ئیرۆن خەلیفانی:  بە كرێكاری و فڕۆشتنی موبایلەكەم، كامیرەی خەونەكانم كڕی

ئیرۆن خەلیفانی: بە كرێكاری و فڕۆشتنی موبایلەكەم، كامیرەی خەونەكانم كڕی

مەهدی محەممەد – خەلیفان : 

ئیرۆنی فۆتۆگرافەر ماوەی 4 ساڵە بە زوومی كامیرەكەی دەستی وێنەی سروشت و كەسایەتی و یاریزانانی وەرزشی دەگرێت، لە زۆربەی چالاكی رۆشنبیری و هونەری و وەرزشی ئامادەیی هەیە، هەر لەبەر ئەوەش لەلایەن خەڵكی ئیدارەی سەربەخۆی سۆران بە چاوی شارەكان ناسراوە. 
ئیرۆن ئازاد رەسول تەمەن 21 ساڵ، دانیشتووی ناحیەی خەلیفان، لەدیمانەیەكی كورتی زاری كرمانجی باس لەدەستپێكی كاری فۆتۆگرافی خۆی دەكات و دەڵێ‌"دەستپێكی فۆتۆگرافیم بە كامێرای Sony-R1 بوو، ئەگەرچی كامێراكە وەك پێویست نەبوو، بەڵام بەناچاری بۆ ماوەیەك لەگەڵی بەردەوام بووم".
ئیرۆن لەپێناو بەرزكردنەوەی كواڵێتی كارەكەی و كڕینی كامیرەیەكی باشتر، پەنا بۆ فڕۆشتنی موبایلەكەی دەستی و كاركردنی رۆژانە دەبات"حەز و خولیاو خەونی من گەورەتربوو، پێویستی كارەكەش كامیرەیەكی پێشكەوتوو تری لێم دەخواست، بۆیە ماوەیەك خەریكی كرێكاری بووم، بە پارەی كرێكارییەكە و فڕۆشتنی موبایلەكەم، ئەو بڕە پارەیەم دەستكەوت و توانیم كامیرەیەكی باشتر لەجۆری ( Nikon-D750) بكڕم و ئاستی كارەكەم پێش بخەم"،
ئیرۆن لە زۆربەی شارەكانی باشووری كوردستان وێنەی چركاندووەو بڕوانامەی فۆتۆگرافی و خەڵات و رێزلێنانی زۆریشی وەرگرتووە، هیوا و ئاواتی ئەو فۆتۆگرافەرە ئەوەیە كە لەئایندەدا بتوانێ پیشانگایەك بۆ تەواوی وێنەكانی بكاتەوەو وەكو فۆتۆگرافەرێكی جیهانی دەربكەوێت و لە یاریگەكانی دەرەوە وێنەی خولەكانی یاری تۆپی پێ ی بگرێ و وێنەی هەردوو یاریزانی جیهانی ( مێسی و كریستیانیۆ ) بخاتە نێو ئەلبوومی ئەرشیفی وێنەكانی.
خەلیفانی جگە لەكاری فۆتۆگرافی، خاوەنی هیچ كارێكی تر نییە تا سەرچاوەیەكی ماددی پێ ببەخشێ و كارەكەی زیاتر پێش بخات، ئەو پێی وایە فۆتۆگرافی هێشتا لە كوردستان نەگەیشتۆتە ئاستێك كە ببێتە سەرچاوەیەك بۆ بژێووی ژیان"ئەو پارەی لە وێنەگرتن دەستم دەكەوێت، هەر بەشی ئەوە دەكات لەكارەكەم خەرجی بكەمەوە".

 

بابەتى پەیوەندیدار جۆراوجۆر

زۆرترین بینراو