Share on facebook
داینگەو قوتابخانە ئەهیلیەكان بۆبازرگانین یان فێربوونێكی پەروەردەیی و دروست
دووشەممە, 29 تشرینی یەکەم 2018 07:04

 

 

جگەلە قوتابخانەو خوێندنگە حكومیەكان، چەندان خوێندگەو پەیمانگەی ئەهلی لەسۆران بوونیان هەیەو لەلایان وەزارەتی پەروەردەی حكومەتی هەرێمی كوردستانەوە رێگەیان پێدراوە، خەڵكێكی  زۆریش منداڵەكانی خۆیان دەنێرنە ئەم شوێنە ئەهلیانە بەمەبەستی گرنگی پێدانی زیاترو فێربوونی زمانە جیاوازەكان ، بەڵام جیاوازی لە قوتابخانەو باخچەی منداڵانی ئەهلی جیاوازی لە نرخەكانیان هەیە، زاری كرمانجی لەریپۆرتاژێكدا كەس و كاری ئەم قوتابیانە دەهێنێتەدووان‌و ئەوانیش سەرنج و پێشنیارەكانیان دەخەنەروو.

محەمەدباڵەك-سۆران

ناڕێكی لەسیستەمی خوێندنگەحكومیەكان ناچاری كردوین منداڵەكانمان لە خوێندگا ئەهلیەكان بخوێنن ئەمە سەرەتای قسەكانی جەواد مەحمودە ئەو زیاتر دەڵێت" بۆ ئەوەی داهاتووی منداڵەكانمان رۆشن بێت، منداڵەكانمان ئەنێرینە قوتابخانە ئەهلیەكان، بەڵام ئەویش خەریكە بەرەو ئاقێرێكی تر دەچێت‌و هێندەی وێنای بازرگانی پێوەدیارە، هێندە پەروەردەیی نیە، چونكە بەشی زۆر شارەكان داینگەیە یاخوود قوتابخانەی ئەهلییە لەئێستادا، ئەمە سەرەرای ئەوەی هەموویان یەك سیستەمن، بەڵام نرخەكانیان جیاوازن، داواكارین لە لایەنی پەروەردە، نرخی ئەم خوێندگایانە یەكبخەنەوە.

دڵشاد خالید باوكی قوتابێكی ترەو پیشەی دوكاندارە، دوو ساڵە كوڕەكەی دەنێرێتە قوتابخانە ئەهلیەكان ئەو بەم جۆرە بۆزاری كرمانجی دوا" پارساڵ ملیۆنێك و چوار سەد هەزارم ئەدا بۆ كرێی خوێندنی كوڕەكەم،  بەڵام ئەم ساڵ نرخەكە بەرزتربۆتەوەوبۆتە ملیۆنێك و حەوت سەد هەزاردینار" ئەمە لەهەمان كاتدا لە خوێندگەی ئەهلی تر پەیوەندیان پێوەكردووم بە پارەیێكی كەمتر لەم بڕەوبە سیستەمی باشتریش، بۆیە من تێناگەم بەم قەیرانە، كێ ئەم نرخانەی دانەوە؟ بۆچی وەزارەتی پەروەردە سنورێكی بۆ دانەناون؟ دەبێ لایەنی پەیوەندی دار بەدووادچوون بكەن و نرخەكان یەكسان بكەنەوە.

دایكی ساڤان خاوەن دوومنداڵە وەها بۆ زاری كرمانجی سەرنجەكانی دەخاتەروو" منداڵێكی كوڕم ناردۆتە داینگەێك كە بەگووتەی خۆیان سیستەمی خوێندنەكەیان بەزمانی ئینگلیزیە، بەڵام تاكو ئێستا هیچ شتێكی وا فێر نەكراوە، تەنها چەند ووشەیێك نەبێت، دایكی ساڤان زیاتر بۆ زاری كرمانجی دەڵێت" گەر بێت‌و سیستەمەكەیان تەواو ئینگلیزی بێت‌و منداڵەكانمان بتوانن تێدا سودمەند بن شتێكی باشە، بەڵام پێویستە وەزارەتی پەروەردە چەند لێژنەیێكی تۆكمە پێكبهێنێ لە جۆرو شێوازی سیستەمەكە بكۆڵێتەوە.

كاروان باڵەك كاسبكارێكی شاری سۆرانەو ماوەی دووساڵە كوڕەكەی دەنێرێتە قوتابخانەێكی ئەهلی شاری سۆران ئەو بەم جۆرە بۆمان دووا" ساڵی پار كوڕەكەم لە داینگە بوو، ملیۆنێك‌و پێنج سەد هەزارمان پێدان، بەڵام ئەم ساڵ پەیوەندیان پێوە كردم‌و گوتیان ئەبێ قیستەكەت نوێ بكەیتەوەو كریێ ی خوێندنی ئەم ساڵی بۆتەملیۆنێك ونۆسەد هەزار، بەگوتەی خۆیان گوایە پرۆگرامی زیاتر دەخوێنن، من ئەوەندەی ئەمە بەبازرگانی ئەبینم بە سیستەمی خوێندنی نابینم‌و ئەبێ سنورێكیان بۆ دیاری بكرێت، كە نرخەكەی جێگیر بێت.

مامۆستایێك نەیویست ناوە بنووسین وەها بۆ زاری كرمانجی دەڵێت" گومان لەوە نیە كە جیاوازی هەیە لە نرخی خوێندن لە قوتابخانەئەهلیەكان، لە هەمان كاتدا بڕی ئەو مووچەیەیی ئەدرێتە مامۆستا لە قوتابخانەیێكەوە بۆ یەكی تر جیاوازی هەیە، ئەمەش واتا نرخەكان خاوەن پڕۆژەكان دایدەنێن نەك لایەنی پەیوەندی دار، بەڵام من وەك مامۆستایێك پێم باشە سیستەمەكان هەمووی رێكبخرێت‌و مووچەی هەموو مامۆستای قوتابخانە ئەهلیەكان یەكبخرێتەوە، ئەمەش لە رێگای وەزارەتی پەروەردە كە لیژنەیەێك دروست بكرێت و لەگەڵ هەموو قوتابخانە ئەهلیەكان دانیشتن بكەن و سیستەمەكە رێك بخەن.

جەوهەر جبار خاوەنی سێ منداڵی قوتابینەو دوو لەمنداڵەكانی لە قوتابخانە ئەهلییەكانن، ئەو بەم جۆرە بۆمان دووا" منداڵەكانم زۆر سودیان وەرگرتووە لە قوتابخانە ئەهلییەكان ‌و زمانی ئینگلیزی زۆر باش فێربوونە،لەزۆر رووەوە شتی باش فێربوونە، بەڵام ئەوەی جێگای نیگەرانیە جیاوازی هەیە لەنرخی خوێندن لە گەڵ خوێنگایەكی تر داواكارین خوێندگاكان نرخەكانیان كەم بكەنەوە و ڕەچاوی بارو دۆخی خەڵكی بكەن.