكانیان دەخەنە روو
چوار شەممە, 27 حوزەیران 2018 22:01


ZKW : رۆشەنبیران و چین و توێژەكان، لە 13 ساڵەی دامەزراندنی دەزگایی زاری كرمانجی بیرو بۆ چوونەكانیان دەخەنە روو دەشڵێن "زاری كرمانجی  ناوەندێك بووە بۆ پێگەیاندنی كادیرانی پێشكەوتووی ڕاگەیاندن لەم دەڤەرە، دەستخۆشیش لەستافەكەی دەكەن، كە لەكات و ساتێكی سەختی قەیراندا نەیان هێشت ئەم دەزگایە بكەوێت.
م. دانا مستەفا، راگری پەیمانگەی هونەرەجوانەكانی رواندز، بە زاری كرمانجی راگەیاند "دەزگای زاری كرمانجی مێژوویەكی پرشنگداری هەیە لە نێو راگەیاندنی كوردیدا، لانەیەك بووە بۆ كۆكردنەوەی رۆشەنبیرانی ناوچەكەو ئاسۆیەك بووە بۆ برەودان بە بەهەر و توانایەكان و گوم نەبوونی بزەوتی رۆشنبیری ناوچەكە، ئەم دەزگایە تاقانەی دەڤەری سۆران و دەوروبەریەتی، كاریگەریەكی زۆری هەبووە لە گەشەپێدانی هۆشیاری كۆمەڵگە و برەودان بە بزاڤی رۆشنبیری و بۆتە ناوەندێكی گرینگ لە پێگەیاندنی چەندین گەنجی بەتوانا لە نێو راگەیاندنی كوردی".
گووتیشی "زۆرگرینگە لایەنی پەیوەندیدار دەست بەباڵای ئەم دەزگا تاقانەیەوە بگرێت، هاوكاری كردنی زاری كرمانجی هاوكاری كردنی تاك بەتاكی دانیشتوانی دەڤەرەكەیە، كاریگەریە پۆزەتیڤەكانی ئەم دەزگایە مایەی خۆشحاڵیە لە ئێستاداو لە داهاتووش زۆر رۆشنتر بەدیار دەكەون، كادیرە خۆبەخشەكانی ئەم دەزگایە پێشمەرگە ئاسا و خۆنەویستان بەردەوامن لە خزمەتكردن ماندوو بونیان جێگای رێزو پێزانینە.
روژنامەنوس رەمەزان هەرنی، ئەوە دەخاتەروو "هەڵبەتە دەزگای زاری كرمانجی بەهەموو بەشەكانیەوە زمانحاڵی خەڵكی دەڤەرەكە، وەك پردێك بووە لەنێوان خەڵك و حكومەت و پارێزەری خەڵكی دەڤەرەكە، لەگەڵ ئەوەشدا لە ساتە وەختێكدا بەهوی قەیرانی دارایی دەزگای زاری كرمانجیش، وەك زۆربەی راگەیاندنەكانی دیكەی كوردستان، دووچارەی قەیرانی دارایی بووەوە، بەلام جوانی زاری كرمانجی لەوە دابوو چەند روژنامەنوسێكی دڵسوزو كە هەستیان بەبەرپرسیاریەتی كرد لە دەڤەرەكە خوبەخشانە كاریان كردو نەیان هێشت دەرگای دەزگاكە دابخرێت، لەكاتێكدا چەندین دەزگای دیكەی راگەیاندن بەرگەی قەیرانەكەیان نەگرت و داخران".
ئەم رۆژنامەوانە دەشڵێت "بۆ دەڤەرێكێ وەك سوران زور گرنگە كە ئەو دەزگایە وەك سەرەتای دامەزراندنی بكەوێتەوە سەر سكەو بایەخی زیاتری پێبدرێت، چونكە زاری كرمانجی یەكێكە لەپڕوژە گرنگەكان بۆ دەڤەرەكە و دەوروبەری.
هەژار فارس، نوسەر و خوێنەر، ئاماژە بەوەدەدات "زاری كرمانجی وەك نۆبەرە لەدەستپێكی دامەزراندنیەوە خزمەتی بەرچاوی بەهەرچوار قەزاكانی سۆران و مێرگەسۆر و رواندز و چۆمان كردووە، بەبێ جیاوازی كردن لەنیوان پێكهاتەو ئایینە جیاجیاكان رووی راستەقینەی رووداوەكانی وەك خۆی بۆبیسەرو خوێنەرانی خستۆتە روو، هەروەها توانیویەتی ژمارەیەكی زۆر كادر لەبواری راگەیاندن پێ بگەیەنێت و خزمەتی زۆر لە بوارە جیا جیاكان بە خەڵكی دەڤەرەكە بكات".
پێشیوابوو "ناكرێت رۆڵی ستافی كارمەندە دڵسۆزەكانیان نادیدە بگرین، كە دڵسۆزانەو خۆبەخشانە رۆژانە كارەكانیان رای دەكەن، سەرەڕایی دروستبوونی قەیرانی دارایی نەیانهێشت ئەو دەزگا راگەیاندن و رۆشەنبیریە پەكی بكەوێت، بێگومان ئەوەش جێگی رێز و دەستخۆشی كردنە".
رێكان رواندزی، چالاكوانی مەدەنی لە بواری تەندروستی و مافی مرۆڤ، بەزاری كرمانجی گوت "زاری كرمانجی خاوەن مێژوویەكی ڕابردوێكی جوانی ڕاگەیاندنی كوردستان بووە، ئێستاش خاوەنی هەفتەنامە و رادیۆ و ویبسایت و كتێبخانەیە، ئەتوانم  بڵێم پڕ خوێنەرترینی هەفتەنامەو گوێگری رادیۆی هەبووە، ئەگەر چی بارودۆخی ئەم چوار ساڵی كوردستان لە ڕوی ئابووری باش نەبووە و قەیارانی دارای تەنگی بە زۆربەی ڕۆژنامە و ڕاگەیاندنەكان هەڵ چنی بوو، بەڵام ستافی دەزگا خۆبەخشانە بەردەوام بوون و نەیان هێشت دەزگا پەكی بكەوێ".
گووتیشی "لە ماوەی ڕابردوو تا ئێستا هەفتەنامەی زاری كرمانجی، توانیویەتی زۆربەی داواكاری خەڵك و بابەتە پەیوەندی دارەكان بە كێشە و گوزەرانی هاووڵاتیانی دەڤەری سۆران بخاتە ڕوو، وێڕای ئەوەی ڕەخنە لە هەندێك دام و دەزگای حكومی بگرێت، كە گەندەڵی تێدا ئەنجام دراوە، توانیویەتی ببێتە ناوندێك بۆ پێگەیاندنی كادیریی ڕاگەیاندن لەم دەڤەرە بۆیە دەكرێ بڵێین نمونەیەكی جوانی ڕاگەیاندنە.
مەغدید عەریف ئەحمەد، بەڕێوەبەری ناحیەی دیانا، بە زاری كرمانجی راگەیاند "دەزگای زاری كرمانجی ئەو دەزگا روشنبیریەیە كە ساڵانێكە خزمەت بەو دەڤەرە دەكات، لەبواری روشەنبیری و كلتوری و هونەری و خستنەرووی خزمەتگوزاریەكان، هەروەها كاركردن لەسەر پێویستیەكان و ئەو كەم و كوڕیانەی كە هەیە لەبوارە جیاجیاكاندا و بڵاو كردنەوەیان لە پێناو كاركردن لەسەریان و خزمەت گەیاندنی زیاتر بە دەڤەرەكە، هەروەها ئەنجامدانی دیمانە لەگەڵ لایەنی پەیوەندیدارو رونكردنەوەی پرسەكان بۆ بەرچاو روونی زیاتر بۆ هاونیشتمانیان".
بەڕێوەبەری ناحیەی دیانا، دەشڵێت "دەزگای زاری كرمانجی لەپرسە نیشتیمانییەكاندا رۆلی گرینگی بینیووەو كاری لەسەر خزمەت گەیاندن بە خانوادەی شەهیدان و پیشمەرگە قارەمانەكان كردوە، سەرەڕای ئەوەی كە قەیرانی داریی كاریگەری نەرینی هەبوو لەسەر سەرجەم كایەكانی ژیان، دیارە دەزگای زاری كرمانجیش بێ‌ بەش نەبوو لەم كاریگەریانە، بەڵام ستافی دەزگا بەدەستەی بەڕیوەبردن و سەرجەم كارمەندان خۆبەخشانە كاریان كرد، بۆ ئەوەی كاری دەزگا لە خزمەتكردنی بواری راگەیاندن و رۆشنبیری بەردەوام بێت،  ئەوەش جیگەی دەستخۆشی كردنەو هیوادارین پالپشتی زیاتری زاری كرمانجی بكرێت، لەرووی ماددی و معنوی بۆ بەردەوام بوونیان و خزمەت گەیاندنی زیاتر بەم دەڤەرە.