گرینگی قۆناغی گەنجێتی
سێ شەممە, 12 شوبات 2019 07:55

 

ئازاد محەممەد بەرگركەیی

گەنج نەمامی هێزو تواناو زیرەکییە،داینەمۆی داهێنان و وەگەر خستنی شەمەندەفەری ڕۆشنبیرییە،گەنج ڕۆحی کۆمەڵگەو بەردی بناغەی شارستانیەتە،وەتەمەنی گەنجێتی هەستیارترینی قۆناغەکانی ژیانە،لەم قۆناغەیە مرۆڤ کەسیەتی خۆی بونیات ئەنێ وئامادەسازی ئەکات بۆئەوەی لەئاست هەر بەرپرسیارەتیەک دابێ کەلەمەو دوا بخرێتە سەرشانی،بۆیە هەرگیزاو هەرگیز ناکرێ ئەم چینە هەستیارە پەراوێز وپشتگوێ بخرێ،بەرزبونەوەو نزمبونەوەی هەر میللەتێک پەیوەندیان بەڕۆح هەست وشعوری گەنجەکانی و ئەوپەروەردەو فێرکردنەوە هەیە کەوەری دەگرن وئاڕاستە دەکرێن،ئەومیللەتانەی گەنجەکانی بەباشی پەروەردەکراون هەمیشە کاندیدن بۆپێشکەوتن،لەبەرامبەردا دواکەوتنی ئەومیللەتانەی کەلاوەکانی خۆی پشتگوێ خستووە شتێکی حەتمییە،کۆمەڵگا قاپێکی کریستاڵیەو گەنجەکانی ناویشی شلەیەکن تیایدا،شێوەو ڕەنگی ئەو وەردەگرن ولەڕێگەی ئەوەوە دەردەکەون،ئەوانەی دەیانەوێت سەبارەت بەداهاتووی میللەتێک پێشبینی وپێشگۆیی بکەن،ئەگەر تەماشای پەروەردەی لاوەکانی ئەو میللەتە بکەن،ئەوەلەبڕیارەکانیاندا لەسەدا سەد دەیپێکن،هەواو ئارەزوەکان لەشتی شیرین وفەزیلەتەکانیش لەچێشتی ترش وسوێرو تاڵ دەچن،ئەگەر بێت وگەنج سەربەست بکرێت لەهەڵبژاردنی یەکێک لەمانە،داخۆ پێویست دەکات بڵێین کامیان هەڵدەبژێرێت وکامیان وازلێدەهێنێت؟!ئەمەلەحاڵێکدا کەناچارین گەنجان وەک دۆستی فەزیلەت و دوژمنی بێڕەوشتی پەروەردە بکەین،ئەم میللەتانەی گەنجەکانیان لەشەپۆلەکانی هەواو ئارەزوودا جێهێشتون زۆر بەقوڕسی باجی ئەم پشتگوێخستنەیان داوە،ئەگەر ئەمڕۆ ناپاکی چواردەورەمانی تەنیوەو نەوەکان ڕۆژ بەڕۆژ زیاتر لەسنور دەردەچن،ئەمەبەتەواوەتی دەرەنجامی کەمتەرخەمی ئێمەیە چونکە کاتێک سەرمان لەناو هەورەکاندا دەهات ودەچوو هەستمان بەو مارانە نەکرد کەبەنێو قاچماندا هەتا ناو ژووری نوستنەکانمان دزەیان کردبوو،وەبەدەستی خۆمان دۆخی ناهەمواری ئەمڕۆمان خولقاند،بۆیە دەربڕینی شەفەقەت ونەرم ونیانی و ئاوڕدانەوەی پێویست وهەڵگرتنی نازو هەستکردن بەپرسیارەتی بەرامبەریان،هەنگاوێکی مانا بەخشە لەسەر ڕێگای هەستاندنەوەی وڵات ومیللەتەکەمان،ئەوەندەهەیە ئەم هەستی بەزەیی ومیهرەبانییە،ئەگەر ڕووی لەژیانی دڵ وڕۆحیان بێت بەسودە،بەڵام گەر ڕووی لەجەستەو لاشەیان بێت زیانبەخشە ودەیانکات بەبونەوەری جەستەیی وتەنانەت لەوانەیە لەشیرازەش دەریان بکات،وەئەگەر بێت وئاشتەوای ولێک نزیکبونەوەیەک بکرێت لەنێوان چینی تەمەندارو گەنجەکانمان،ئەزموون و ژیریی پیران وهێزو توانای لاوان لێکبدرێ وبکرێ بەهەویرێک وبەئاوو خوێی ویژدان ودادپەروەرییەوە بشێلدرێ،بێگومان بەشی تێربونی تاواوی دانیشتوانی جیهان کولیچەی لێ ئەسازێنرێ.