كارەساتی زێوە هەوڵێك بۆ جینۆسائید كردنی نەتەوەی كورد

"زێوە دڵۆپێك لە دەریای تاوان لە ئاست نەتەوەیەك"


ن/ فكری رەشید بێشۆنی

مێژوویی شۆڕشی هەموو نەتەوەكانی جیهان كە ویستبێتیان لە ژێر دەستەیی و چەوسانەوە رزگاریان بێت و ببنە خاوەن ئازادی و شكۆ لە چوارچێوەیی كیانێكی سیاسی پرێتی لە قوربانی دان و كارەساتی ناخ هەژێنی دژە مرۆڤایەتی.
مێژوویی هیچ یەك لەو نەتەوانە بەقەد مێژوویی نەتەوەی كورد كارەساتی نامرۆڤانەی بەخۆیەوە نەبینیوە، بۆیەش تەواوی رۆژەكانی ساڵ بیرەوەرییەكی ناخ هەژێنی بۆ نەتەوەی كورد تێدایە.
نووسینەوە و توێژینەوەی ئەم كارەساتانە لە كاتی روودان و هۆكارەكان و دەرهاوێشتەكانی بەسەر تاك و خێزان و كۆمەڵگەی كورد كارێكی ئاسان نییە، ئەوەش لەبەر زۆری رووداوەكان، هەروەها لەبەر هەوڵەكانی داگیركاران بۆ شاردنەوەی كارە قێزەوونەكانیان.
بەڵام دواجار پێویستە هەر تاكێكی كورد كە لە رابردوو یا لە ئێستادا رووبەرووی ئەم جۆرە كارەساتانە دەبنەوە یا بوونەتەوە، ئەگەر نەتوانن تۆێژینەوەی زانستیشی لەسەر بكەن، بەڵام گرنگە ئەوەی بینیویەتی بنووسێتەوە، تا بۆ داهاتوو وەك دیكۆمێنتارییەك لەبەر دەست بێت بۆ ئەوەی سوودی لێ ببیندرێت، هەر وەك چۆن بۆ ئەرمەنییەكان سوودی هەبووە و بوونە خاوەن دەوڵەت، بۆ جووەكان زۆرترین كاریگەری هەبووە بوونە خاوەن دەوڵەت، ئەم گێرانەوەیەی لەبەر دەستانە بۆ خوێندنەوە، بەشێكە لە بینینی كارەساتی كۆمەڵگەی زێوەی ئێران كە  لە ساڵی 1985 روویداوە، بێ گومان هەموو گۆشەی رووداوەكە ناتواندرێت وەك خۆی بگوازرێتەوە و بنووسرێتەوە، لەبەر ئەوەی رووداوەكە ئەوەندە كت و پڕ و مەزن بوو لە خیاڵی كەس دانەبوو، رۆژەی حەشڕی دەهێنایەوە بیر مرۆڤ، بۆ هەر لایەك رووت وەردەگێرا، جەستەی لە خوێن و خۆڵ گەوزاوی پیاو، ژن، منداڵ، گەنج دەهاتە بەرچاو كە بەشێكیان پارچە پارچە ببوون، بەشێكیان دەست و قاچیان نەمابوو، بەشێكیان هەر نەدەناسرانەوە، جەستەی لەت لەت كراوەی ئەندامانی خێزانێك تێكەڵ بەیەكتری ببوون، دەنگی فڕۆكە و تەقینەوە و هاواڕ و ناڵە و گریانی دانیشتیووانی كۆمەڵگەی زێوە تێكەڵ بە یەكتری ببوون، هێزی دەویست خۆی لەبەردەم ئەم دیمەنە رابگرێت، بۆیە تاوانێكی مەزنە ئەم كارەساتە لە بیر بكرێت.

 

 

 

بەیانی رۆژی 6-9-1985 سپێدەیەكی زۆر جیاوازتر لە سپێدەییەكانی تر، بەیانییەكی جیا لەگەڵ بەیانییەكانی رابردوو و ئایندە، بەیانییەكی رۆژێكی رەش لە دیرۆكی نەتەوەی كورد، لە دوای نسكۆی شۆڕشی ئەیلول ساڵی 1975، بەشێكی زۆر لە كوردستانیانی باشوور بەهۆی رازی نەبوون بە دەسەڵات و قبوڵ نەكردنی ژێر دەستەیی و ستەم و زۆرداری رژێمی ئەوسای عێراق و رەتكردنەوەی ئەو پیلانەی دژی كورد لەلایەن دوژمنانەوە دارێژرا بوو، ئاوارەی وڵاتی ئێران بوون بە سەر شار و شارۆچكەكانی ئێران بڵاو كرانەوە.
لە ساڵی 1979 و دوای سەركەوتنی شۆڕشی ئیسلامی ئێران و روخانی رژێمی شا، بەشێكی زۆری پەناهەندەكان بە ماڵباتەوە بە فەرمانی سەركردایەتی پارتی روویان لە رۆژهەڵاتی كوردستان كرد و لە كۆمەڵگەی زێوە نیشتەجێ بوون، كە دەكەوێتە ناوەڕاستی دەشتی دەڤەری مەرگەوەری سەر بە پارێزگای ورمێ بە دووری 40 كیلۆ مەتری شاری ورمێ و لە سێ گۆشەی ئێراق، ئێران، توركیا.
زێوە ناوێكی ناسراوبوو بۆ هەموو ئازادیخواز و شۆرشگێران، ببووە هیمای خۆڕاگری و بە رخۆدانی پەناهەندەكان و وارگەی شەهیدان.
كۆمەڵگەی زێوە ناوەندی زیندوو راگرتن و بەرفرەوانكردنی قەڵەمڕەوی شۆڕشی گوڵانی پێشكەوتنخواز بوو بە رابەرایەتی سەرۆك مەسعود بارزانی.
زێوە بەدرێژایی شەڕی ماڵوێرانكەری هەشت ساڵەی هەردوو رژێمی عێراق- ئێران تا كۆتایی شەڕ و ئاگربەست لە ساڵی 1988 زیاتر لە 9 جار كەوتە بەر هێرشی دڕندانەی فرۆكەكانی رژێمی بەعس.
لە هەموویان دڕندانە تر و جەرگبڕتر و بێ بەزەییانەتر ساڵی هێرشی رۆژی 9-6-1985 بوو، كە هاوكات بوو لەگەڵ 19ی  مانگی رەمەزانی پیرۆز، كاتژمێر9ی بەیانی لەلایەن هەشت فڕۆكەی جەنگی بەعسەوە بە دڕەندانەترین شێوە بۆردوومان كران، بە جۆرێك كە خۆیان نەپاراست لە خاپۆركردنی مزگەوت، قوتابخانە، بنكەی تەندروستی، هۆڵ، بازاڕ، كۆڵان، كانیاو و شوێنی گشتی رێژنەی بێ رەحمانەی بۆمبای رۆكێت و ناپاڵم و سارۆخ و لە چاوتروكانێكدا بووە هۆی شەهیدبوونی زیاتر لە 140 كە س و برینداربوونی 400 هاووڵاتی كە زۆربەیان ئافرەت و منداڵ و پیرو پەككەوتە بوون .
كۆمەڵگای زێوە هەرچەندە لەژێر چاودێری و سەرپەرشتی نەتەوە یەكگرتووەكاندا بوو، بەڵام ئەوانیش لە ئاست ئەو كارەساتە گەورەیە كە جینۆساید كردنێكی زەق بوو بێ دەنگیان هەڵبژارد، تەنانەت ئامادەنەبوون بەیەك وشەش ئیدانە و پڕۆتیستۆی ئەم كۆمەڵكوژییە بكەن، كە رژێمێكی دیكتاتۆر لە ئاست گەلێكی بێ تاوان ئەنجام درا.
 بە پێی پەیماننامە و یاسا نێودەوڵەتییەكانەوە بەكارهێنانی ئەو جۆرە چەكانە لە دژی خەڵكی سڤیل قەدەخەیە و بە تاوانە گەورەكانی جەنگی ئەژمار دەكرێت. رژێمی بە عسی رووخاو دوور لە هەموو بەها ئایینی و مرۆڤایەتییەكان و پێشلكردنی پەیماننامە و یاساكان زۆر بێ بەزەییانە زێوەی بۆردوومان كرد.
ئاوارەكانی ناو كۆمەڵگەی زێوە ژیانێكی دژوار و پڕ لە كارەسات و سەختیان هەڵبژارد بوو، بەڵام دەستبەرداری باوەڕی رێبازی نەتەوایەتی و رەسەنایەتی كوردی نەبوون و بە خۆڕاگری مانەوە.
پێشتریش بۆ ماوەی چەند ساڵێك لە هەندێ كاتدا دەبوایە لەگەڵ نوێژی بەیانی بەهۆی مەترسی بۆردوومانی فرۆكەكان بۆ سەر كۆمەڵگەی زێوە دەبوایە ئەوێمان چۆڵ كردبایە، چونكە زووتر سەركردایەتی پارتی ئاگاداری هێرشەكان دەبوو، ئەو كات شڕە ئۆتۆمبێلێكی جۆری مێگ زەمین بە بڵندگۆێكی گەورە لەناو زێوە دەسوڕایەوەن و بەجۆرە بانگەوازی دەكرد:
(ئاگاداری ئاگاداری ...
گەلی ئاوارە خۆڕاگرەكان تكایە بەیانی زوو پێش خۆرهەڵاتن ئۆردوگا چۆڵ بكەن، كەس لەناویدا نەمێنێتەوە).
 سپێدە زوو ئێمەیان بەخەبەر دەهێنایەوە لە خەوی شیرین هەڵیاندەستاندی و بە ناچاری بەرەو گوندەكانی دەورووبەر دەرۆیشین، هەندێك بە پیادە كۆڵە پشتی و هەڵگرتنی كە لوپەلەكانی پێویست ملی رێمان دەگرت، دایك و باوكان منداڵ لە باوەش كۆڵەپشت لەمڵ دەستی منداڵەكانی دیكەشیان دەگرت و دەرۆیشتن، هەندێشیان بە ئۆتۆمبێل، ئیتر بە ناچاری و لە ترسی گیانی ژن و منداڵەكانمان هەموو خەڵكی ئاوارە پەرتەوازەی دۆڵ و دەشتایی دەبووین و لە بن سێبەری دارەسێو و سپیندارەكان دەگیرساینەوە، تا تاریكایی شەو، دیسان ملی رێگامان دەگرتەوەو دەگەڕاینەوە زێوە. 
كاتژمێر 9 بەیانی رۆژی 9-6- 1985، من و برایەكانم و منداڵە درواسێ و هاوڕێكانمان كە تەمەنمان 10 ساڵان دەبوو، وەك نەرێتی رۆژانەمان لە پێش هۆڵی ئێمە كە شوێنی بەیەك گەیشتنمان بوو لە دەوری یەك كۆبووینەوە و باسی یاری تۆپی پێمان دەكرد، كە بڕیار بوو ئێوارەی هەمان رۆژ  لە یاریگای پشت ( كانیاوی گولیزار ) كە نزیكی ماڵی ئێمە بوو یاری بكەین بۆیە سەرقاڵی پلان و ئامادەكاری بووین، هەندێ لە هاوڕێكانیشمان بۆ ئەنجامدانی تاقیكردنەوەكانی كۆتایی ساڵ چووبوونە قوتابخانە و چاوەڕوانی گەڕانەوەیان بووین، بەیانی ئەو رۆژە قوتابییان بۆ ئەنجامدانی ئەزموونەكانی كۆتایی ساڵ دەچوونە قوتابخانە، بەیانی ئەو رۆژە ئافرەتانی دراوسێ و دەستەخوشكەكان پۆڵ پۆڵ لە هاتووچۆدا بوون بۆ سەركانی گولیزار بۆ شۆردنی كەلوپەلەكانیان و هێنانەوەی دەبەی گەورەی ئاو لەسەر شان بۆ ماڵەوە.
لەسەركانیاوە كە هەموو ئافرەتە كان چاویان بە یەكتر دەكەوت لەدەوری یەك كۆدەبوونەوە بە یانی ئەو رۆژە بازاری ئۆردوگای زێوەتازە دەكرایەوە كە تێدا پیرو و لاو و ئافرەت و منداڵ بۆ كرینی پێداویستی بژێوی رۆژانە و خۆئامادەكردن و كڕینی پێداویستی بۆرۆژی جەژنی رەمەزانی پیرۆز لە ناو بازاڕ هاتوو چۆیان دەكرد . زۆرێك لە كچ وكوڕی گەنجی دەزگیراندار و مارەبڕاو خە ریكی ئامادەكاری بوون بۆ ئاهەنگ و گواستنە وەیان لە دوای جەژنی رەمەزان.
زۆرێك لە ئافرەت و منداڵەكان چاوەڕێی گەڕانەوەی باوك و برا و هاوسەرەكانیان بوون كە لە دوای چەندمانگێك لە ئەركی پێشمەرگایەتی لە ناوچە ئازاد كراوەكانی كوردستان لە ئەركدا بوون و لە سەنگەرەكان دژی زۆرداری خەباتیان دەكرد، تا لە دوای جەژن بگەڕێنەوە نێوماڵباتەكانیان و بەیەكتر شاد ببنەوە، بەڵام ئەو بەیانییە گۆڕانی بە سەر هەمووشتێك هێنا، ئەو بەیانییە كۆتایی بە هەموو خۆزگە و ئاوات و خەون و چاوەڕوانكردن و ئامادەكاری هێنا.
ئەوشوێنەی ئێمە لێی كۆببووینەوە لە ناكاو چاومان بەچەند فڕۆكەیەك كەوت كە زۆر نزم لە سەر سەرمان لە ئاسمانی ئۆردوگا بە دەركەوتن بە پەنجەی دەست ئاماژەمان بۆ فرۆكە دەكرد و پێشانی یەكترماندەدا، ئیتر لە گەڵ بەربوونەوە و دەنگی بەرزی ناپاڵم و سارۆخ و رۆكێت وامانزانی دونیا بە سەرماندا رووخا، كە هەڵساینەوە هەر یەكێكمان بۆلایك رۆیشتین بۆ هەركۆی بچووباینا هەر ئاگر باران بوو، لێك دابڕاین هەر ئەو بەیانییە و لێكدابڕانە بوو، ئێدی بۆ چەندین ساڵ و هەندێكیش لە هاوڕێیانمان تا ئێستاش نەمانبینیەوە هەندێكیشیان شەهید كران.
بۆ ماوەی بیست خوولەك دەنگ و بارینی سارۆخەكان بەردەوام بوو دووكەڵێكی رەش ئاگر تێكەڵ بە بۆنی بارووت تەپوتۆزی بۆردوومانكردنەكە بەری ئاسمانی زێوەی داگرتبوو، لە دوای بۆردوومان كەم كەم دووكەڵ و تەم رەوییەوە، هەموو شوێنێك وێران ببوو، هەموو جێگایەك پڕببوو لە شەهید و بریندار قیرەقیری زارۆكان ناڵە ناڵی برینداران و هەواری دایك و باوكان تێكەڵ بە بۆنی خوێن و لاشەی پارچە پارچە كراوی دانیشتووانی  كۆمەڵگە ببوو، كارەساتێكی یەكجار ناخ هەژێن بوو هەرگیز لە یادمان ناچێتەوە.
زۆربەی قاعەكان رووخابوون و ماڵ نەبوو شەهید یا برینداری نە بێت.
هەر زوو برایانی كوردی بە ئەمەك ومرۆڤ دۆست و خێرخوازی دەڤەری مەرگەوەڕ كە زیاتر لە 40 گوند دەبوون بە هانای برایانی لێقەوماوی خۆیانەوە هاتن، بە تەراكتۆر و لاندرۆڤەر و پیكابە كانیان، بریندارەكانیان دەگواستەوە بۆ نەخۆشخانە و هەروەها تەرمی شەهیدەكانیشیان بۆ گۆڕستانی مەلا باسەك كە تایبەت بوو بە ناشتنی پەناهەندەكان و لە نزیك زێوە بوو دەگواسترانەوە و هەندێ لە بریندارەكانیش كە برینیان زۆر سەخت بوو بە كۆپتەرەكانی كۆماری ئیسلامی ئێران گواسترانەوە بۆ نەخۆشخانەكانی شاری ورمێ، بۆ هەر شوێنك برۆشتبایە بێجگە لەوێرانە و پارچەی جیا بوویەوەی جەستەی نازداری شەهیدەكان هیچ شتی ترت پێش چاو نەدەكەوت .
من برایەكانم كە گەڕاینەوە و چووینە سەركانیاوەكە بینیمان تەرمی شەهیدێكی زۆر لەسەر كانیاوەكە كەوتووە و لاشەی جیاكراوی چەند شەهیدێكی تر لەبەر نزیك كەوتن و پاڵەپەستۆ و هێزی سارۆخەكە چەند مەترێك لە شوێنەكە فرێدرا بوون و زۆربەی ئافرەتەكانی سەركانیاوەكە كە ژمارەیان 25 ئافرەت دەبوون شەهید و بریندار ببوون، پیكابێك لە شوێنەكە وەستابوو چەند كەسێكیش تەرمی شەهیدانیان دەگواستەوە بۆ ناو پیكابەكە و لە وێشەوە بۆ گۆڕستان، یەكێك هاتە لامان و گووتی وابزانم لە ماڵباتی ئێوەش چەند شەهیدێك هەنە كە دووپاتمانكردەوە گووتی دایك و سێ خوشكتان شەهید بوونە دوانیان بە برینداری لە سەركانیەكە كەوتبوون ئەوانیان بردن بۆ نەخۆشخانە، بەڵام لە بەرسەختی برینەكانیان لەرێگادا هەردووكیان گیانیان سپارد و نەگەێنرانە نەخۆشخانە، بەراكردن چووین بۆ گۆڕستانی مەلاباسەك بە هەزاران خەڵك لەوێ دەبینران دەنگی  هاوار و گریان لە هەمووشوێنك بەرز دەبوویەوە بەسەدان تەرم لە تەك یەك دانرابوون رووباری تەنیشت گۆڕستان سوور ببوو لە خوێنی شەهیدان .بەسەدان كەس خەریكی لێدان وئامادەكردنی گۆڕ بوون .چەندین ئۆتۆمبێل لەرێ دابوون بۆ هێنانی تەرمی شەهیدان بۆ ناو گۆڕستان .
دایكم و سێ خوشكە شەهیدەكەم بە ڕۆژوو بوون و تەرمی هەر چواریان لەتەنیشت یەك دانرابوون و خەڵكێكی زۆر چواردەووریان دابوو بە دەنگێكی بەرز دەگریان.

 

 

 

زۆربەی تەرمی شەهیدەكان بە هۆی سووتان و پارچە بوونیان شێوا بوون و نەدەناسرانەوە لە دوای چەندینجار سەیركردن و بینینمان ئەوجا زۆر بە ئەستەم شەهیدەكانمان ناسییەوە. 
زۆری نەخایاند هێشتا فرۆكەكان بەسەر ئۆردوگادا دەسوڕانەوە سەرۆك مەسعود بارزانی گەیشتە ناو ئۆردوگا و دواتر هاتە گۆڕستانی مەلاباسەك كاتی گەیشتنی سەرۆك من لە نزیكەوە وەستا بووم كە چاوی بەو هەموو شەهیدەكەوت كە لە تەنیشت یەك دانرابوون و دەنگی هاوار و گریانی دایكانی جگەر سووتاو كە زۆر غەریبانە دەگریان بیست، بینیم  دەستە سڕەكەی لە گیرفانی دەرهێناو خستیە بەرچاوەكانی و فرمێسكەكانی دەسڕییەوە.
دواتر دڵنەوایی خەڵكەكەیدا و پاشان فەرمووی " ئەی سەددامی زاڵمی دیكتاتۆر باشە تاوانی ئەو هەموو ئافرەت و منداڵە چیبوو، كە بەوشێوە دڕندانەیە شەهید بكرێن" بەڵێنی بە خەڵكی خۆڕاگر و خاوەن شەهیددا تۆڵەی ئەو شەهیدە بێ تاوانانە لە سەددام و دار و دەستەكەی بكاتەوە، ئامادەبوونی جەنابیان لە شوێنەكەو دڵنەوایكردنیان تا زۆرێك ئازاری خەمی لە دەستدانی ئازیزەكانیان سووك كردەوە.
كات بەرە و تاریكایی دەرۆیشت هیچ یەك لە ئاوارە خۆراگرەكان دڵیان نەدەهات و ئامادەنەبوون  ئەمشەوە ئازیز و نازدارە لە دەستداوەكانیان بەتەنیا جێ بهێڵن و لە یادیان كردبوو كە بە رۆژوو بوونە و پێویستە بە قومە ئاوێكیش بێت رۆژووەكەیان بشكێنن، دەنگی بانگ لە مزگەوتی گەورەی ئۆردوگا نە دەبیسترا، چونكە كەوتبووە بەر سارۆخی فرۆكەكان و رووخابوو.
ئەو شەوە گۆڕستان چۆڵ كرا و گەڕاینەوە ناو كۆمەڵگە، بەڵام بێجگە لە هۆڵی بەسەریەكدا رووخاو و وێرانە هیچ شتی تر نەمابوو.
لە بەردەم هۆڵی ئێمە روناكایی تراكتۆرێك بەدێ دەكرا، كە نزیك بووینەوە بینیمان برایانی گوندی سوسن ئاوای مرگەوەر كەلوپەلەكانمان دەگوازنەوە بۆ گوندەكەیان و باوەشیان بۆ ئێمە و زۆریك لە پەناهەندەكان كردبویەوە، تێكرای دانیشتوانانی ئۆردوگای زێوە جارێكیتر لە ئاوارەییەوە ئاوارە بوونەوە بۆ دێهات و دۆڵ و شارەكانی دەورووبەری زێوە.
ئێمەشیان خستەسەر تراكتۆرەكە و بەرە و گوندی سوسن ئاوا بەرێ كەوتین، كە دابەزین دیسان دەنگی گریان و شیوەنی ماڵەوەمان بوو  هەموو خەڵكی ئاوایی هاتبوونە شوێنەكە و دڵدانەوەیان دەدایەوە هاوخەمی خۆیان دەردەبڕی.

 

 

 

شەوكاتی خەوتن هات، بەڵام لەبەر خەمی گەورە و ئازاری دڵمان كێ خەوی لێ دەكەوێت.
بەرەبەیانی بۆ چەند خولەكێك چاوم لەسەر یەك دانا لە دەنگی گریانی دایكم و خانەوادەكەمان و كەس و كارو خزمان خەبەرمان بویەوە خەڵكێكی زور كۆببوونەوە و دەستە دەستە دەهاتن بۆ بەشداری كردن لەم پرسە .
لەدوای ئەو بەیانییە پەرتەوازە بوون و لێك دابڕان، لێكدابڕانی ئێمە ودایك و خوشكەكانمان 
لێك دوركەوتنەوەی هاورێ و هاوپۆلەكانمان كە هەندێكیان شەهیدبوون و هەندێكی تریشیان تا ئەو ساتە یەكترمان نەبینییەوە.
پەناهەندەكان پەراگەندە و ئاوارەی گوند و شارەكانی دەورووبەربوون بۆ چەندین ساڵ، ئێدی ئۆردوگای زێوە وەك جاران نەمایەوە.
دوای چەند رۆژێك لە كارەساتەكە باوكی خوالێخۆشبوومان لە ئەركەكەی گەڕایەوە داخی گرانی باوكمان بینی كە چۆن بەهۆی لە دەستدانی چوار ئەندامی ماڵباتەكەی لە یەك چركەدا كاریگەری لەسەر دانا بوو.
سەرۆك مەسعود بارزانی و كاك ئیدریسی جوانە مەرگ و بەڕێز نێچیروان بارزانی سەردانی یەك بە یەكی ماڵباتی شەهیدەكانیان دەكرد و بە شداری پرسەیان دەبوون و هاوخەمیان پێ رادەگەیاندن و سەرەخۆشیان لێ دەكردن.
كارەساتی ئۆردوگای زێوە زامێكی قووڵی لە بیر نەكراوە لە دەروون و جەستەیی ئێمەدا، كارەساتی ئۆردوگای زێوە یەكێكە لەو كارەساتە گەورانەی رژێمە یەك لە دوای یەكەكانی عێراق بە سەر گەلی كورددا هێنای، وەك كارەساتی هەڵەبجە و ئەنفال و بێسەرو شوێنكردنی 180 هەزار كورد و هتد....
ئەمانە و چەندین نەهامەتی دیكە، بەڵام كەمتر یادی ئەو كارەساتە دەكرێتەوە، پێویستە گرنگی بەو رۆژە و یادە بدرێت و هەوڵ بدرێت لە ئاستی جیهانیش وەك یەكێك لە هەوڵەكانی جینۆساید كردنی نەتەوەی كورد بناسرێت و بۆ نەوەكانی ئەمڕۆ و داهاتوو بگێردرێتەوە، تا بزانن بە دەیان و سەدان كارەساتی وەك ئەم كارەساتە دڵتەزێنە بوونەتە بەدی هێنەری ئەم ئازادییەی ئەمڕۆ لە ژێر سایەیدا دەژین.
زێوە ئەگەر چی داخێكی گەورەی خستە ناو دڵی ئێمە و هەموو گەلی كورد و هەموو ئازادیخوازانی جیهان، بەڵام لەهەمانكاتیشدا بینیمان چۆن خوای گەورە تۆڵەی ئەو هەموو خەڵكە بێ تاوانەی لێ كردەوە و سەدامی دیكتاتۆر و دارودەستەكەی بە سزای خۆیان گەیشتن.
لەم یادەدا سڵاو و درود دەنێرین بۆ سەر گیانی پاكی شەهیدانی بێ تاوانی كارەساتی ئۆردوگای زێوە و سەرجەم شەهیدانی رێگای رزگاری كورد و كوردستان.

 

 

 

 

 

زۆرترین بینراو