ئێوارانی خەرەند گەنجانی رواندز كۆ دەكاتەوە

ئێوارانی خەرەند گەنجانی رواندز كۆ دەكاتەوە

"خەرەند وات لێدەكات بە زوویی هۆگری ببی و بە ئاسانی  دەستبەرداری نەبیت "

  مەهدی محەممەد – رواندز

 ئێواران كاتێ تیشكە زێرینەكانی خۆر سات بە سات لەقەد پاڵی شاخی كۆرەك ون دەبن و، رووناكی دەسەڵات و هێزی خۆی بۆ تاریكی جێ دەهێڵێ، گەنجانیش پەیتا پەیتا بەدەم قسەكردن و خواردنی گوڵەبەرۆژەوە، بەرەو لێواری خەرەندی شار رێ دەكەن و، لەوێ بۆ ماوەیەك لەگەڵ ژووانی خەرەند كۆڕ دەبەستن و، بە دەمەتەقێ و باسكردن لەژیانی رۆژانەو گێڕانەوەی بەسەرهاتی تەنزئامێز، تا دەرنگانی شەو دەمێننەوە. گەنجێك دەڵێ"خەرەند هەموو ئێوارەیەك لێرە كۆمان دەكاتەوە"، یەكێكی تریش دەڵێ"لێرە گوێی لە ئاوازی باڵندەكانی خەرەند دەگرین و بە دەنگێكی تەژی لەسۆز و خۆشەویستی یەوە پڕمان دەكەن لە ئارامی و، ئاسوودەیی بە دەروونمان دەبەخشن"، مامۆستایەكیش دەڵێ"لێرە وانەكانی ژیان جوانتر فێر دەبین".

ئێواران باڵندە رەنگاڵییەكان زۆر بە نزمی بە نێو خەرەندا هاموشۆ دەكەن، دەنگی پڕ لە خۆشی ئەوان و هاشە هاشی ئاوی نێو خەرەند و گڤەی بایی ئێواران، ئاوازێكی پڕ لە جۆش و خڕۆشی سەمفۆنیا ئاسا دەهێننە بوون و گوێچكەی مرۆڤ تەژی دەكەن لە نەغمەی ئاسوودەیی و ئارامبوونەوە. لەسەر لێواری خەرەند كافتریایەك دروستكراوەو بۆتە سەكۆیەك بۆ كۆكردنەوەی گەنجانی شار، هەردی مەلا رەقیب لەگەڵ هەڵمەت سەبری هاوڕێی، لەگۆشەیەكی سەربانی كافتریایەكە دانیشتبوون، هەروەكو خۆی بۆ زاری كرمانجی باسی دەكات"هەندێ جار لەگەڵ هاوڕێیان و هەندێ جاریش بە تەنها" بۆ ماوەیەك لەسەر خەرەند دەمێنێتەوە، ئەو لەبارەی خەرەندەوە دەڵێ"خەرەند شوێنێكی ئارام بەخش و جوانییەكی ئەفسوناوی هەیە، كە وات لێ دەكات بە زوویی هۆگریی بیت و ئاوا بە ئاسانی دەستبەرداری نەبیت و بۆ ماوەیەك لەلای بمێنیتەوە"،

ئەوەش دەڵێ"خەرەند شوێنی بیركردنەوەی ژیانی خۆمان و گفتوگۆیی هاوڕێیانمانە". هەردی پێی وایە هیچ كام لەشوێنە گەشتیارییەكانی شارەكەی، ناتوانن شان لەشانی خەرەند بدەن، بۆیە داواكارە لەئیدارەی شارەكە، بایەخی زیاتر بە خەرەند بدەن و خزمەتگوزاری زیاتری بۆ بكەن.

هەڵمەت بە پێكەنینەوە قسە بە هەردی هاوڕێ دەبڕێ و دەڵێ‌"سروشتی ئەو شارە پڕە لە جوانی، هەر بەستێكی دەكرێ ببێتە شوێنێكی گەشتیاری گرینگ و ژێرخانی ئابووری رواندزی پێی بەهێزتر بكرێت، دڵنیام گەر بایەخی زیاتر بە خەرەند بدرێت، خەڵك لە دەرەوەی كوردستانیش بۆ دیداری دەهێنە ئێرە". رۆژدیار سلێمان قوتابی لەپەیمانگەی هونەرە جوانەكانی رواندز، ئەویش لەگەڵ چەند هاورێیەكی خۆی لە دەووربەری مێزێك كۆببوونەوەو باسیان لە كۆچكردنی گەنجانی شارەكە دەكرد، ئەو بە نیگەرانییەوە باس لەچەند برادەرێكی خۆی دەكات كە شارەكەیان جێهێشتووەو ئێستا لە رێگەدان بۆ گەیشتن بە وڵاتێكی ئەوروپی، دەڵێ‌"نیگەرانم بۆ ئەو هەموو گەنجە زۆرەی كوردستان جێدەهێڵن، گەر وا بڕوات هیچ گەنجێك لێرە نامێنێ"، رۆژدیار باس لەوە دەكات لەبەر تاقیكردنەوەكانی ماوەیەكی زۆرە نەهاتووە بۆ ئەو شوێنە، بەڵام باس لەپرۆژەیەكی هونەری گەنجانە دەكات و دەڵێ‌"بیرم لەوە كردبوو لەگەڵ چەند هاوڕێیەكی ترم هەفتەی جارێك لەو شوێنە، چەند چالاكییەكی هونەری پێشكەش بە گەنجان بكەین و بۆ ساتێك دوورییان بخەینەوە لەبیركردنەوە لەرۆژە سەختەكانی ژیانیان و بۆ ماوەیەك دڵیان خۆش بكەین و خەندە بخەینە سەر لێوەكانیان"، دەرنەچوونی رۆژدیار لە تاقیكردنەوەكانی پەیمانگە، ئەوی سارد كردۆتەوە لە بەئەنجامگەیاندنی ئەو چالاكییە و دەڵێ‌"لەنێو هۆبەكەی خۆم تەنها من دەرنەچووم، ئەوەش زۆر نیگەرانیكردووم و خەریكە هیچ هیوا و ئامانجێكم بۆ نامێنێتەوە، بۆیە لەئێستادا ئەنجامدانی ئەم چالاكییە هونەرییە بۆ من سەختە و لە رووی دەروونییەوە لەبار نیم". جگە لەگەنجانی رواندز، گەنجانی سۆران یش بە مەبەستی كات بەسەربردن دەهێنە سەر خەرەند.

 

سروشتی ئەو شارە پڕ لە جوانی دەكرێ هەر بەستێكی ئەم خاكە ببێتە شوێنێكی گەشتیاری 

سەلیم محەممەد دەڵێ‌"زۆربەی ئێواران لەگەڵ چەند برادەرێك لەسۆرانەوە دەهێنە ئێرە"، سەلیم لەبارەی خەرەندەوە دەڵێ‌"مرۆڤ لەنێو جنجاڵی ژیان و كاری بەردەوام، پێویستی بە پشوویەكی باش دەبێ، بۆیە پێم وایە خەرەند باشترین شوێنی ئارامی دەڤەرەكەیە، هەم ماندوویەتیت ناهێڵێ، هەمیش دەروونت ئارام دەكاتەوە، جگە لەوەش هەر میوانێكی ئازیزم بهێـت لەشارەكانی تر، رێك دەیانهێنم بۆ ئێرە". رووناكی گڵۆپەكانی كافتریا دیمەنێكی سەرنجراكێشی لەنێو خەرەند دروستكردبوو،

محەممەد قادر بە تێڕوانینێكی قۆڵەوە سەیری دیمەنەكەی كردبوو و ئیدی خەیاڵ ئەوەی راپێچی نێو دونیای خۆی كردبوو، دوای ئەوەی یەكێك بە دەنگێكی بەرزەوە وتی"محەممەد بگەڕێیەوە"،

محەممەد وەك ئەوەی لە خەوێكی قۆڵدابێ و خەونێكی ناخۆشی بینیبێ یەكسەر راچەڵكی و گەڕایەوە لای كورسییەكەی و دانیشت و وتی كاك حەسەن چایەك بهێنە، لەگەڵ تێكدانی چایەكەی قسەی بۆ زاری كرمانجی دەكرد و دەیگووت"پیاو ئاگای لە خۆی نەبێ، خەرەند رایدەكێشێ"، دوو قووم لە چایەكەی دەدا و درێژە بە قسەكانی دەدات"ئەوەندە لەگەڵ خەرەند تێكەڵبوومە، ئەگەر ئێوارە نەهێمە ئێرە، بە درێژایی شەو نیگەران دەبم و وا دەزانم شتێكم ونكردووە، كاتێ‌ دەهێمە ئێرەش گەر بۆ ماوەی 5 خولەكیش بمێننمەوە تەواو ئاسوودە دەبم و بە ئارامی دەگەڕێمەوە ماڵ".

مامۆستا سەردار دانیشتنی ئێوارانی سەر خەرەند وەك وانەكانی ژیان دەبینێ و دەڵێ‌ ئەوەندە لەگەڵ خەرەند تێكەڵ بوومە، هەست بە خۆشەویستی و سۆزی ئەو دەكەم و جاروباریش لە دڵەوە قسە لەگەڵ یەكتر دەكەین"ئەگەر ئەو خەرەندەمان نەبوایە، زۆر سەختە بتوانی لەنێو ئەو هەموو بارودۆخە ناخۆشەی ژیان، ئاسوودە و ئارام بژیت"،  سەردار ئەوەش دەڵێ‌"هەر كێشە و گرفتێكی دەروونیت هەبێ، كاتێ هاتی بۆ سەر خەرەند، هەموو شتێكت لەبیر دەچێتەوە، جوانی و ئارامی خەرەند واتلێدەكات تەنها بیرت لای ئاسوودەیی و گەشبینی و كامەڕانی بێ".

حەسەن ئیبراهیم ماوەی 8 ساڵە لەسەر بانی كافتریاكە خەریكی فڕۆشتنی ساردەمەنی و شەربەتی سروشتی و چایی سەر دارانە، دەڵێ"لەكاتژمێر 5 ی ئێوارە تا كاتژمێر 1 ی شەو، شوێنەكەمان بەرووی میوانان كراوەیەو تاكو یەك گەنج لێرە مابێ، ئێمەش لێرە دەبین"، ئەوانەی سەردانی كافتریاكەی دەكەن جگە لەگەنجان، كەسایەتی و مامۆستا و كەسانی بە تەمەنیش هەن، بۆیە دەڵێ‌"گەنجان زیاتر بە ئێواران روو لێرە دەكەن، هەروەها كەسایەتی و دكتۆر و مامۆستا و كەسانی بە تەمەنیش سەردانی ئێرە دەكەن و تێكەڵاو لەگەڵ گەنجان دائەنیشن و گفتوگۆ دەكەن"، حەسەن باس لەوەش دەكات جگە لە خەڵكی شار، گەنجانی شارەكانی تریش سەردانی خەرەند دەكەن"موشتەریمان هەیە بە خێزانەوە لە هەولێر دەهێنە ئێرەو پێشتر تەلەفۆنمان بۆ دەكەن، هەندێ جاریش میوانیش لەگەڵ خۆیان دەهێنن"،

حەسەن باس لەوەش دەكات ئەمساڵ بەرنامەی نۆژەنكردنەوەو پێشخستنی سەربانی كافتراكەیان هەیە، بۆ ئەوەی لە وەرزی زستانیش پێشوازی لەگەنجان بكەن و بێ بەش نەبن لە دیمەنە جوانەكانی زستانی خەرەند.

زۆرترین بینراو