Share on facebook
چەند گەڕەكێكی هەریر بەدەست كەمی ئاوەوە دەنالێن
چوار شەممە, 31 تشرینی یەکەم 2018 07:02


 

ڕاپۆرت محەمەد ئامۆكەیی:

سەرەڕای جێبەجێكردنی چەندین پڕۆژەی ئاودێری لە شارۆچكەی هەریر كەچی كەمی ئاو لە چەند گەڕەكێكی ئەو شارە تەنگی بە هاووڵاتیان هەڵچنیوە، زیاتر لە مانگێك دەبێت بەهۆی سوتانی غەتاسی بیرێكی ئۆردوگای هەریر، بە سەدان ماڵ تووشی كەم ئاوی بونەوە، رۆژانە دانیشتوانی ئەو گەڕەكانە بەتەنكەر ئاوی پاك دەكڕن و زۆربەی ئەو ئاوەی بۆ خواردنەوەش دابین دەكرێت بۆ هاووڵاتیانی هەریر ئاوی ژێر زەوییە، زۆر بوونی  ژمارەی دانیشتوانی ئەو شارە وایكردوە ئاوی پاك بەشی هەموو خەڵك نەكات و هاووڵاتیانی ئەو گەڕەكانەش لە رێگای هەفتەنامەی زاری كرمانجی داوادەكەن كێشەكەیان چارەسەر بكرێت، شارەدێی هەریر لە ڕووی ئیداریەوە سەر بەقەزای شەقڵاوەیە ساڵ بە ساڵ ژمارەی دانیشتوانی ڕوو لە هەڵكشانەو ئەوەش هۆكارێكە خەڵك زیاتر پێویستی بە پڕۆژەی خزمەتگوزاری هەبێت لە نێویشیدا ئاوی خواردنەوە.

رێبوار حامد هاووڵاتێكی هەریرە دەڵێت" دووساڵ دەبێت تەواوی گەڕەكەكانی ئۆردوگای هەریر بەدەست كەمی ئاوەی پاك دەنالێنن هۆكارەكەشی بۆ خراپ دابەشكردنی ئاو دەگەڕێتەوە، میراوەكانی ئاو زۆر باشنین و كەسیش لێپێچینەوەیان لەگەڵ ناكات، مانگێك دەبێت غەتاسی بیری ئۆردوگا سوتاوە زۆربەی خەڵكی ئەو گەڕەكانە لەسەر گیرفانی خۆیان ئاو دەكڕن و بۆ هەر تانكەرێكیش دەبێت بڕی 25 هەزار بدەین، ئەوجا ناش زانین ئاوەكە ئەشێت بۆ خواردنەوە یاخود نا، رێیوار زیاتر گووتیشی" هۆكاری كەم ئاوی لە هەریر بۆ ئەوە دەگەڕێنمەوە كۆنی بۆڕیەكانی ئاو و هەروەها زۆربەی ماڵەكانیش بۆڕیان بە نایاسایی ڕاكێشاوە، جگە لەمەش ئێمەی هاووڵاتیش ئاوی زۆر سەرف دەكەین و گوێ بەوە نادەین دراوسێەكان ئاویان هەیە یاخود نا، بۆیە داواكارین هەرچی زوە چارەسەری ئەم گرفتە بكرێت. شوان عەلی هاووڵاتێكی ترەو دەڵێت" بێ ئاوی تەواو بێزاری كردوین چەند ساڵ دەبێت گرفتی كەم ئاوی بەرۆكی ئێمەی گرتوە، زۆربەی شەوەكان دەبێت بەدیار ئاو رۆژ بكەینەوە لەبەر ئەوەی شەوان ئاو دێت و بەشی هەموو ماڵێكیش ناكات، نەبوونی پێوەری ئاو لە ماڵەكان هۆكارە بۆ كەم ئاوی، ئەگەر بێت و لایەنی پەیوەندی دار بۆ هەموو ماڵێك پێوەری ئاو دانێت ئەو گرفتەی ئێستا هەمانە بەو جۆرە نابێت، شوان زیاتر گووتیشی" لەبەر بێ ئاوی وامان لێ هاتووە هەفتەی یەك رۆژ خۆمان بشۆین كە دەچینە یاری دەگەڕێینەوە بۆ ماڵەوە ئاو نیە ناچارین هەفتەی یەك رۆژ یان دوو رۆژ خۆمان بشۆین، ئاگاداری ئەوەین چەندین پڕۆژەی ئاو جێبەجێ كراون یان لە بواری جێ بەجێكردنن بەڵام ئەوە ناگێنێت كە هەریر لە دەست كەم ئاوی رزگار بێت بۆیە فەرمانگەی ئاو دەبێت لەوە زیاتر هەوڵەكانی چڕبكاتەوە ئاوی زیاتر دابین بكات.

لای خۆشیەوە بێوار عەدنان كانتین بەڕێوەبەری فەرمانگەی ئاوی هەریرو دەوروبەر بە زاری كرمانجی راگەیاند" دەمێكە دانیشتوانی ئۆردوگای هەریر كێشەی كەم ئاویان هەیە ئەوەش بۆ سوتانی غەتاسی بیری سەرەكی ئۆردوگا دەگەڕێتەوە، لەو كاتەی ئەو گرفتە دروست بووە بە بەردەوامی لەگەڵ تیمەكانمان لەسەر خەت بوینەو بۆ چارەسەركردنی ئەم گرفتەو لە چەند رۆژی داهاتوو كێشەكە بەتەواوەتی چارەسەر دەبێت و هاووڵاتیانیش وەك جاران ئاویان بۆ دەچێت، بێوار زیاتر دەشڵێت" سەرەڕای قەیرانی دارایی و وەستانی پڕۆژەكان، وەك فەرمانگەی ئاوی هەریرو دەوروبەر لەماوی سێ مانگی ڕابردوو چەندین پڕۆژەی ئاودێریمان  لە سنوری هەردوو ناحیەی هەریر و باسرمە ئەنجامداوە، لەنێویاندا ڕاكێشانی زیاتر لە 2 هەزار مەتر تۆڕی ئاو لە هەریەك لەگەڕەكەكانی باتاسی كۆن و هەنارەیان، هەروەها خاوێن كردنەوەی سەرچاوەی ئاوی زیاتر لە 10 گوندی سنورەكە، لە ئێستاشدا لە هەریەك لە گوندەكانی شێخ مەمودیان و شەكرۆك دوو پڕۆژەی تر كەوتونەتە واری جێبەجێكردنەوە، ئەوانیش دانانی خەزانی ئاو بۆ گوندەكەو هەروەها لێدانی بیرێك بۆ گەڕكێكی شارەدێی باسرمە تێچوی ئەو پڕۆژانەش زیاتر لە 100 ملیۆن دینار بووە، لە داهاتوش هەوڵی جدی دەدەین بۆ ئەوەی زۆرترین خزمەتگوزاری پێشكەش بە هاووڵاتیانی هەریرو دەوروبەری بكەین چەندین پڕۆژەی تریش هەن و دەرخستەیان بۆ كراوە لە مانگەكانی داهاتوو بەتەواوەتی دەكەونە واری جێبەجێكردنەوە بەتەواو بوونی ئەو پڕۆژانە كێشەی كەم ئاوی تا ڕادەێكی زۆر نامێنێت لە سنوری فەرمانگەكەمان.