باڵیۆزی هندستان: بە بایەخ و گرنگییەوە لە پەیوەندییەکانمان له‌گه‌ڵ هەرێمی کوردستان دەڕوانین

باڵیۆزی هندستان: بە بایەخ و گرنگییەوە لە پەیوەندییەکانمان له‌گه‌ڵ هەرێمی کوردستان دەڕوانین

زاری كرمانجی - نیوەڕۆی ئەمڕۆ دووشەممە 2021/10/25  نێچیرڤان بارزانی، سەرۆکی هەرێمی کوردستان، پێشوازی لە براشانت بایس باڵیۆزی هندستان لە عێراق کرد.

لە کۆبوونەوەیەکدا  نێچیرڤان بارزانی پیرۆزباییی دەستبەکاربوونی لە  باڵیۆز کرد و هیوای سەرکەوتنی بۆ خواست، هەموو پشتگیرییەکیشی بۆ سەرخستنی ئەرک و کارەکانی نیشان دا، هەروەها خواستی هەرێمی کوردستانی بۆ برەودان بە پەیوەندییەکان و بەتایبەتیش ڕەخساندنی دەرفەتی وەبەرهێنان و سەرمایەگوزاریی هندستانی دووپات کردەوە و سوپاس و ئەو دەرفەتانەی کرد کە تا ئێستا لەم بوارەدا لە هەرێمی کوردستان پێشکەشیان کردوون.

لای خۆیەوە باڵیۆزی هندستان جەختی لەوە کردەوە کە هندستان بە بایەخ و گرنگییەوە لە پەیوەندییەکان و دەرفەتەکانی وەبەرهێنان و سەرمایەگوزاری لە عیراق و هەرێمی کوردستان دەڕوانێت و لەگەڵ تیمی کونسولخانەیان لە هەولێر بەرنامەیەکی چالاکیان بۆ برەودان بە پەیوەندییەکان و بوارەکانی هاریکاریی هاوبەش هەیە و کاری لەسەر دەکەن. هەروەها ئاماژەی بە کۆرسەکانی مەشق و ڕاهێنانی پیشەیی کرد کە لە عیراق و هەرێمی کوردستان پێشکەشیان دەکەن.

تاوتوێکردنی هەڵبژاردنەکانی عیراق و ئەنجامەکانی و چاوەڕوانی و هەوڵەکان بۆ پێکهێنانی حکوومەتی داهاتووی فیدراڵی عیراق، تەورێکی دیکەی کۆبوونەکە بوو. تیایدا هەردوولا هاوڕا بوون لەسەر ئەوەی کە بنیاتنانی سیستمی دامەزراوەیی بۆ پاراستنی دیموکراسی، هەروەها پێگەیشتنی سیاسی و بەشداریی دەنگدەر لە پرۆسەی دەنگداندا بۆ گۆڕانکاریی ئاشتیانە پێویستە و جەختیان لە گرنگیی ئارامی و سەقامگیریی عیراق بۆ تەواوی ناوچەکە کردەوە.

کولتووری پێکەوەژیان و لێبوردەیی لەنێوان پێکهاتەکاندا وێڕای جیاوازیی ئایینی و نەتەوەیی لە هندستان و هەرێمی کوردستان، هەڵگرتنی کۆتوبەندی سەفەر بۆ هندستان، پەتای ڤایرۆسی کۆرۆنا و لێکەوتەکانی لەگەڵ پرۆسەی ڤاکسین، گرنگیی گەشتی ڕاستەوخۆی ئاسمانیی نێوان هەردوولا و سەردانی هاووڵاتیانی هەرێمی کوردستان بۆ چارەسەری پزیشکی لە هندستان، کاری ڕەوندی هندستانی لە هەرێمی کوردستان و چەند پرسێکی دیکەش لە کۆبوونەوەکەدا خرانە بەر باس کە بەڕێز کونسولی گشتیی هندستان لە هەرێمی کوردستان، ئامادەی بوو.

زۆرترین بینراو