زێدان بۆ لە ریال بێزارە

زێدان بۆ لە ریال بێزارە

زاری كرمانجی- ئاژانسییە هەواڵییە وەرزشییەكان: چەند راپۆرتێكی رۆژنامەوانی لە ئیسپانیا، نهێنی نیگەرانی و بێزاریی زێنەدین زێدانی راهێنەری فەڕەنسی لەگەڵ ریال مەدرید ئاشكرا دەكەن.
ئەو راپۆرتە رۆژنامەوانییانە پشتڕاستیانكردەوە كە زێنەدینی زێدان بەم دواییە زۆر تووڕەیە لە ریال مەدریدو هەست بە بێزارییەكی زۆر دەكات.
بەگوێرەی ئەو سەرچاوانە، زێدان لەم وەرزەدا لە كاری خزمەتگوزاری پزیشكی لە یانەی شاهانە نیگەرانەو پزیشكانی یانەكە بە هۆكاری ئەو هەموو پێكانە زۆرانە دەزانێت كە بە درێژایی وەرزەكە تووشی یاریزانەكانی بوونەو هیچ یانەیەكی دیكە هێندەی تیپەكەی زیزۆ لە پێكانەكان زەرەرمەند نەبووە.
ئەو سەرچاوانە، هەروەها دەشڵێن" زیدان پێیوایە زۆری پێكانەكان هۆكارێكی سەرەكی بووە بۆ ئەوەی تیپەكەی نەتوانێت ئاستی راستەقینەی خۆی پێشكەش بكات، ئەوش بۆ بێباكی و كەمتەرخەمی تیمی پزیشكی یانەكە دەگەڕێنێتەوە".
لەم وەرزەدا ریال مەدرید تووشی چەندین پێكان بووە، كە لە خول و پاڵەوانێتییە جیاجیاكاندا كاریگەرییەكی زۆری لەسەر ركابەرییان هەبووە، بەتایبەتیش هەندێك لە یاریزانە كاریگەرەكانی پێكهاتەی سەرەكی زێدان، وەك رافایێل ڤاران، سێرخیۆ رامۆس، فێرلاند مێندی، لوكاس ڤاسكێز، دانی كارڤاخال، كەریم بنزیما، ئێدین هازارد، رۆدریگۆ و فێدی ڤالڤێردی و چەندینی دیكەش. 
ریال مەدرید لەم وەرزەدا لە جامی شای ئیسپانیاو لە چامپیۆنزلیگ دەركراوەو ئێستا لەگەڵ ئەتلێتیكۆ مەدریدو بەرشەلۆنە ركابەری لەسەر نازناوی لالیگا دەكات، كە بە كۆكردنەوەی 75 خاڵ سێیەمی ریزبەندیی خولەكەیە، بەڵام یارییەك كەمتر لە بەرشەلۆنەی دووەمی ئەنجام داوە، كە تەنیا خاڵێك لەپێش یانەی شاهانەیەو بڕیارە سبەی شەو ببێتە میوانی گرانادا.
ماوەیەكە هەندێك لە راپۆرتە رۆژنامەوانییەكان لە ئیسپانیاو ئیتاڵیا باس لەوە دەكەن زێنەدین زیدان بەنیازە لە كۆتایی ئەم وەرزەدا واز لە پۆستی راهێنەرایەتی ریال مەدرید بهێنێت و بۆ وەرزی داهاتوو ببێتە راهێنەری یانەی یوڤانتسی ئیتاڵی، بەڵام تا ئێستا هیچ یەكێك لە سێ لایەنەكە، ریال مەدرید، یوڤانتس و خودی زێدانیش هیچ شتێكیان لەو بارەیەوە نەدركاندووە، واتا هەواڵەكەیان نە دووپاتكردووەتەوەو نە رەتیشیانكردووەتەوە.

زۆرترین بینراو