ئەندازیار خوسرەت سادق " بە كردنەوەی بەڕێوەبەرایەتییەكەمان دەستەڵاتەكانمان فراوانتر دەبێت

ئەندازیار خوسرەت سادق " بە كردنەوەی بەڕێوەبەرایەتییەكەمان دەستەڵاتەكانمان فراوانتر دەبێت

دیدار: پشتیوان كەریم-سۆران:
 دوابەدوای هەوڵی زۆر لەبەرواری 31-8-2021 بە ئامادەبوونی وەزیری ئاوەدانكردنەوە و نیشتەجێكردن بەڕێوەبەرایەتیی چاككردنەوەو پاراستنی رێگاوبانی سۆران كرایەوە، ئەمەش بە یەكەم بەڕێوەبەرایەتی دێت دوای راگەیاندنی ئیدارەی سۆران.
 ئەندازیار خۆسرەت سادق دری، بەرێوەبەری بەڕێوەبەرایەتی چاككردنەوەو پاراستنی رێگاوبانی سۆران، لە بارەی گرینگی و سوودی بە بەڕێوەبەرایەتی بوونی فەرمانگەكەیان بۆ زاری كرمانجی گووتی "ئەوەی كە پێشتر هەبوو هۆبەیەك بوو بە ناوی فەرمانگەی سۆران، سەر بە بەڕێوەبەرایەتی چاككردنەوە و پاراستنی رێگاوبانی هەولێر، تەنها هۆبەیەك بوو كۆمەڵێك دەسەڵاتی سنوورداری هەبوو  جاری وەهاش هەبوو هیچ دەسەڵاتی هیچی نەبوو. كارە باشەكەی ئەو فەرمانگەیە ئەوە بوو كۆمەڵێك فەرمانبەری وەزارەتی ئاوەدانكردنەوە لێرە سەرپەرشتی هەرچوار قەزاكەی دەكرد و هەر مووچە و پشتگیری هەبوایە دەهاتە فەرمانگەی سۆران، بەڵام لە رووی تەكنیكییەوە دەسەڵاتی نەبوو.   
 ئەندازیار خۆسرەت سادق راشیگەیاند "بوونی بەڕێوەبەرایەتییەكی وا پێویستی بە ئیمكانییات و بوودجەی پێویست هەیە، بۆ راپەڕاندنی ئەرك و كارەكانی، لەماوەی دوو مانگ هەوڵی زۆرماندا توانیمان بوودجەیەكی پێویست بۆ دیاری بكەین، دواتر دوای هەوڵ و كۆششێكی زۆر لەسەر 30 %ی رێكەوتین و لەوانەیە پاش ماوەیەكی تر بوودجەیەكی تایبەت بدەن.
ئاشكراشی كرد "بەكردنەوەی بەڕێوەرایەتیەكەمان، دەستەڵاتەكەمان فراوانتر دەبێت و لە سنووری ئیدارەی سۆران، هەروەها تا ئێستا قەزایی مێرگەسۆر لە سەر بوددجەی پەرەپێدانی پارێزگای هەلێرە، بەڵام دوای تەواو بوونی  رێكارەكان، ئومێد دەكەین ئەم قەزایەش بخرێتە سەر بەرێوەبەرایەتییەكەمان.
ئەندازیار خوسرەت گووتیشی "سەبارەت بە لادانی مەترسییەكانی دەرزی كەمەربەندی سۆران، لەسەرەتای دەستپێكردنی پرۆژەكە پێشنیاری تونێلمان بۆی كرد، بەڵام تێچوویەكی زۆری دەویست خۆش بەختانە یەكەم پرۆژە بوو كەوا كاری 24 كاتژێری تێدا دەكرا توانرا بە تێچووی 550 ملیۆن دینار كۆتایی پێ بهێنرێت، خێرا كارتێكردنیشی ئەوە بوو كە رێگەیەكی ستراتیژی و سەرەكی بازرگانی نێوان هەولێر حاجی ئۆمەران بوو.

زۆرترین بینراو