نه‌خۆشی ڕق و چاو تێبڕین

كرمانج عزه‌ت سلێمان

ڕق و چاوبڕینه‌ سه‌ر كه‌سانی تر كوشه‌نده‌ترین نه‌خۆشی مرۆڤه‌ ، ئه‌و دیارده‌یه‌ له‌وه‌ته‌ی مرۆڤ هه‌ستی به‌ بوونی خۆی كردوه‌ هه‌یه‌ و له‌ ناو هه‌موو ئایینه‌ ئاسمانیه‌كان و كتێبه‌ فه‌لسه‌فیه‌كان و په‌ند و لێكدانه‌وه‌كانی زانایان باس له‌ كوشه‌نده‌ییه‌كه‌ی كراوه‌ ، به‌ڵام دیاره‌ تا ژیان هه‌بێ ئه‌و نه‌خۆشیه‌ش بوونی ئه‌بێ ، كه‌ له‌ لایه‌نی پزیشكیه‌وه‌ به‌ یه‌كێ له‌ جۆره‌كانی نه‌خۆشی ده‌روونی ده‌ناسرێ . من نامه‌وێ وه‌كو پسپۆڕێ شرۆڤه‌ی ئه‌و دیارده‌یه‌ بكه‌م ،ته‌نها هه‌ست ده‌كه‌م ئه‌وڕۆ له‌ كوردستان دوای ئه‌وه‌ی كۆمه‌ڵێ گۆڕانكاری به‌ سه‌ر ژیانی سیاسی و كۆمه‌ڵایه‌تی و ئابووری خه‌ڵكه‌كه‌ی داهاتووه‌ ، ئه‌و نه‌خۆشیه‌ش به‌ ڕێژه‌یه‌كی زۆر سه‌ری هه‌ڵداوه‌ ! له‌ ناو هه‌موو چین توێژه‌كانه‌وه‌ هه‌ستی پێ ده‌كرێ ، ده‌وڵه‌مه‌ند و هه‌ژار ، بازرگان و كرێكار، ڕۆشنبیر و نه‌خۆێنده‌وار ، شۆڕشگێڕ و لاده‌ر ، سیاسی و بێ لایه‌ن ، له‌ ناو ته‌كه‌توله‌كان و حزبه‌كان ، ئایین په‌روه‌ر و بێ دینه‌كان و له‌ هه‌مووی سه‌یرتر له‌ ناو هاوڕێ و هاوخه‌باته‌كانی ده‌یان ساڵ داستان و هاوچاره‌نوس...زۆریتریش . من بۆ خۆم باوه‌ڕم وایه‌ خه‌سڵه‌تی لێك جیایی مرۆڤی به‌خته‌وه‌ر و به‌د به‌خت ، به‌ ماڵی دونیا و پله‌ و پایه‌ی مه‌سئولیه‌ت و بڕوانامه‌ و نه‌خوێنده‌واری ده‌ر ناكه‌وێ ، به‌ڵكو به‌ خۆشه‌ویستی و ڕقه‌وه‌ دیار ده‌بێ ! چه‌نده‌ها كه‌س هه‌ن خاوه‌نی موڵك و پاره‌ و كۆشك و مه‌سئولیه‌ت و ڕه‌نگه‌ شه‌هاده‌ش بن ، به‌ڵام هه‌موو ئه‌و سودانه‌ نه‌بوونه‌ته‌ مایه‌ی خۆشی ژیانی چونكه‌ زه‌ین و هۆشی خۆیان بۆ ئه‌وه‌ ته‌رخان كردووه‌ ئاخۆ ده‌ور و به‌ری چیان له‌و باشتره‌ یان چیان به‌ ئه‌و ده‌چێ كه‌ هه‌وڵ بدا نه‌یان بێ چونكه‌ نایه‌وێ‌ ، ئای كه‌ نرخی ئه‌و ده‌روون ڕه‌شیه‌ چه‌نده‌ قورسه‌ و چه‌نده‌ شایسته‌ی به‌زه‌یی پێ هاتنه‌وه‌یه‌ ! زۆر كه‌سیش هه‌یه‌ ساده‌ ترین ژیان , بێ به‌ش له‌ زۆربه‌ی خه‌ونه‌كانی بژێوی ، كه‌چی له‌ بزه‌ خه‌نده‌ی منداڵه‌ پاكه‌كانیه‌وه‌ ، له‌ هه‌ڵوێست چاكی له‌ گه‌ڕه‌ك و شار و كۆمه‌ڵه‌كه‌یه‌وه‌ ، له‌ چاكی و هاوسۆزی شادی و شینی زۆرینه‌ی خه‌ڵكه‌وه‌، له‌ دڵسۆزیه‌ت بۆ كاره‌كه‌ی و نیشتمانیه‌وه‌، ژیانێكی وا پر ِبه‌خته‌وه‌ری بنیات ناوه‌ كه‌ كامه‌رانی و شادی لێ ده‌دره‌وشێته‌وه‌، ئه‌وه‌ش ته‌نها به‌ تێچووی ساغی ده‌روونیه‌وه‌یه‌ !
پرسیار ئه‌وه‌یه‌.. بۆ هه‌موومان وه‌ك ئه‌و مرۆڤه‌ به‌خته‌وه‌ره‌ نه‌بین ؟ له‌ جیاتی ڕق ، خۆشه‌ویستی هه‌ڵنه‌بژێرین ، چیمان له‌وه‌ داوه‌ فڵان هاوڵاتی ئه‌وه‌ی له‌ كوێ هێناوه‌؟ له‌ جیاتی پیرۆزبایی لێ كردن . با له‌ پێشكه‌وتنی هه‌ڤاڵانمان كه‌می خۆمان نه‌بینین ، ئه‌گه‌ر به‌رپرس بین، چونكه‌ ئه‌و كاروانه‌ پێویستی به‌ هه‌موومان هه‌یه‌ ! چیمان له‌وه‌ داوه‌ هه‌موو ساته‌كانی ته‌مه‌ن بۆ ئه‌وه‌ ته‌رخان بكه‌ین ئاخۆ كه‌ی ئه‌و به‌رپرسه‌ ده‌گۆڕێ ، یان گومانی گه‌نده‌ڵی و بوختان بۆ یه‌ك چا كردن به‌ ناوی دڵسۆزی بۆ ئه‌رك . كه‌ی شكاندنی خه‌ڵك و بوختان و نوسینی سه‌ر سایته‌ ئه‌لكترۆنیه‌ بێ ناو نیشانه‌كان گه‌وره‌یی و دڵسۆزی مرۆڤ پێوه‌ر ده‌كات ؟ خۆ گه‌نده‌ڵیش پڕۆسه‌یه‌كی هه‌مه‌ لایه‌نه‌یه‌ و ده‌بێ وه‌كو كه‌س ئه‌گه‌ر گومانی گه‌نده‌ڵی له‌ خه‌ڵك بكه‌ین و لێی وه‌ جواب بێین ، ئه‌وا ده‌بێ كه‌سی وه‌ جواب هاتوو 100% پاك و بێ گه‌رد بێ ، ئه‌گینا به‌ ڕای من گه‌نده‌ڵی كه‌ هه‌یه‌ سیسته‌م چاری ده‌كات نه‌ك گومان وده‌ست ڕۆیشتنی یه‌كێ به‌ سه‌ر یه‌كێكی تره‌وه‌ . ئه‌گه‌ر له‌ گومانیشه‌وه‌یه‌ ئه‌وه‌ خوای گه‌وره‌ ئه‌فه‌رموێ (إِنَّ بَعْضَ الظَّنِّ إِثْمٌ ) هه‌ندێ له‌ گومانه‌كان گوناهن !! ئه‌گه‌ر له‌ پێناو ڕقی ناو ده‌روونیشه‌وه‌یه‌، كه‌ی مرۆڤی به‌هێز كه‌سایه‌تی خۆی له‌ شكاندنی خه‌ڵكی تر دۆزیوه‌ته‌وه‌ ؟ عیسا پێغه‌مبه‌ر (د.خ) ئه‌فه‌رمووێ كه‌ كه‌سێ ڕقی له‌ كه‌سێكی تره‌وه‌ بووه‌وه‌، بێت و هه‌موو ژیانی خسته‌ چاوه‌ڕێی ئه‌وه‌ی ئاخۆ كه‌ی شتێكی به‌سه‌ر دێت، ئه‌وا ئه‌و كه‌سه‌ تا شتێكی خراپ له‌ نه‌یاره‌كه‌ی ده‌بینێ ، دوو جار به‌ قه‌د نه‌یاره‌كه‌ له‌ ڕووی ده‌روونیه‌وه‌ سزای ده‌روونی ئه‌بینێ. به‌داخه‌وه‌ ئه‌و دیاردانه‌ له‌ كوردستان و ناوه‌ ناوه‌ له‌ سۆرانیش زێده‌ ده‌بن به‌ گومان لێك كردن و بۆختان له‌ سایته‌كان و بڵاو بوونه‌وه‌ی بازاڕه‌ نه‌خۆشه‌كه‌ی فڵان مه‌سئول گۆڕا و ده‌گۆڕێ و فڵان گه‌نده‌ڵه‌ و یان گومانی ئه‌خڵاقی و زۆری تر. بۆیه‌ بڕوام وایه‌ وه‌ختی به‌ خۆدا چوونه‌وه‌ی هه‌موومانه‌ له‌ پێناو به‌رژه‌وه‌ندی گشتی وڵاته‌كه‌مان و ئاینده‌كه‌مان، چونكه‌ كه‌سی ڕاست و پاك و دڵسۆز ، هه‌رگیز تا سه‌ر بوختان په‌ی پێ نابات ، كه‌سێكیش له‌ په‌نا په‌رده‌ی دڵسۆزیه‌ته‌وه‌ ئه‌گه‌ر ڕاست نه‌بێ زه‌مه‌ن تا سه‌ر په‌نای نادات ! بۆیه‌ ده‌بێ یان ڕه‌زیلی ئه‌و نه‌خۆشیه‌ ده‌رونییه‌ بین تا مردن وه‌ك عه‌ره‌ب ده‌ڵێ (من راقب الناس مات هما) ئه‌وه‌ی هه‌ر چاوی بڕیه‌ خه‌ڵك به‌و كه‌سه‌ره‌وه‌ مرد ، یان ده‌بێ له‌ خانه‌ی به‌خته‌وه‌ری جێی خۆمان بكه‌ینه‌وه‌ به‌ به‌خۆ داچوونه‌وه‌ و ساغ و پاك كردنه‌وه‌ی ئه‌و ده‌روونه‌ نه‌خۆشه‌ی كه‌ هه‌ر خۆمانی پێ ئه‌سوتێنێ و به‌س .